ZABURU 32

1 Zaburuna Daud. Laguna kaadhari. Amasanaamo o mia motoʼamponina kasalahana, tee o mia motomaʼafuakana dosana. 2 Amasanaamo o mia mopewauna kasalaha, maka inda alentua o KAWASANA OPU, tee inda amakidha apekagau. 3 Kangengena indapo kuʼakui dosaku, buku-bukuku amalute roonamo kupeenci saeoa. 4 Malo eona Ingkoo upekatamo kahukumuku. Kakaaku atopadha mboomo kamba-kamba momalau roonamo akangkanaia kasodhona matanaeo. Sela 5 Kasiimpo kuʼakuia o dosaku i Ingkoo tee inda kubuniakea o kasalahaku. Kupogau, “Iaku bhekuʼakuia manga kasalahaku i KAWASANA OPU,” tee Ingkoo uʼamponi manga kasalahana dosaku. Sela 6 Sababuna sumai bhari-bharia mia mosaalihi tabeana adoʼa i Ingkoo wakutuuna Ingkoo dhaangiapo umembali utopokawaaka. Sumaimo wakutuuna uwena mawa maoge akawa, uwena mawa sumai inda amembali apabinasa incia. 7 Ingkoomo peulusaku, Ingkoo mojaganiaku minaaka i kasukara, Ingkoo modhikana lagu i nuncana ngangarandaku, roonamo padhamo upasalaamatiaku. Sela 8 Iaku bhekuadhariko tee kususuakako dhala molaengana idhalaikimu. Iaku bhekuudhaniakako, tee kujaganiko mamudhaakana sadhaadhaa uʼamani. 9 Bholi mboomo ajara atawa o siwuluna keledai inda tee akalana, tabeana atohelaaka tee kabhokena bhorokona tee rabutana, ande inda mboo sumai, manga incia inda bheaoseko. 10 Abhari o kanarakaa inamisina mia madhaki, maka o mia moparacaeana i KAWASANA OPU ajaganiakea tee kaasina molagina. 11 E manga mia mobanara, masanaamo tee ukaunde-undemo roonamo KAWASANA OPU! Sambo-sambomo, e bhari-bharia mia momakatena incana!