ZABURU 54

1 To kapalana molaguna. Tee kagasiana kecapi. Lagu kaadharina Daud 2 wakutuuna miana Zifi aumba apogauaka i Raja Saul, “Daud apeopo i ingkami." 3 E Aulataʼala pasalaamatiaku roonamo saromu, tee adilia parakaraku roonamo kakaamu. 4 Maasangia urangoa doʼaku, e Aulataʼala, rangoa manga pogau ibhoasakaku. 5 Manga mia momalangana incana akakaro aewangiaku, tee manga mia mosombo gauna bheaala inyawaku. Manga incia inda afaduliaka Aulataʼala. Sela 6 Satotuuna Aulataʼala motulungiaku, Kawasana Opu modhambaakaaku. 7 Taroakamo kadhaki ambuli akangkanai manga musuku. Roonamo kaasimu molagina, pabinasamea manga incia! 8 Tee relana totona incaku, iaku bhekupasombaaka kurubani to Ingkoo. Iaku bhekusukuru tee Ingkoo, e KAWASANA OPU, roonamo saromu amalape. 9 Roonamo Ingkoo padhamo urambasakaaku minaaka i sagala kanarakaa, sabutuna kukamata musuku amatalo.