ZABURU 87

1 Zaburuna miana Korah, saangu lagu. KAWASANA OPU apakaro kotana i bhawona tubuna gunu momangkilo. 2 KAWASANA OPU amaasiaka bhambana lawana Sion alabhi minaaka i bhari-bharia tampa mosagaanana modhaangiana i Israel, lipuna Yakub. 3 Manga mia apogauakako tee giu momulia, e kotana Aulataʼala. Sela 4 Pogauna Kawasana Opu, “Iaku bhekusarongi Rahab tee Babel i tanga-tangana lipu momatauaku. Tee uka o Tana Filistin, Tirus tee Etiopia, ‘Manga incia sii uka atoabhi amembali raʼeatina Sion.’ “ 5 Maka to Sion, manga mia bheapogau, “Mia incia sii tee mia incia sumai alaahiri i nuncana, tee o Aulataʼala Momalangana sakaro-karona bhemopekatangkea." 6 KAWASANA OPU bhealentua wakutuuna daftaraana manga lipu, “Manga incia sii uka aabhia o raʼeatina Sion.” Sela 7 Apoose amanari, manga mia bhealagu, “Minaaka i Sion ingkita tatarima manga giu momalape mboomo mia momboorena i saripina matana uwe."