1 Yahaya 2

1 Wasimana wangu, ezi habariâzi nukwandikirani ipate musikore dambi. Fala ikiwa munu mmojawapo akola dambi, tanawo wakutimírira mbere ya Baba, Insa Almasihi, Nkamilifu. 2 Iye ndi kafara iripa kwa madambi etu, na siyo kafara kwa madambi etu basi, fala kwa madambi a wanu wa mulumwenguâmu piya. 3 Na alama itolótera kuwa timwijíwa iye ndi kuwa tifulata ámuri zake. 4 Munu akamba: “Nímwijíwa” fala safulata ámuri zake, munuâyo nlongo, ukweli aupo mmoyo mwake. 5 Fala afuláta usemi wake, nkati yake pendo ra Mwenyezimungu riwankukamilika kweli-kwelini. Kitendo colóta kuwa tilungana naye ndici: 6 mwenyé kwamba kuwa alungana naye, inlazimu enende kamba vyenende Insa mulumwenguâmu. 7 Wapendani wangu, ámuri yanukwandikiraniâyi siyo nyipya, fala ámuri ya mida, ya tangu mwanzo. Eyi ámuri ya mida ndi habari yamusikire. 8 Novyo-sivyo, vyanukwandikiraniâvi ámuri nyipya, vyauri ukweli kwake iye na kwenu umwe, konta kisi caankwisa, nuru yakweli ilangaza futi. 9 Munu amba: “Nankwenenda na nuru”, iri amwina nduye, narero kankwenenda nkisi. 10 Ampénda nduye akuwa nnuru, na mmoyo mwake aciwepo cakunkwakurisa. 11 Fala ire amwína nduye abaki nkisi, kankwenenda nkisi, eejiwa kooka konta kisi cimwinúkaza kumaso. 12 Umwe wasimana wangu, nukwandikirani konta kwa zina rake muswamiiwa madambi enu. 13 Umwe wawáwa, nukwandikirani konta mumwijiwa ire akiwapo tangu mwanzo. Nukwandikirani umwe, wanemba, konta munshinda Ibilisi . 14 Umwe wasimana wangu, nukwandikirani konta mumwijiwa Baba. Umwe wawáwa, nukwandikirani, konta mumwijiwa ire akiwepo tangu mwanzo. Umwe wanemba, nukwandikirani konta mukomala, usemi wa Mwenyezimungu ubaki mmyoyo mwenu, na munshinda Mbaya . 15 Usukwajibuni ulumwengu wala virípo mulumwengu. Ãkiwa munu mmojawapo umwajibu ulumwengu, eyo munuâyo aampenda Baba. 16 Konta piya virípo mulumwenguâmu, vinúâvi: wájibu wa kimwiri, wájibu wa maso mawoni, na maritenzi a vinu vya mulumwenguâmu, avilawa ka Baba, vilawa mulumwengu nómu. 17 Ewu ulumwenguâwu pamoja na vitendo vyake vibaya vyakwajibisa, piya vípita. Fala ire aténda nafsi ya Mwenyezimungu áinshi milele. 18 Umwe wasimana, ezi suku za mwinsho. Kamba vyamusikire kuwa akúja aduwi wa Almasihi, sambi wankulawirira maaduwi wa Almasihi wengi wawenye. Ndimana tukwijiwa kuwa ndi suku za mwinsho. 19 Maaduwiâwo waláwa kati yetu, fala awawere kweli-kwelini wa daraja yetu. Kamana kamba wákiwa wa daraja yetu, nanga wabaki nofwe. Falakini ewo watasa ipate vijiwikane kuwa anta mmoja awere wa daraja yetu. 20 Fala umwe, Ntakatifu kakumiminirani Roho Takatifu, na piya-mwe mukwijiwa ukweli. 21 Sukwandikirani kwa kuwa mútikina ukweli, ila nukwandikirani kwa kuwa mukwijiwa ukweli, na mukwijiwa kuwa nkati ya ukweli aupo ulongo. 22 Nlongo nani? Nlongo ndi ire akaídi kuwa Insa ndi Almasihi. Ire ankána Baba pamoja na Mwanawe, noyo ndi aduwi wa Almasihi. 23 Piya ankana Mwana onse ndi sawalungana novyo na Baba. Fala mwenyé kumwakikisha Mwana kalungana na Baba novyo. 24 Habari zamusikíre tangu mwanzo, tulani mmoyo. Ikiwa umwe mutula mmoyo habari zamusikíre tangu mwanzo, mukuwa pamoja na Mwana na Baba novyo. 25 Na tamaa yaatipere Insa ndiyi: mainsha a milele! 26 Nukwandikirani ezi habariâzi kuhusu ware wasakúla kukutesani. 27 Fala umweâpo, Roho Takatifu waakumiminíreni Insaâyo mubaki naye daima, ndimana amusakula kufundiwa kinu kimojawapo na munu. Ila Roho Takatifu wamumiminiriweâyo akufundani vinu piya. Na kwa kuwa kufundaâko siko ka ulongo, ka kweli, bakini na Insa, kamba vyamufundiwe. 28 Sambi, umwe wasimana wangu, zidini kulungana naye, ipate paasaka kuja, isitipate aibu mbere yake, ila tiwe nawo uhakika. 29 Kamba vyamwijiwa kuwa iye kamilifu, mwijiwe kuwa kila mwenyé kutenda ukamilifu onse, mwana wa Mwenyezimungu.