2 Yahaya 1

1 Omi Yahaya, nlongozi wa jamati, eyi warakaâyi nankuwandikira wanu wa jamati itondoriwe na Mwenyezimungu waniwapenda kweli-kwelini. Sumi basi nukupendani fala piya wenye kwijiwa ukweli, newo novyo wakupendani, 2 konta ukweli uwa nkati yetu sambiâpa, na úzidi kuwa nafwe daima milele. 3 Mwenyezimungu Baba wetu, pamoja na Insa Almasihi Mwanawe, watijanliye rehema na salama na watiwonere utungu, nkati ya ukweli pamoja na pendo. 4 Níwa radi pakulu kuwonana na wanu wamojawapo kati ya jamati yenu wakufulata ukweli, kamba vyaatamurire Mwenyezimungu Baba wetu. 5 Sambi nukulebela mama , sikuwa eyi ámuriâyi nyipya, ila ndi ámuri yatipokerere tangu mwanzo, kuwa tipendane. 6 Na kupendana ndiku, kufulata ámuri za Mwenyezimungu. Kamba vyamusikire tangu mwanzo, ámuri yake ndiâyi: mupendane. 7 Wawapo wanu wengi wawenye walongo wenera ulumwengu nzimaâwu. Ewo awakubali kuwa Insa Almasihi kêsuka mulumwenguâmu kamba mwanadamu. Munu afúnda javyo kankuwatenvya wanu, ndi aduwi wa Almasihi. 8 Rinang’anizireni cusukupoteyeni camukorere kazi pakulu, ila mupokerere thawabu yenu kamili. 9 Munu ongéza vyaafundire Almasihi, aafulata kufunda kwake, munuâyo aalungana na Mwenyezimungu. Fala munu afuláta vyaafundire Almasihi, alungana na Baba pamoja na Mwana . 10 Akíja munu kwenu akitowa kukufundani inlimuâyi, mmanyumba mwenu musimpokerere wala musiyeriwe naye. 11 Kamana munu ayeriwa na munuâyo anlunga nkono vitendo vyake vibaya. 12 Ningari nawo vinu vingi vyawenye vyanisaka kukwambirani, fala sisaka kukwambirani nkati ya waraka. Kwasa javyo, nitumaini kuja kukuwonani, nisowere namwe uso-ka-wajii, ipate radi yetu itimiziwe. 13 Wenye kwamini wa jamati ya kuno , newo novyo watondoriwa na Mwenyezimungu, wakuperekerani salamu.