2 Peduru 1

1 Omi Ansumani Peduru, ntumisi na walii wa Insa Almasihi, eyi warakaâyi niwaperekera piya wapatire kwamini ka faida pakulu kamba ofwe vyataminire. Kwaminiâko tipata julu ya ukamilifu wa Nlungu wetu, Nvushi Insa Almasihi. 2 Rehema na salama mongeziwe, julu ya kumwijiwa Mwenyezimungu pamoja na Insa, Mwenye wetu. 3 Kwa uwezo waari nawo iye kwa kuwa ndi Nlungu, iye katipa piya vyatisakula ipate tiinshi mainsha akumwajibu Mwenyezimungu. Tipata julu ya kumwijiwa ire atítire kupokerera utukufu wake pamoja na wema wake mwanyewe. 4 Kwa namunaâyi, Mwenyezimungu katipa tamaa ya faida pakulu na ya matajabisa, ipate julu yawo mulawirire kuwa na namuna za Mwenyezimungu, kuwa mupolonyosiwa uwaribifu wa mulumwenguâmu, ushongiwa julu ya wájibu wa dambi. 5 Ndimana, tumirani nguvu zenu piya musanganye kwamini na wema, wema na wijiwifu, 6 wijiwifu na kurimiliki, kurimiliki na kuhitamili; kuhitamili na namuna ya kumwajibu Mwenyezimungu, 7 namuna ya kumwajibu Mwenyezimungu na kupendana, na kupendana musanganye na kuwapenda wanu piya. 8 Kamana namunaâzi, mukiwa nawo nezo zikizidi kukula kati ya mainsha enu, zukutenzani kuwa wijiwifu wenu wa kumwijiwa Mwenye Insa Almasihi auwepo bila visumo ila kukuja na faida. 9 Kamana ware sawatenda vitendo vya faida-vyo, ewo awawona, uwengira mwiza, wariwala kuwa Mwenyezimungu mida kâwaswafi madambi awo. 10 Ndimana wanduzangu, tumirani nguvu zenu piya mwakikishe kuwa kweli-kwelini mwitiwa na mutondoriwa na Mwenyezimungu. Mukitenda javyo, amushubutu kwasa kwamini kwenu. 11 Kamana kwa namunaâyo, uwapo nryango nkulu wakufunguririwa sana ipate mwingire muufalume wa milele wa Insa Almasihi, Mwenye wetu na Nvushi wetu. 12 Kwa javyo, niya yangu ndi kukukumbusani evi vinuâvi daima, ingawa mukwijiwa futi na mukwakikishiwa nkati ya ukweli wamupokerere. 13 Níwaza kuwa níjuzi nukukumbuseni, wakati waniripo mulumwenguâmu, 14 konta, kamba vyaanolotere Mwenye wetu Insa Almasihi, nukwijiwa kuwa suku karibu eya mainshaâya nukwasa. 15 Na nítenda juhudi piya ipate, bandi yakulawa omi mulumwenguâmu, daima evi vinuâvi mukumbukire. 16 Kamana patikerezanga uwezo wa Mwenye wetu, Insa Almasihi, na kuludi kwake, sikuwa tikifulata hadisi ya ujanja, ila tereza ubora wake nkulu kwa kuwa tîwona na maso etu wanyewe. 17 Kamana iye paapokerere swifa na utukufu ka Mwenyezimungu Baba wake, ofwe tikiwapo. Paasikire shauti ya utukufu pakulu ya Mwenyezimungu ikamba: “Eyu ndi Mwanangu wanimpenda pakulu. Niwa radi naye pakulu”, 18 ofwe wanyewe tisikira eyo shautiâyo kulawa mbinguni. Tisikira kamana pamwango takatifu, tíkiwa onse na Insa. 19 Visitoshe, tanawo uhakika pakulu kwa sababu ya habari zereziwe na minabii. Habariâzo vyema mutengemane konta ndi kamba nuru vyaimwarika pamahala pakwinukala. Ikusaidiyani mpaka suku yakuja Almasihi, na nuru yake ikuja kumwarika ngwê mmyoyo mwenu kamba ng’andu. 20 Kinu bora pakulu, ijiwani kuwa piya vibushuriwe mMandiko avilawire nkiswa mwa nabii mmojawapo. 21 Kamana avipo vibushuriwe kwa nafsi ya binadamu, ila Roho Takatifu ndi awalongoze wanadamu kusowera usemi ulawire ka Mwenyezimungu.