SAM 122

1 Naat aminu kundu Buyambam tapatane yotna buyambam gwene kuna ngang nanikingkat unekan gatake kuke musip gwaang siknga natapbumang. 2 Siwan Jerusalemu gwa kundoke itane daman gwen yapbike yoon saak yuamang. 3 Sike Jerusalem yot gapmane yot gwegwenu wesim wesim mitapbing. 4 Isreldane dongu Buyambam tapae gaak ininangge une kokaing. Tupa gata unzing tasiningge gwa yaniwi kekekakut. 5 Sike you wam yaya wagwekatangu kingu Devitdane dongune nanata undang yuke wamu natake papan nomatakaing. 6 Ginu tumuk wam yake Jerusalem nanata kwikwiknga yutningge yanong. Ginda anzing yanong, “Aminbamu Jerusalemde take siknga nataaingu take yutning,” ngang yanong. 7 Yake aminu damanda takumbasiwan Jerusalem patang banakan yutningu amaknga wena take yutningge tumuk wam yanong. Ngan, king kapaat gatu tupan aminu une nana ngangu take yutning. 8 Na notnaat gatu akgatangamukaing katde natake nata Jerusalemde anzing yawit, “Ga amaknga wena take yuyo,” ngang yawit. 9 Na Anutu, Buyambam tapanindane yotna buyambam gwende natanggamatake nata tumuk wam yawa you wanggapmatane sangabamu takekan yutning.