SAM 98

1 Ninda kau kayuu takngatu Buyambam tapae tainim. Dasingge, ita duya inata inata take siknga pasinggak. Pasike inane kekekngana buyambamu yuyuknga takwan takngane tasike ita amau ayapbikgak. 2 Buyambam tapata amak tasike yapbikutde gwa yakapbut. Yakapmake ita noman nomana tasike aminabamu gatuna sendeke pakut taknga yeuyaman aminu kepna kepna nana kuupbamda kaking. 3 Siakan, ita wamu ina yawan kekekakut takngae natake Isrel nana aminde butaya natayamuke dua kapekut. Dua kapewan aminu kepna kepna nana kuupbamda kawawa Anutuninda amau tasike yapbike ninu gatuna pakut. 4 Ginu aminu kepna kepna nanata kap taike Buyambam tapae apbaknganong! Siwan musip gwaang kap taike itane umana ayatangenatnong! 5 Yatangenake ginda gita tanguke kap taike Buyambam tapae umana aknga yatangenatnong. Yatangenake gita tanguwa gakngae take siknga siyok. 6 Siwan pum gatu benggo ngang puyake ayanggamatake Buyambamtapa king kapaninde apbaknganong. 7 Siwan nata nataau yanggabam gwenu gaat pis gatu sanga bamu gaatang yuaingu ginda kapzang yanggamataningge nataat. Siwan kepdaka, ga gatu sanga gaeatang yuaingu kuupbamda kap tainingge nataat. 8 Siwan yangga atzipmakaing kapaapa ginda aminda kataknga wesikaing binga wesiningge nataat. Sike ginu tawanu kuupbamda, ginda Anutue kaine kap taike asiknga baknganingge nataat. 9 Nata nataau Buyambam tapae kaine kap tainingge nataat. Dasingge? Ita apuke aminu kepna kepna nana kuupbam kot yake usanziwik. Usanzike aminu kuupbam noman takngane usanziwan siakan siknga siwik.