PSALMS 12

1 O Yawe, nanga sangaruko! Imi te kari ningo nuam bo ta me bagoso; se kariimet nongomang ningi nunguning mu mena tala. 2 Kariimet suen la nunga saki den kawel nunga manorsan; nuguring te den welang balsan, bare nongomang ningi kawel biya aniso. 3 Buta se Yawe, kariimet den welang kawel nuguring te aratuwoso mu nuguring kaloko! Ale kariimet nunumi patawu se anira mu betela nuguring kaloko! 4 Nuna balsan, “Anananga munak den te anapeya mel ko kuesan mu tanakkowo. Kari bo ta ana nagiring me kalokko; ana aguwaya balnakko mu am balnakko,” ma balsan. 5 Bare Yawe iwita balso, “Ani kariimet kituwura nunga bita maguwusan se nongota nunumi sangarmonko me terong, mu nunga niara kikira ikiem; ale aitak barasik ale kariimet memek mu nuguting te nunga giek ale nunga bituekko." 6 Se Yawe ko den mu nunguningta se nikim garagar, silver tom seven ko, tama kowar tamatama mu te kaisan ale palungursan se nikim kapawoso wore toroman. 7 Se Yawe, ana ikisan, ni kariimet memek mu nunga, nanga bitaru se pempem ningo la baganakko. 8 Tom kariimet kilek memek mu kilek ningo ko balsan ale nup patawusan, mu kari memek alo mu aratasan ale ali eresan ale nunumi patawu patawu geragasan.