Mukanda wa theti kwena Thimoti 1THIMOTI 1

1 Pholu, thumwa wa Kidisitu Yesu mu kitumu kya Nzambi, Muhuludi wetu, yi Kidisitu Yesu, kivuvu kyetu. 2 Kwena Thimoti mwana wama wa kyedika mu lukwikilu: khenda, kheni yi ngemba bituki kwena Nzambi, Tata, yi kwena Kidisitu Yesu, Pfumu wetu. 3 Bwosu yiÌkuhekila kikesa ha yiÌkala ku Masetwani, ni wanangina ku Efesu ndangu wabakandisa batu babana babati longa malongi ma luvunu, 4 amana balandikilaku bingana-ngana keti ndonga ya butuka yakonda tsuka yina yisi nata tendu hana henina kisalu kya Nzambi, kina kibati salama mu lukwikilu. 5 Kisina kya kukebisa meni kuna, kyenina zola dina dyisi tuka ku mbundu ya kasemi, ku katsatsa ka kasemi yi lukwikilu lwakonda bukavungalosi. 6 Ndambu ya batu bahika baÌtota, amana baÌditotisa mu mameni ma phamba. 7 Bazodi bakituka balongi ba mitsiku kaasi bisiku bakisa mana bisi zonza, keti mambu mamana bisi tambwasa kya makulu. 8 Eeh, tuzayibwa ni mitsiku myenina mya bukheti, yuka ni twasadilamya mu mutindu wuna wulungini; 9 Tuzayibwa phi ni mitsiku myaÌsalamaku kikuma kya mukwa masonga, kaasi kikuma kya bandwandwa yi bakolami, batu bambi yi basumuki, basafu yi bazangi, bahondi ba batata yi bahondi ba bamama, baba bisi honda batu, 10 bita-mbongi, bayakala bana bisi dinimbisa yi bakwawu bayakala, batu baba bisi sala kikhita kya bahika, bakwa bukamvi, batu baba bisiku zenga ndefi ya masonga yi mambu mahika mama misiku fwanana yi malongi ma kyedika, 11 malongi mafwanana yi Musamu wa Bukheti wa khembu ya Nzambi wa kyesi wuna kaÌpheka meni Pholu. 12 Yimuvutwadi matondu lawu Kidisitu Yesu Pfumu wetu wuna wuphekini ngolu. Mukuma waÌmbona ni walunga yenina; yi hana katsidini mu kisalu, 13 meni yandu yikala musafula theti, kumunyokuna yi kumutukwana. Kaasi yandi waÌngyukila kheni, mudyambu yikalaku zaya mambu yikala sala, kukonda kwa lukwikilu . 14 Amana khenda za Pfumu wetu zaÌbasa, hakimosi yi lukwikilu yi zola dina dyenina mwena Kidisitu Yesu. 15 Ndinga yayi yenina ya kyedika, bafweti tambwasaya: Kidisitu Yesu kiÌsa ha tsi yayi kikuma kya kuhulula basumuki; muna kati dya bawu, meni yenina wa mbi kuhyoka boosu. 16 Kaasi kikuma kya bwabuna, muna sipha dya mbundu waÌngyukila kheni, ndangu mwena meni, yenina wa mbi kuluta boosu, kuna thwala batu balanda mbandu ya meni, bakwikila mwena Kidisitu Yesu, ndangu babonga moya wa mvula yi mvula. 17 Amana kwena Kyamvu wa mvula yi mvula, wuna wisiku fwa, wuna wisiku monika, Nzambi mosi, kabonga luzitu yi lukumu mvula yi mvula! Abwabuna! 18 Kima yikutumi ngeyi mwana wama Thimoti, kituma meni kina kifwanani yi mbikutulu zina batekila samuna kikuma kya ngeyi; ndangu ha walaÌndilaza, wanwana muzingu wa bukheti, 19 wasimbidilaka lukwikilu lwaku yi katsatsa ka kasemi, kakana bakonda yukila batu bahika amana bamani totisa lukwikilu lwa bawu. 20 Mukati dya bawu thwenina yi Kimeni yi Lekizandi; babana yiÌbalambula kedi kwa Satana ndangu bazaya ni ka mboti ku mu kulewulaka Nzambi.