MIHANGU 26

1 Angidipha waÌzimbula kwena Pholu: «Tendula dyambu dyaku.» Hanga Pholu waÌthuta koku kuna zilu, amana waÌyandika mu kusamba: 2 «Mu kyesi yenina, kyamvu Angidipha, mu kusamba lelu ku thwala ya ngeyi kikuma kya mambu moosu mana bisi pfundila Bayuta, 3 mukuma wuzayimya bukheti, mikiku mya Bayuta yi phaka za bawu. Yikubokwadidi ni wangyuka yi sipha dya mbundu. 4 «Bayuta boosu bazayilwa luzingu lwama buna lwaÌkala tuka kileki; yi buna yiÌzingila tukidila luyandiku ha kati dya tsi yama, kuna Yelusalemi. 5 Banzayi tuka thama amana bafwani mu kuta kimbangi, yuka batyebwa, ni yiÌzingila hanga Mufwadisi, muna dingumba dina dyaÌkala yi nziki-nziki ya kulunda bunzambi bwetu kuluta batu boosu. 6 Amana, buthwena, babati tsambisa kikuma kivuvu kyama kyenina muna kilangi kina kaÌsila Nzambi kwena batata betu. 7 Kilangi kina bisi sila mbundu bikanda byetu kumi yi byodi, bisi sungamina phipha yi mwini ni kilangi kina kyaluÌngila. Kikuma kya kivuvu mekina, oh kyamvu, babati pfundila kwena Bayuta! 8 Kikuma kya biki lwisiku kwikidila ni Nzambi kisi futumuna bafwa? 9 Meni-meni yikala banza theti ni bwaÌfwana mu kunwanisa mu phila yosu khumbu ya Yesu mwisi Nazaleti. 10 Yibwana yiÌhanga ku Yelusalemi. YiÌkotisa mu boloku, meni-meni, bakwikidi lawu, muna hamu dina yiÌbonga kwena bambuta ba banganga Nzambi; amana tangwa bakala zola kubahonda, meni yikala hana mukhala wama. 11 Muna nzu za kimvuka za Bayuta zoosu, yikala hita mu kunyokuna bakwikidi ndangu balewula lukwikilu lwa bawu. Khabu za mukwandi zina yiÌkala zawu kikuma kya bawu, yikala banyokuna yi muna mbanza za kinzenza.» 12 «Yi bwabuna yikala kwendila ku Tamasi yi hamu yi muswa wuna baÌpheka bambuta ba banganga Nzambi. 13 Kilumbu kimosi, muna kati kya mwini, oh kyamvu, yiÌmona muna nzila, myesi mimosi myaÌtuka kuna zilu; mitsyenzya meni mina, mikenzudi hana yiÌkala meni hosu yi batu bana bakala kwenda tsindikila. Myakala kedyamina kuluta tangwa. 14 Betu boosu twabwa ha tsi, amana yiÌyuka ndinga yimosi yakala nzimbwala muna ndinga ya Bayuta: “Sawulu, Sawulu, kikuma kya biki wisi ndyokwanina? Phasi bwena kikuma kya ngeyi mu kutsitanana meni. Hanga kibulu bathumbikidi muhangu kwena pfumu wandi." 15 Meni mvutudini: “Nati wenina ngeyi Pfumu?” Pfumu wumvutwadi: “Meni, yenina Yesu wuna wubati nyokuna ngeyi. 16 Kaasi vumbuka, telama. Tala kikuma kina yikulubwakidini; yiÌtekilakusola mu kukala musadi yi mbangi wa mambu mana wumoni kwena meni yi kikuma kya mana yikuÌsongila hika. 17 YikuÌtanina ha kati dya kanda dyadi dya bayuta yi kwena Baphani kuna yikutumini meni. 18 Kikuma kya kubatemuna mesu, ndangu bakatuka mu phipha amana bisa ku mwini; bakatuka mu hamu dya Satana amana bisa kwena Nzambi. Amana yuka ni bakwiÌkila mwena meni, bataÌmbula ndoluka ya masumu ma bawu yi ndambu ya kuvwa ha kati dya bana baÌsolama."» 19 «Yi bwabuna, kyamvu Angidipha, yiÌkolamaku ku mbona mesu yina yaÌtuka ku zilu. 20 Kaasi kwena bisi Tamasi theti, yi ku Yelusalemi, yi muna Yuteya dyosu, yi kwena Baphakanu, yiÌsamuna ni bulungi basoba bikalulu amana bisa kwena Nzambi, yi mihangu mina mibati songila ni basobi bikalulu. 21 Yi kyakina kikuma baÌkhwatila Bayuta kuna nzu ya Nzambi, baÌmeka phi kuphondila. 22 Kaasi bwosu kaÌtsweka Nzambi, yiÌzingila yi kuna lelu dyadi amana mbati ta kimbangi ku thwala baleki yi bambuta, konda kuzimbula kima kyahika katula lwesi mana baÌsamuna bambikudi yi Moyize: 23 Kidisitu waÌfwana mu kunyokuka, amana waÌfwana kukala watheti mu kufutumuka ha kati dya bafwa, kaÌfwana mu kusamuna mwini kwena Bayuta yi Baphani.» 24 Bwosu kakala samba bwabuna, Fesitusi waÌkalunga: «Kilawu wenina, Pholu! Kulonguka kwa lawu kukukitudi kilawu!» 25 Pholu waÌvutula: «Yeku kilawu, mbuta-mutu Fesitusi; zenina ndinga za kyedika, za mupfunu phi zina yisi zimbula. 26 Kyamvu wuzayima yi tsikiningi mambu mana, amana yibatibwa muzimbwala yi singu dyosu. Mukuma khwikidini ni kazimbakaniku kima, kikuma moosu mana maÌhangaminaku mu kitsweki. 27 Kyamvu Angidipha, wisi kwikila mwena bambikudi? Nzayi mboti ni wisi kwikila mwena bawu!» 28 Angidipha waÌzimbula kwena Pholu: «Ka thama ku wakhwiÌkisa amana waÌkhitula mukidisitu!» 29 Pholu waÌvutula: «Kwasala tangwa dya khunda holo dya lawu, yizoÌla ni, yuka ni Nzambi katyabwa, hakalaku lwesi ngeyi kaasi yi boosu bana babati phinikina lelu, lwakituka bwosu yenina meni; katula lwesi miyololu myami.» 30 Hanga kyamvu Angidipha, pfumu wa kinzunga Fesitusi, Belenisi yi boosu bana baÌzakala kumosi yi bawu baÌtelama. 31 Mu kuyekuka, bakala dizimbwala bawu yi bawu: «Mutu wuna kahangiku kima kyamunatina lufwa kondilo boloku.» 32 Angidipha, kikuma kya yandi, waÌzimbula kwena Fesitusi: «Mutu wuna, bakhani muyambwadila, wadi kaÌlombikiku ni bamuzengila mukanu kwena Khayisala.»