YOWANI 13

1 Ku thwala ya mukinzi wa Phaki ya Bayuta, Yesu bwosu kaÌzaya ni tangwa dyandi dilungidini, dina kafweti katuka ha tsi yayi ndangu kenda kwena Tata, yandi watoma zola batu bandi babana baÌkala mu tsi; kaÌbazola yikuna tsuka. 2 Muna tangwa dina baÌkala mu kudya. Hana kiphidi-mutu wusi kedi dibanza dya kumulambula kuna mbundu ya Yutasi, mwana wa Simoni Sikadyoti; 3 Yesu, bwosu kaÌzaya ni Tata waÌhana byosu hana moku mandi; ni kwena Nzambi kaÌtuka, kwena Nzambi phi kavuÌtukisa, 4 muna tangwa dya kudya, waÌtelama, waÌwomuna muledi wandi wa thandu amana waÌdizitikila kitemba kimosi muna mbunda. 5 Kunima, waÌsya mamba hana dilonga amana waÌyandika mu kusukula malu ma balonguki bandi, yi kukumunakama yi kitemba kina kyaÌkala muna mbunda. 6 Buna kaÌtula kwena Simoni Phetelu, yandi Phetelu wumuzimbwadini: «Pfumu, ngeyi watsukula malu?» 7 Yesu wumuvutwadini: «Mana mbati hanga meni buthwena bwabu, ngeyi wubatimoku bakisa, kunima nana wazaÌyama.» 8 Phetelu wumuzimbwadini: «Loni, ketibwe watsukula malu.» Yesu wumuvutwadini: «Yuka ni yikusukudimoku, wakaÌlaku hika hakimosi yi meni.» 9 Simoni Phetelu wumuzimbwadini: «Yuka ni yibwabuna dyenina, Pfumu, tsukulaku lwesi malu, kaasi yi moku mama yi mutwa wama!» 10 Yesu wumuzimbwadini: «Mutu wuna wuyebidiki kedi lutu lwosu, keku yi mupfunu wa kudiyebisa, malu lwesi, wakasemi kenina yandi wosu. Benu phi ba kasemi lwenina, kaasi ka benu boosu ku.» 11 Kikuma Yesu waÌzaya kwandi keti nati wakhana mulambula, yihana kaÌzimbwala: «Ka benu boosu ku lwenina ba kasemi.» 12 Kunima dya kubasukula malu yi kuvwata miledi myandi, waÌvutuka ku mesa, amana wubazimbwadini: «Lubakudini kikuma kya dyambu dyadi yiluhangidini? 13 Benu lwisi thela ni “Mulongi” yi “Pfumu”, kyedika lwisi zonza, mukuma bwabuna yenina. 14 Amana yuka ni meni, Pfumu yi Mulongi yilusukudini malu, benu phi lufweti disukula malu, benu yi benu. 15 Mbandu yiluhekini, ndangu benu phi lwahanga bwosu buna phangini meni kikuma kya benu. 16 Mu kyedika yiluzimbwadibwa: musadi kahitiku pfumu wandi amana thumwa kahitiku wuna waÌmutuma. 17 Yuka ni luzayi bwabuna, kyesi lwenina kyawu, mboti bwakaÌla yuka ni lwahangabwa. 18 Nzonzidibwoku kikuma kya benu boosu. Meni nzayi bana yiÌsola. Kaasi bulungi ni malungila Masonuku mama: “Wuna wubati dya dipha dyama, wumbalukidini”. 19 Tukidila buthwena bwabu, yiluzimbwadibwa buna khaku dibwa kedi dyambu, ndangu ha dyakwisa bwa, lwakwikila ni “Meni yenina." 20 Mu kyedika, yiluzimbwadibwa: wuna wuyambini mutu wuna thumini meni, meni-meni kayambini. Amana wuna wungyambini, wuyambi phi wuna waÌthuma.» 21 Yesu buna kaÌzonza bwabuna, mabanza maÌmuvwalangana lawu, wuzimbudibwa wengele: «Mu kyedika mbati luzimbwala: mosi hana kati dya benu kandaÌmbula.» 22 Balonguki bakala ditala bawu yi bawu amana bakala dihyula keti kikuma kya nati kakala zonzila. 23 Mosi wa balonguki bandi, wuna kakala zola lawu Yesu, yekaminikini hana thulu ya Yesu. 24 Simoni Phetelu wumutekudini ndangu kamuhyula Yesu keti kikuma kya nati kakala zonzila bwabuna. 25 Hanga mulonguki wuna wuzenzamini hana thulu ya Yesu amana wumuzimbwadini: «Pfumu, nati yandina?» 26 Yesu wumuvutwadini: «Wuna yivuÌndikila meni-meni kitini kya dipha yi wuna yiheÌkadya.» Yesu waÌvundika kitini kya dipha, wubongikya amana wuhanikya kwena Yutasi, mwana wa Simoni Sikadyoti. 27 Yutasi, buna kaÌbonga kitini meni kina, hanga Satana wumukotidini. Yesu wumuzimbwadini: «Buna wenina bwawu mu kuhanga, hangabwa tswatsu!» 28 Keti mosi, hana kati dya babana baÌkala ku mesa, kaÌzayaku kikuma kina kaÌmuzimbwala bwabuna. 29 Yutasi, bwosu kakala sweka waba dya mbongu, ndambu ya batu baÌzaya ni Yesu kakala muzimbwala ni kasumba bima bina baÌkala byawu mupfunu kikuma kya mukinzi kondilo kenda hana lusadisu kwena baphutu. 30 Amana Yutasi waÌbonga kitini kya dipha mekina, waÌlubuka phi muna mbala mosi. Phipha kwaÌkala. 31 Buna kaÌlubuka Yutasi, Yesu wuzimbudini: «Buthwena Mwana wa mutu bamukembisini, Nzambi phi bamukembisini mwena yandi. 32 [Yuka ni Nzambi bamukembisa mwena yandi,] Nzambi phi kamuÌkembisa mwena yandi meni, ka thama ku kamuÌkembisa. 33 Bana bama, bilumbu bya khunda yenina byawu hika yi benu. LwatsaÌnda, amana bwosu yiÌzimbula kwena Bayuta: kuna mbati kwenda meni, benu lwalendakwoku kwisa, bwabuna phi nzimbudini kwena benu buthwena. 34 Mutsiku wa pha yiluhekini: zolanenu benu yi benu. Bulungi lwazolana phi benu yi benu, bwosu buna yiÌluzola meni. 35 Yuka ni lwazolanaka benu yi benu, batu boosu bazaÌya ni balonguki bama lwenina.» 36 Simoni Phetelu wumuzimbwadini: «Pfumu, wendi kubiki?» Yesu wumuvutwadini: «Wufwaniku wandanda kedi buthwena kuna mbati kwenda, wandaÌnda nana kilumbu.» 37 Phetelu wumuzimbwadini: «Pfumu, kikuma kya biki pfwaniku mu kukulandila buthwena? Yilenda mu kuhana luzingu lwama kikuma kya ngeyi!» 38 Yesu wumuvutwadini: «Walenda hana luzingu lwaku kikuma kya meni? Mu kyedika, mbati kuzimbwala: khoku kakoÌkulaku kedi, watsuÌwangana mbala tatu ni wunzayiku.»