YOWANI 8

1 Yesu wendi ku mongu wa miti mya Olive. 2 Kaasi muna suka, waÌvutuka ku nzu ya Nzambi amana batu boosu bisa kwena yandi. Buna kaÌzakala, waÌyandika mu kubalonga. 3 Hanga balongi ba mitsiku yi bafwadisi bisi nata mukhetu mosi wuna baÌkwata mu mbongi. Bamusini hana mbasi, 4 amana bazimbudi kwena Yesu: «Mulongi, tumukwatini mukhetu yandu mu kuta kwa mbongi. 5 Muna mitsiku mina kaÌtuheka Moyize, kaÌtuzimbwala ni bakhetu ba bwabuna, twabahondila ku matadi. Amana ngeyi bweti wuzimbudini?» 6 Bakala zimbula bwabuna mu kumuleya ndangu balenga mufundila. Kaasi Yesu waÌzenzama amana waÌyandika mu kusonika ku mulembu hana tsi. 7 Bwosu bakala muhyula-hyula, waÌvumbuka amana wubazimbwadini: «Wuna wakonda disumu hana kati dya benu, kayandika watheti mu kumutimbwala tadi.» 8 Yesu waÌzenzama hika amana waÌyandika mu kusonika hana tsi. 9 Tangwa baÌyuka bwabuna, baÌyandika mu kuyombuka mosi-mosi, tukidila kwena bambuta; amana haÌsala lwesi Yesu yi mukhetu meni wuna hana mbasi. 10 Hanga Yesu wuvumbukini amana wumuzimbwadini: «A mukhetu, kubiki benina bana bisi kufundaka? Heku mutu wukuzengidi ndola?» 11 Mukhetu wuvutudini: «Keti mutu loni Pfumu.» Yesu wumuzimbwadini: «Meni phi yikuzengidiku ndola. Ndawenda, amana wusumukaku hika.»] 12 Yesu wubazimbwadi hika: «Meni yenina mwini wa tsi. Wuna wisi ndanda, kakaÌngalaku mu phipha keti koma, kaasi kavwa mwini wa luzingu.» 13 Kuna bafwadisi yi kumuzimbwalaka: «Kimbangi kya ngeyi-meni wubati ditila; kimbangi kyaku kyeku kya kyedika.» 14 Yesu wubavutwadini: «Ata meni-meni mbati ditila kimbangi, kimbangi kyama kya kyedika kyenina; mukuma nzayini kuna yiÌtuka yi kuna mbati kwenda; benu luzayiku keti kuna yiÌtuka, keti kuna mbati kwenda. 15 Benu lwisi fundisa mu kimutu, meni yisiku fundisa mutu. 16 Amana wadi ni meni yifundisaka, wadi pfundusu yama ya kyedika yakala, mukuma yeku meni hika; thwenina meni yi Tata wuna waÌthuma. 17 Muna mitsiku myenu, baÌsonika ni kimbangi kya batu boodi kyenina kya kyedika. 18 Meni mbati ta kimbangi kya meni-meni, amana Tata wuna waÌthuma, kabati thila phi kimbangi.» 19 Hanga bamuhyudini: «Kubiki kenina Tata waku?» Yesu wubavutwadini: «Benu lunzayiku meni, keti Tata wama. Wadi lwanzayaka, wadi lukhani muzaya phi Tata wama.» 20 Ndaka zina, kaÌzonzilaza muna mukunzu wuna bakala swekila mbongu za bimenga, kuna yi kulongaka muna nzu ya Nzambi; Amana keti mutu waÌfwana mu kumukwata kikuma tangwa dyandi dyaÌfwanaku kedi. 21 Yesu waÌbazimbwala hika: «Meni yendini; benu lwatsaÌnda; amana lwafwa mu disumu dyenu. Kuna yendini meni, benu lwaleÌndakwoku mu kukwisa.» 22 Bayuta bazimbudini: «KadiÌhonda yandi-meni, hahana kazonzidini: Kuna, yendini meni, benu lwalendakwoku mu kukwisa?» 23 Yesu kakala bazimbwala: «Benu lwenina batu ba ha tsi, meni yenina wa ku zilu. Benu lwenina batu ba ha tsi yayi, meni yeku mutu wa ha tsi yayi. 24 Yihana yiÌluzimbwadiki ni lwafwa mu masumu menu. Kikuma yuka ni lukwikidiku ni “meni yenina”, lwafwa muna masumu menu.» 25 Bawu bamuhyudini: «Ngeyi nani wenina?» Yesu wubavutwadini: «Kina yisi luzimbwala tukidila ku luyandiku. 26 Mambu ma lawu yenina mawu kikuma kya benu, mu kuluzimbwala yi mu kufundisa. Kaasi wuna waÌthuma kenina kyedika; amana meni yisi zimbula kwena batu ba tsi kaka mana yiÌyuka kwena yandi.» 27 Bawu baÌzayaku ni kikuma kya Tata kakala bazonzila kwena bawu. 28 Hanga Yesu wubazimbwadi hika: «Tangwa lwamuÌtombula Mwana wa mutu, lwazaÌya ni meni yenina; lwaÌzaya phi ni yisiku hanga kima mu phila ya meni-meni, yisi zonza kaka mambu mana kaÌndonga Tata. 29 Wuna waÌthuma kenina hakimosi yi meni, katsisaku buhika; kikuma yisi hanga kaka mambu mana misi muheka, yandi, kyesi.» 30 Bwosu kakala zimbula Yesu bwabuna, balawu baÌkwikila mwena yandi. 31 Hanga Yesu wuzimbudini kwena Bayuta babana baÌkwikila mwena yandi: «Yuka ni lwazingilaka mu ndinga zama; mu kyedika balonguki bama lwenina; 32 Bwabuna lwazaÌya kyedika amana kyedika kyaluÌlubula mu kihika.» 33 Bamuvutwadini: «Thwenina batekulu ba Bulahami; amana khaniku kedi tukala bahika ba mutu. Abweti wufweti tuzimbwala: “LwaluÌbuka mu kihika?"» 34 Yesu wubavutwadini: «Yibatibwa luzimbwala, mu kyedika: mutu wosu wuna wisi hola disumu kenina muhika wa disumu. 35 Kinga muhika kisiku nangina mu nzu mu kimakulu; kaasi mwana kisimwa zingila mu kimakulu. 36 Yuka ni Mwana kalulubula mu kihika, mu kyedika, lwakiÌtuka batu ba kiphwanza. 37 Nzayibwa ni batekulu ba Bulahami lwenina; kaasi lubati sanda ni lwaphonda, kikuma ndinga yama yisiku lutwa. 38 Meni yisi zimbula mana yiÌmona kwena Tata, amana benu phi hangenu mana lwaÌyuka kwena tata wenu .» 39 Bamuvutwadini: «Bulahami wenina tata wetu.» Yesu wubazimbwadini: «Wadi ni lwakala bana ba Bulahami, wadi lufweti hanga mihangu mya Bulahami. 40 Kaasi buthwena bwabu, lubati sanda ni lwaphonda, meni mutu yiluzimbwadini kyedika kina yiÌyuka kwena Nzambi. Bulahami kaÌhangaku buna. 41 Benu lwisi hanga mihangu mya tata wenu.» Bawu bamuvutwadini: «Twabutukilaku mu kindumba; thwenina yi Tata mosi, Nzambi.» 42 Yesu wubazimbwadini: «Wadi ni Nzambi kaÌkala Tata wenu, wadi lwisi nzola, mukuma kwena Nzambi yiÌlubwakila meni, kwakuna phi yiÌtuka. Yidiyisilaku meni-meni, kaasi yandi waÌthuma. 43 Kikuma kya biki lwisiku bakwala nzonzidi yama? Kikuma lwisiku lenda kuyuka ndinga yama. 44 Benu lwenina yi tata wenu kiphidi-mutu amana lwisi zola kuhanga buna kisi zola tata wenu. Tukidila ku luyandiku, yandi, muhondi wa batu kisi kala. Kisiku zingila mu kyedika; kikuma mwena yandi mwakonda kyedika. Yuka ni kata bukamvi, mambu ma yandi meni kisi zonzila, mukuma kenina yandi mutu mosi kingumba yi tata wandi. 45 Amana meni, lwisiku khwikila kikuma kyedika yisi zonza. 46 Nati hana kati dya benu wufwani mu kuthendisa mu mambu matadidini disumu? Yuka mbati zonza kyedika, kikuma kya biki lwisiku khwikidila? 47 Wuna wenina wa Nzambi, kisi yuka ndaka za Nzambi; kima lwisiku yukila benu, kikuma lweku ba Nzambi.» 48 Bayuta bavutudini kwena Yesu: «Kyedika twazimbulabwoku bwabuna ni ngeyi mwisi Samadiya wenina, amana kitembu kya mbi wenina kyawu?» 49 Yesu wubavutwadini: «Meni yeku yi kitembu kyambi, kaasi Tata wama yisi zitisa, amana benu lwisa ndewulaka. 50 Meni yisiku sanda khembu lwa meni-meni, henina yi mosi wisiya sanda, amana yandi wisi fundisa. 51 Mu kyedika, yiluzimwadibwa, yuka ni mutu kalunda ndinga zama, lufwa kamoÌnalwoku mu kimakulu.» 52 Amana Bayuta bamuzimbwadini: «Buthwena tuzayi ni kitembu kyambi wenina kyawu! Bulahami wafwa; bambikudi phi bafwa; amana ngeyi wubati zimbula: “Ho mutu kalema ndinga yama, lufwa kayedikalwoku mu kimakulu." 53 Ngeyi wubanzini ni wuluti tata wetu Bulahami wuna wafwa? Bambikudi phi bafwa. Nati wisi dikitula ngeyi?» 54 Yesu wuvutudini: «Yuka ni meni-meni yibati dikembisa, khembu yama yeku mupfunu. Tata wama wisi khembisa, yandi wuna lwisi zimbula benu: “Nzambi wa betu kenina!" 55 Amana lumuzayiku. Meni yimuzayini; amana ho yizimbula ni yimuzayiku, yikiÌtuka mukwa luvunu hanga benu. Kaasi yimuzayini amana yisi lema ndinga yandi. 56 Tata wenu Bulahami kyesi lawu kaÌyuka kikuma kya kumona kilumbu kyama; waÌmonakya amana waÌsangwala.» 57 Bayuta bamuzimbwadini: «Khaku kedi wulungisa keti mvula makumatanu, amana waÌmumona Bulahami?» 58 Yesu wubazimbwadini: «Mu kyedika yibati luzimbwala: ku thwala kubutuka kwa Bulahami, “meni yenina”» 59 Hanga batongunini matadi ndangu bamuta; kaasi Yesu waÌdisweka amana waÌlubuka mu nzu ya Nzambi.