MATHAYI 22

1 Yesu waÌzonzila hika mu bingana; wuzimbudi: 2 «Kipfumu kya mazilu kifwanakani yi kyamvu mosi waÌta mukinzi wa longu lwa mwana wandi wa yakala. 3 Amana waÌtuma basadi bandi benda tela batu bana kaÌtedisa ku mukinzi wa longu; kaasi baÌzolaku kukwisa. 4 WaÌtuma hika basadi bakwawu, mu kuzimbula: “Zimbulenu kwena bana thedisiki: Tala, ngidiki kedi madya mama, miluma mya bangombi yi bambisi bahika ba senga babahondi, byosu byayilama; alwisenu ku mukinzi wa longu!" 5 Kaasi bawu baÌlewula, benda kwabawu, mosi wenda ku kilanga kyandi, mukwawu wenda ku kikhita kyandi; 6 amana bakwawu, baÌbakwata basadi bandi, baÌbatukwana, amana baÌbahonda. 7 Kyamvu waÌyuka khabu: amana buna kaÌtuma baphumbulu bandi, waÌhondisa bandwandwa bana yi mbanza ya bawu phi waÌyokisaya. 8 Hanga wuzimbudi kwena basadi bandi: “Mukinzi wa longu wuyilami, kaasi batu babana baÌtedisa baÌkalaku kwatakani kikuma kya wawu. 9 Hangenu lwenda muna phambu za nzila, amana tedisenu, ku mukinzi wa longu, boosu bana lwawaÌna." 10 Buna baÌlubuka basadi bana mu nzila, baÌkutikisa batu boosu bana baÌwana, ba mbi yi ba mboti; nzu ya mukinzi yaÌbasa yi batu. 11 Amana buna kaÌkota kyamvu mu kutala batu bana kaÌtedisa, waÌmona mwamuna mutu mosi wakonda vwata muledi wa mukinzi wa longu. 12 Amana wumuzimbwadi: “Mukwetu, abweti wukotidi mwamu konda muledi wa mukinzi wa longu?” Kaasi yandi kaÌmonaku kima kya kuvutula. 13 Hanga kyamvu wuzimbudi kwena basadi: “Mukasenu moku yi malu, amana mulosenu ku nzila kwena phipha; kwakuna kwakaÌla bidilu yi makwenzi." 14 Mukuma balawu baÌtela, kaasi bakhunda baÌsolama.» 15 Hanga bafwadisi bendi kasa kifwandu, bamuleya ndangu bamukwatila mu ndinga. 16 Amana batumini balonguki ba bawu kwena yandi ha kimosi yi ndambu ya batu bana bakala landa Helodi, mu kuzimbula: «Mulongi, tuzayi ni kyedika wisi zonza ngeyi amana wisi longa nzila ya Nzambi mu masonga. Weku yi bweya bwa mambu mana bisi banza batu mukuma wisiku tala mbunzu za batu. 17 Tuzimbwaleti si buna wisi banza ngeyi: bulombi mu kufuta phaku ya Khayisala ho loni?» 18 Kaasi Yesu, bwosu kaÌzaya mabanza ma bawu ma mbi; wuzimbudi: «Kikuma kya biki lubati ndeyila, bakavungalosi? 19 Tsongilenu mbongu zina bisi futa phaku.» Bawu baÌmusongila fwalanga dimosi, 20 amana waÌbahyula: «Mbunzu yi khumbu yayi baÌsonika haka, bya nati?» 21 Bamuzimbwadini: «Bya Khayisala». Hanga wubazimbwadi: «Disongidila, hanenu mambu ma Khayisala kwena Khayisala, amana mambu ma Nzambi kwena Nzambi.» 22 Buna baÌyuka bwabuna, baÌyituka, amana baÌmusisa, benda kwa bawu. 23 Muna kilumbu meni kina, ndambu ya Basadise, bana bisi zimbula ni kweku lufutumuku, baÌbwesuka kwena yandi, amana baÌmuhyula 24 mu kuzimbula: «Mulongi, Moyize kaÌzimbula: “Yuka ni mutu mosi kafwa konda kubuta mwana, myaki wandi kafweti kwela mufwidi ndangu katombula kikanda kya phangi wandi." 25 Kinga, kwaÌkala kwena betu, yi baphangi ba bayakala tsambwadi; amana watheti waÌkwela, waÌfwa; amana konda kusisa dibuta, waÌsisa mufwidi wandi kwena myaki wandi. 26 Busalami phila mosi kwena wuna wazodi, yi watatu, yi kuna kwa wuna watsambwadi. 27 Amana kunima dya bawu boosu, mukhetu waÌfwa. 28 Mu kilumbu kya lufutumuku, mukhetu wa nani kakala, ha kati dya bawu tsambwadi? Mukuma boosu baÌmukwela!» 29 Amana mu kuvutula, Yesu wubazimbwadi: «Luditotisi kikuma lwisiku bakisa keti Masonuku keti ngolu za Nzambi. 30 Mukuma, ku lufutumuku lwa bafwa kwakaÌlaku yi bayakala keti bakhetu bakweÌlana, kaasi bakala hanga banzyo mu zilu. 31 Amana kikuma kya lufutumuku lwa bafwa, lwaÌtangaku mana baÌluzimbwala kwena Nzambi: 32 “Meni yena Nzambi wa Bulahami yi Nzambi wa Yizaki yi Nzambi wa Yakobi”? Keku Nzambi wa bafwa kaasi wa bana ba moya.» 33 Amana buna baÌyuka bwana, milumba-lumba mya batu baÌyituka lawu ku malongi mandi. 34 Buna baÌyuka Bafwadisi ni Yesu waÌbatsukisa Basadise, baÌkutakana. 35 Amana mosi hana kati dya bawu, mulongi wa mitsiku, kakala muleya mu kumuhyula: 36 «Mulongi, khi wawu mutsiku wa mbuta mu mitsiku?» 37 Yandi wumuvutwadi: «“WatoÌnda Pfumu Nzambi waku yi mbundu yaku yosu, yi moya waku wosu yi ngangu zaku zoosu." 38 Wawu wenina mutsiku wa mbuta yi watheti. 39 Amana mutsiku wa zodi, phila mosi yi wuna wa theti: “Tonda khunda waku hanga ngeyi meni." 40 Mitsiku myami myodi mivungi mitsiku yi Bambikudi.» 41 Bwosu baÌkutakana Bafwadisi, Yesu waÌbahyula 42 mu kuzimbula: «Biki lwisi banza kikuma kya Kidisitu? Mwana wa nati kenina?» Bamuvutwadini: «Wa Tavidi.» 43 Yandi wubazimbwadi: «Abweti si Tavidi, mu Kitembu kisi mutela ni Pfumu, tangwa kisi zimbula:» 44 “Pfumu kaÌzimbula kwena Pfumu wama”: Sikuka ku kitata kyama, yi kuna yibaÌsila bambeni baku ku sina dya bitambi byaku." 45 «Disonga yuka ni Tavidi kisi mutela “Pfumu”, abweti kakadila mwana wandi?» 46 Amana ka mutu ku walenda kumuvutwala ndinga mosi. Tuka kilumbu meni kina, ka mutu ku waÌmeka hika kumuhyula kyufu.