MATHAYI 27

1 Kuma buna kwakhya, lukutakanu lwaÌsalama, bambuta ba banganga Nzambi boosu yi bambuta Bayuta baÌkasa fwongu kikuma kya Yesu ndangu bamuhondisa. 2 Amana buna baÌmukasa, baÌmunata, baÌmulambula kwena Philatu, kilolu mwisi Loma. 3 Hanga buna kaÌmona Yutasi, wuna waÌmulambula, ni bamuzengidi lufwa, waÌzosuluka, waÌvutula makuta makumatatu kwena bambuta ba banganga Nzambi yi bambuta ba Bayuta. 4 Wubazimbwadi: «Tsumuki mu kulambula menga ma mutu wakonda sala mbi.» Bawu bazimbudi: «Khi mambu ngeyi yi betu! Makutadi ngeyi meni!» 5 Amana buna kaÌlosa makuta meni mana muna nzu ya Nzambi, wenda, amana waÌdikudika. 6 Bambuta ba banganga Nzambi buna baÌtonguna makuta meni mana, bazimbudi: «Bulombiku kutimbulama mu sanduku dya nzu ya Nzambi, kikuma thalu ya menga.» 7 Lukutakanu buna lwaÌsalama, makuta mana baÌsumbilama kilanga kya mutu wuna wakala bumba nzungu za tuma, kikuma kya mazyamu ma banzenza. 8 Ihana baÌtedilakya, «Kilanga kya menga» yi lelu dyadi. 9 Hanga malungidi mana maÌzonzama mu nzila ya mbikudi Yelemiya: «BaÌbonga makuta makumatatu, yena thalu yina baÌzenga bana ba Kiseledi kikuma kya yandi; 10 Hanga bahanima kikuma kya kilanga kya wuna wisi bumba nzungu, bwosu kaÌtsilabwa yandi meni Pfumu.» 11 Yesu buna kaÌkala ku thwala ya Philatu, hanga wumuhyudi: «Ngeyi, kyamvu wa Bayuta wena?» Amana Yesu wuvutudi: «Ngeyi meni wuzimbudibwa.» 12 Kaasi mu tangwa dina bakala mufunda kwena bambuta ba banganga Nzambi yi bambuta ba Bayuta, Yesu kaÌvutulaku kima. 13 Hanga Philatu wumuzimbwadi: «Wubatiku yuka mambu moosu mana babati zonza kikuma kya ngeyi?» 14 Kaasi kaÌvutulaku ndinga keti mu dyambu dimosi, hanga Philatu yituki lawu. 15 Bwosu bwaÌkala mu mukinzi wosu, Philatu kakala yambwadila mutu wa boloku mosi kikuma kya mulumba-lumba wa batu, wosu wuna bakala lomba. 16 Kinga, muna tangwa dina, kwaÌkala yi mutu wa boloku mosi watoma zayakana, khumbu yandi [Yesu] Balabasi. 17 Bwosu baÌkala bakutakana, hanga Philatu wubahyudi: «Nati luzodi yiluyambwadila, [Yesu] Balabasi ho Yesu yandi bisi tela Kidisitu?» 18 Mukuma waÌzaya kwandi ni kikuma kya kiphala baÌmulambwala. 19 Amana buna kaÌzakala ha kiti kya nganda, mukhetu wandi wumutumini ndinga: «Wukotaku mambu ma mutu wa masonga wuna, mukuma lelu, phasi lawu mboni mu ndosi, kikuma kya yandi.» 20 Bambuta ba banganga Nzambi yi bambuta ba Bayuta baÌlwengisa milumba-lumba mya batu ndangu balomba Balabasi, amana baÌmuhondisa Yesu. 21 Amana mu kuvutula, Philatu wubahyudi: «Nati, mu kati dya bawu bodi luzodi ni yiluyambwadila?» Bawu bavutudi: «Balabasi!» 22 Philatu waÌbazimbwala: «Abweti si yimuÌhanga Yesu yandi bisi tela Kidisitu?» Boosu bavutudi: «Mukhoka ha kitakani!» 23 Yandi waÌvutwakila: «Kikuma kya khi mbi kasadi?» Kaasi bawu baÌyandika kukalunga ngolu mu kuzimbula: «Bamukhoka ha kitakani.» 24 Amana Philatu buna kaÌmona ni heku kima kahanga, kaasi bwosu yaÌlutakana mvwalangani, hanga wubongi mamba, waÌsukula moku kuna thwala ya mulumba-lumba wa batu, mu kuzonza: «Nzayiku dyambu ditadidi menga mama; benu, malutadi benu-benu!» 25 Amana mu kuvutula, batu boosu baÌzimbula: «Menga mandi makala hana thandu ya betu yi bana betu!» 26 Hanga wubalubwadi Balabasi; amana Yesu buna kamubetisa fimbu, wumulambudi ndangu bamukhoka ha kitakani. 27 Hanga baphumbulu ba Philatu bamubulumuni Yesu yi muna nganda ya yandi Philatu, amana baÌkhokika kibuka kya baphumbulu. 28 BaÌmuwomuna miledi, baÌmuvwatisa muzaka wumosi wa kabengi. 29 BaÌtunga mukhonzi wumosi wa tsaku, baÌmuvwatisaya kuna mutwa yi muswangina kuna koku dya kitata, amana, bwosu baÌfukama ku thwala ya yandi, bakala museya mu kuzimbula: «Mboti, kyamvu wa Bayuta!» 30 Bakala muhuma metya baÌbonga muswangina amana beka muzyatula muna mutwa. 31 Kunima dya kumuseya, baÌmukatulawa muzaka wuna, baÌmuvwatisa hika miledi myandi, amana baÌmunata ndangu benda mukhoka ha kitakani. 32 Mu kulubuka, baÌtundakana mutu mosi, mwisi Sileni, khumbu yandi Simoni; hanga bamulundiki ndangu kanata kitakani kya Yesu. 33 BaÌtula homa hana bisi tela ni Ngolungota, disongidila: «Kizika kya Kibelengenzi kya mutwa.» 34 Bamuheki kunwa vinu dya kubundikisa yi kisi dya khadi; buna kaÌyedika, kaÌzolaku kunwa. 35 Kunima dya kumukhoka ha kitakani, baphumbulu baÌkabana miledi myandi mu kubetilamya zeki. 36 Kunima, baÌzakala hahana mu kumutanikina. 37 Amana baÌthetika hana thandu ya mutwa wandi bisona bina byaÌkala tendula kikuma kya lufwa lwandi: «Yandu kenina Yesu, kyamvu wa Bayuta.» 38 Hanga bakhokini hana kitakani bandwandwa bodi ha kimosi yi yandi, mosi ku koku dya kitata, mukwawu ku koku dya kimama. 39 Bana baÌkala mu kuluta, baÌkala mutukwana yi kunikisaka mutwa mya bawu; 40 amana bazimbudi: «Ngeyi wakala zimbula ni wawuÌlumuna nzu ya Nzambi amana mu bilumbu bitatu watuÌngululaya, dihulula ngeyi meni, yuka ni Mwana wa Nzambi wenina, amana tuluka ha kitakani!» 41 Phila mosi phi bambuta ba banganga Nzambi yi balongi ba mitsiku yi bambuta ba Bayuta bakala museya yi kuzonzaka: 42 «Batu bahika kakala hulula, kafwaniku kudihulula yandi meni! Kyamvu wa Kiseledi kenina: katuluka buthwena bwabu ha kitakani amana twakwikila mwena yandi. 43 Kakala dihana kwena Nzambi, buthwena, kamuhulula yuka ni kisi muzola; mukuma kakala zimbula: “Mwana wa Nzambi yenina”!» 44 Amana phila mosi yi bandwandwa bana baÌmukhoka bawu ha kitakani baÌkala mutukwana. 45 Tuka tangwa dya tsinzi, phipha yaÌbwa mu tsi yina yosu tii yi kuna tangwa dya tatu dya masikidika. 46 Amana bela-bela yi tangwa tatu dya masikidika, Yesu waÌkalunga mu ndinga ya ngolu: «Diya, Diya, lema sabakatani?» Disongidila: «Nzambi wama, Nzambi wama, kikuma kya biki wungyambwadidi?» 47 Amana bahika, mu kati dya bana baÌkala hakana, buna baÌyuka, bazimbudi: «Diya, kabati tela yandu.» 48 Mosi muna kati dya bawu, wenda thinu, waÌbonga kitini kya dinyuka, waÌvundikikya muna vinu dya ngani, amana waÌkasadya ku miti, kamuheka yandi ndangu kanwa. 49 Kaasi bahika bakala zimbula: «Yambulenu, twatala kamba Diya kakwisa muhulula hahana!» 50 Amana Yesu waÌkalunga hika mu ndinga ya ngolu, waÌtabula moya. 51 Kutala muledi wa zitu wuna wakala kabisa kizika kyahedila yi kina kyaÌkala kyahedila lawu mu nzu ya Nzambi wuyatukini mu byati byodi tuka ku londi yi kuna banda. Amana mafu maÌnikana, matadi phi maÌyatuka , 52 mazyamu maÌsabuka, bamvumbi ba lawu ba batu ba Nzambi baÌfutumuka. 53 BaÌlubuka mu mazyamu, kunima dya lufutumuku lwa Yesu, baÌkota mu Yelusalemi, mbanza yatoma amana baÌdimonikisa kwena batu ba lawu. 54 Satudiyoni yi bana bakala kengila bawu Yesu, buna baÌmona ni mafu manikani yi mambu mana maÌluta; baÌyuka bweya bwa lawu, bazimbudi: «Mu kyedika, yandu Mwana wa Nzambi kaÌkadi!» 55 Amana haÌkala hakana bakhetu balawu, babana baÌmusindikila Yesu tukidila ku Ngadidi mu kumusadila, bakala tala kuna kyana. 56 Ha kati dya bawu, haÌkala Madiya mwisi Makatala yi Madiya ngudi wa Zyaki yi Yozefu yi ngudi wa bana ba Zebeteya. 57 Masikidika ha maÌbwa, wisa tula mvwama mosi, mwisi Adimate, khumbu yandi Yozefu, wuna waÌkala phi mulonguki wa Yesu. 58 Wenda kwena Philatu, waÌlomba lutu lwa Yesu. Hanga Philatu waÌhana muswa ni bamuhekalwa. 59 Amana Yozefu waÌbonga lutu lwa Yesu, waÌvungalwa ha muledi wa pha , 60 waÌsikulalwa muna mazyamu mandi ma pha mana kaÌsima muna ditadi, amana buna kaÌbundumuna kalunga tadi ku mwelu wa mazyamu, wenda kwandi. 61 Madiya mwisi Makatala yi Madiya wuna mukwawu, hana baÌkala, bazakala kuna thwala ya mazyamu. 62 Kilumbu kyalanda kifwani. KyaÌkala ku manima ma kilumbu kina bakala yidikila sabata, bambuta ba banganga Nzambi yi Bafwadisi baÌkutakana kuna nzu ya Philatu 63 mu kuzimbula: «Mbuta-mutu, tubati bambuka ni mukwa bukamvi wuna, buna kaÌkala wa moya, kaÌzimbula: “Kunima bilumbu bitatu, yifuÌtumuka." 64 Disongidila ni senda bakengidila mboti-mboti mazyamu yi kuna kilumbu kya tatu, kondi lo, balonguki bandi bisa muyiba nana. Hanga bahuna kwena batu: “Wufutumuki ku bafwa.” Holoni, bukamvi bwabu bwa tsuka bwaluÌta buna bwa theti.» 65 Philatu wubazimbwadi: «Talenu baba baphumbulu; ba kitshinzidi. Alwendenu, kengidilenu mboti-mboti mazyamu bwosu luzodidi.» 66 Hanga bendi, mu kukengila mboti-mboti, basya kidimbu kuna tadi dina dyaÌkala fidinga mazyamu amana baÌsisa batsinzidi.