Nabi Mike Sora 3

1 N bata a fala, n naxa, “Yaxuba bɔnsɔn mangane Isirayila bɔnsɔn kuntigine, ɛ tuli mati iki! Ɛ tan xa mi lan ɛ sariyan kolon ba? 2 Fe faɲin naɲaxu ɛ tan naxanye ma, a ɲaxin yi rafan ɛ ma, ɛ muxune kidin nun e suben bama e ma han e xɔnna. 3 Ɛ n ma yamaan suben donma, ɛ yi e kidin ba, ɛ yi e xɔnne yigira, ɛ yi e yisɛgɛ alo suben naxan sama tunden kui." 4 Nanara, mangane na gbelegbele Alatala ra, a mi e yabima. A yɛtagin luxunma nɛn e ma na waxatini, e kɛwali ɲaxine fe ra. 5 Alatala ito nan falaxi lan nabine fe ma naxanye n ma yamaan nalɔma ayi, a naxa, “Donseen nɛma e dɛ, e muxune xibaruma bɔɲɛ xunbenla nan na. Koni xa naxanye mi e kima donseni e yɛngɛn nan nakelima ne ma. 6 Nanara, kɔɛɛn soma nɛn ɛ ma ɛ mi fa fe toon tima alo xiyena, dimin yi so, fe yo mi fa makɛnɛnma ɛ xa. Sogen birama nɛn na nabine mabinni, kɛnɛnna yi findi dimin na e xa." 7 Sayibane yagima nɛn e nun naxanye birin waliyiya falane tima. Ne e yɛtagine luxunma nɛn yagini amasɔtɔ Ala mi e yabima. 8 Koni n tan, n lugoxi sɛnbɛn na e nun Alatalaa Nii Sariɲanxin nun kiti sa kɛndɛn nun fangana alogo n xa Yaxuba bɔnsɔnna Ala matandine yita a ra e nun Isirayila bɔnsɔnna yulubina. 9 Nayi, ɛ tuli mati ito ra, Yaxuba bɔnsɔn mangane, ɛ tan Isirayila bɔnsɔn kuntigine, kiti kɛndɛn naɲaxu ɛ tan naxanye ma ɛ yi fe faɲine birin yifu, 10 ɛ tan naxanye Siyon taan tima wunli, ɛ yi Yerusalɛn ti gbaloni. 11 Mɛn mangane kitin sama, e dimi yi seen nasuxu mayifuni. Mɛn saraxaraline xaranna tima, alogo e xa e saren sɔtɔ. Mɛn nabine fe famatɔne xibarune falama, alogo e xa gbetin sɔtɔ. Anu, e mɔn fa e diganma Alatala yi, e susu a falɛ, e naxa, “Alatala mi en tagi ba? Tɔrɔ yo mi fama en ma." 12 Nanara, ɛ tan ma fe ra, Siyon taani buxama nɛn alo xɛɛna, Yerusalɛn findima nɛn taa xɔnna ra. Ala Batu Banxin tixi geyaan naxan ma, na findima nɛn fɔtɔnna yire matexin na.