Yaburin Sora 116

1 N bata Alatala xanu amasɔtɔ a n ma maxandi xuiin namɛma. 2 N na a xili waxati yo yi, a a tuli matiyɛ n na. 3 Sayaan gbalon bata yi n nabilin nun, n bata yi maso gaburun na nun, gaxun nun kuisanna bata yi n li nun, 4 n yi Alatala maxandi a xinla ra, n naxa, “Alatala, n nakisi!" 5 Alatala diɲa, a tinxin. En ma Ala kininkinin han! 6 Alatala muxu bɔɲɛ fixɛne nan natangama. N sɛnbɛn bata yi ɲan, a yi n nakisi. 7 N bɔɲɛn xa xunbeli, amasɔtɔ Alatala bata fe faɲin liga n xa. 8 Ala bata n niin natanga sayaan ma. A bata n yɛɛgen fitan n yɛtagi. A mi tinxi n bira. 9 N sigan tima nɛn Alatala yɛtagi dunuɲa yi. 10 N dɛnkɛlɛyaxi, nanara n yi falan ti, n naxa, “N tɔrɔxi ki faɲi!" 11 N yi gaxuni waxatin naxan yi, n yi a fala, n naxa, “Adamadiine birin wule!" 12 N fa nanse soma Alatala yii lan na fe faɲine birin ma a bata naxanye liga n xa? 13 N minse saraxan bama nɛn a xa a marakisina fe ra n yi Alatala maxandi a xinla ra. 14 N nan n dɛ xuine rakamalima nɛn yamaan birin yɛɛ xɔri n naxanye tongo Alatala xa. 15 Alatalaa tɔgɔndiya muxuna nde na faxa na a tɔrɔma nɛn han! 16 Alatala, i ya walikɛɛn nan n na, i ya walikɛ ɲaxanla naxan barixi. I bata n naxɔrɔya. 17 N barika bira saraxan bama i xa nɛn n yi Alatala maxandi a xinla ra. 18 N nan n dɛ xuine rakamalima nɛn yamaan birin yɛɛ xɔri n naxanye tongo Alatala xa, 19 Alatalaa banxin tanden ma, Yerusalɛn taani. Tantunna Alatala xa!