Yaburin Sora 72

1 Sulemani gbeena. Ala, mangan xaran i ya kitisa kɛndɛn na. I ya tinxinyaan yita n tan mangana diin na. 2 Nanara, a i ya yamaan makitɛ tinxinni. A sariya kɛndɛn sa yiigelitɔne xa. 3 Ala xa bɔxɔn nasabati yamaan xa. Ala xa tinxinyaan sabati yamanani. 4 Mangan xa sariya kɛndɛn sa yiigelitɔne xa. A xa tɔrɔ muxune diine rakisi, a yi e yɛngɛfane rayensenɲɛ ayi. 5 I ya mangayaan xa magaxu ayi han mamandenne mamandenne fanni sogen tema fanni kiken mɔn dɛgɛma. 6 Mangan fanna xa liga alo tulena xɛɛne ma, a xa liga alo tule igen nɛɛn fɛ bɔxɔn ma. 7 Tinxin muxune xa sabati mangan waxatini. Ala xa hɛri gbeen fi fanni kiken dɛgɛma. 8 A mangayaan gboma ayi nɛn sa fɔlɔ sogeteden na han sa dɔxɔ sogegododen na. Fɔlɔ Efirati baan ma han sa dɔxɔ bɔxɔn danna ra. 9 Naxanye wulani ne e xinbi sinma a bun ma nɛn. A yaxune e sama bɔxɔn ma nɛn a bun ma. 10 Tarasisi mangane fama kiseene ra nɛn a fɛma e nun fɔxɔ ige tagi bɔxɔne. Saba nun Sɛba mangane mudun fima a ma nɛn. 11 Mangan birin e xinbi sinma a bun ma nɛn. Siyane birin wanla kɛma a xa nɛn. 12 A tɔrɔ muxune xunbama nɛn naxanye na a xili, e nun yiigelitɔ rabeɲinxine. 13 A kininkininma sɛnbɛtarene nun tɔrɔ muxune ma nɛn. A tɔrɔ muxune niin nakisi. 14 A e xɔrɔyama nɛn mayigbɛtɛnna nun gbalon ma, bayo a e yatɛxi. 15 Ala xa mangan bu! Ala xa xɛmaan fi a ma keli Saba yamanani. Yamaan xa Ala maxandi a xa waxatin birin! E xa duba a xa fɛriɲɛn gbɛn! 16 Ala xa donseen wara ayi bɔxɔni. Geyane xa rafe siseene ra. E xa bogi alo naxanye Liban yamanani. Taa kaane xa sabati alo sɛxɛna. 17 Ala xa mangan findi xili kanna ra habadan! A xinla xa bu alo sogena. Siyane birin duban sɔtɔma nɛn a barakani. E fan yi duba a xa. 18 Barikan xa bira Marigina Alatala xa, Isirayilaa Ala! A tan keden peen nan kabanako feene ligama. 19 Barikan xa bira a xa habadan! Ala xa dunuɲa birin nafe a binyen na! Amina! Amina! 20 Yese a dii xɛmɛn Dawuda maxandine danna ni i ra.