Yaburin Sora 76

1 Asafi a bɛtina, bɛti baane kuntigin xa. A xa ba kondenne ra. Sigi sariɲanxina. 2 Yuda kaane Ala kolon. A xinla binyaxi Isirayila yi. 3 A konna Salemi taan nin, a dɔxi Siyon Geyaan nin. 4 A a yaxune xalimakunle yigira mɛnna nin, e nun yɛ masansan wure lefane nun e silanfanne nun e yɛngɛ so seene birin. Bɛti xuini te. 5 Ala, i tan nan sɛnbɛn birin kanna ra, i nɔrɔxi dangu habadan geyane ra. 6 Sofa wɛkilɛxine birin bata bira, e yii seene yi tongo yɛngɛni. E fa saya xixɔnla nin. Na sofa yo mi fa a yiini maxama. 7 Yaxubaa Ala, i na falan ti xɔlɔni, soone nun soo ragine yi bira, e faxa. 8 I tan nan magaxu, Ala. I na xɔlɔ, nde nɔɛ tiyɛ i yɛɛ ra. 9 I to kitisa xuiin namini keli kore, yamanan muxune yi gaxu, e yi e dundu, 10 i to keli kiti bolondeni alogo i xa yiigelitɔne rakisi. Bɛti xuini te. 11 Hali muxune na xɔlɔ i ma, na raɲanma tantunna nan ma i tan xa. Naxanye na mini i ya xɔlɔn bun, ne xaxili sɔtɔma nɛn. 12 I na i dɛ ti Alatala xa, i ya Ala, i xa a rakamali. Yamanan naxanye birin be rabilinni, ɛ Alatala ki! A lan birin xa gaxu a yɛɛ ra! 13 A tan kuntigi wasoxine ragodoma nɛn, a yi dunuɲa mangane magaxu.