Yaburin Sora 82

1 Asafi a bɛtina. Ala dɔxi a manga gbɛdɛni, a tan nan kitin sama sɛnbɛmane tagi. A yi a fala, a naxa, 2 “Ɛ luma kitin sɛ tinxintareyani han waxatin mundun, ɛ yi lu muxu ɲaxine rafisɛ bonne xa? Bɛti xuini te. 3 Ɛ xa sɛnbɛtarene nun kiridine xun mayɛngɛ kitin sa, ɛ yi tinxin yiigelitɔne nun muxu ɲaxankataxine xa. 4 Ɛ xa sɛnbɛtarene nun tɔrɔ muxune ratanga, ɛ e xunba muxu ɲaxine yii." 5 “Ɛ mi fe kolon, ɛ xaxili mi na, ɛ sigan tima dimin nin, bɔxɔn bunne birin xuruxurunma. 6 N bata yi a fala, n naxa, ‘Alane nan ɛ tan na. Kore Xɔnna Alaa diine nan ɛ birin na.’ 7 Koni ɛ faxama nɛn alo adamadiin bonne, ɛ bira alo kuntigin bonne." 8 Ala, keli, i fa dunuɲa makiti, bayo i tan nan gbee siyane birin na.