2 KRONICLES 5

1 Nap’an ni mu’nag Solomon urngin e maruwel ko fare Tempel, me yan i tay gubin ban’en ni ognag David ni chitamngin ngak SOMOL ko senggil ni tafen e cha’ar u Tempel ni aram e silber, gol, nge ku boch ban’en. 2 Ma aram me pining Solomon gubin e pi’in ma gafaliy epi ganong nge yuke girdi’ nu Israel ngar mu’ulung gad nga Jerusalem, ya ngan fek fare Kahol ko M’ag rok SOMOL u Zion ni fare Binaw rok David ngan tay ngalan fare Tempel. 3 Miyad mu’ulung ni yad gubin u ngilan’ e Madnom ko Nochi Naun. 4 Nap’an ni go’ ke mu’ulung gubin fa pi tagafal, me tining e pi Levite fare Kahol ko M’ag ngalang 5 ngar feked i yan ko fare Tempel. Miki fek e prist nge pi Levite fare Tent u p’eowchen SOMOL nge gubin tatalin i yan ko fare Tempel. 6 Solomon ni Pilung nge gubin e girdi’ nu Israel nra mu’ulunggad nga mit fare Kahol ko M’ag ngar pi’ed e saf nge garbaw ni pire’ ni maligach ndakiyag i the’eg. 7 Aram me fek fapi prist fare Kahol ko M’ag rok SOMOL ngalan fare Tempel ngar ted ngalan fa Gin Th’abi Thothup, u tan pon fa gal kerubim. 8 Pon e gal kerubim nem e ba puf nike upunguy fare Kahol nge mat’ riy. 9 Kemus nu mit fa Gin Th’abi Thothup e ra sak’iy be’ riy ma ra guy tabanggin fa gal ley i mat, ma dariy bang ni yira guy riy. (Fa gal ley i mat’ e kabay u rom e daba’.) 10 Dariy ban’en u lan fare Kahol ko M’ag kemus ni fa gal yang i malang ni tay Moses ngay ko burey u Sinai, ko gin ni ngongliy SOMOL fare m’ag riy u thilin nge girdi’ nu Israel ni rchuwgad u Egypt. 11 Gubin e prist ni bay ni demturug ere ulung nib milfarad ngay, ni kar be’ech niged yad. Ma gubin girdi’en e musik ko pi Levite ni aram Asaf, Heman, nge Jeduthun, nge girdi’en e yuke girdi’ rorad, ni go’ ka ra chuwgad ko mad ni wech. Pi Levite e ra sak’iygad nga charen fare altar u ba’ ni ngek ni bay e cymbal nge harp rorad, nib mu’un 120 e prist ngorad ni yad be thoy e rappa’, nge cymbal, nge ku boch e talin e musik, ni yad be pining e sorok ngak SOMOL ko tang ni yad be ga’ar: “Ke sorok SOMOL, ni bochan e ba gol, Ma t’ufeg rok e dabimus.” Nap’an ni be chuw fapi prist u lan fare Tempel mi yigi suguy bang i manilang lan fare Tempel ni be matmat ra’en nga muluplup’en SOMOL, ma dakiyag ni ngar ul ul gad ko fare liyor ni yad be tay.