JOAN 11

1 Junama junak, senu Laasaro’ teaka ko’okoen. Ini’i, kia ili jo’ara Betaania’ tea’po jo’aakai. Ket jiba junama ju’u Maria’ teamta intok a’ akkoowa Maata’ teamtaim bem jo’aaka’po. 2 Ini’i Maria’ teame, ju’u ko’okoemta Laasaro’ teamta jamut waai, aapo juna’atukan, ju’u, yo’owe Jesukrijtota wokimmet juka’ ochokok win jubakamta amet to’oka intok a’ choniwammea am wachakame. 3 Inien san inime’e woika nau wewerika, Jesujtau nokta bittuak: âItom yo’owa, ju’u em aamak tu’ika, em ta’aa’u, tu’isi ko’okoe âti jiakai. 4 Ju’u Jesus inika’a ju’uneiyaakai: âIni’i ko’okoa, ka aapo’ik a’ mukne’ betchi’bo weye. Ala ini’i, juka’ achai Liojta tua si’imeku a’ eiyaawachiaka’uta a’ bitna’ betchi’bo. Intok ketchia, inia ko’okoata betchi’bo, juka’ Liojta usiwaita, si’imeku a’ eiyaawachiaka’uta a’ bitna’ betchi’bo âti jiiak. 5 Ju’u Jesus, juka’ Maata’ teamta intok juka’ a’ jamut waai intok juka’ Laasaro’ teamta, tua am nakeka juni’i, 6 aapo juka’ Laasaro’ teamta a’ ko’okoe’po tejwaawakai, jiba jum a’ ane’epo, juchi wooi ta’apo ama taawak. 7 Chukula, aapo jume’ a’ majtimmeu: âBwiaraa Jurea’ tea’u bicha te juchi nottine âti ameu jiiak. 8 Jume’ a’ majtim junak aapo’iku: âYee majtame, i’an jeela jume’ juriom junama jo’aakame, tetammea enchi mamaasuka enchi me’ebaen. I’an intok, jaisa empo juchi aman weebae ja’ani âti au jiiak. 9 Ju’u Jesus inimmeu: âEme’e ju’unea, juka’ taewaita, woj mamni ama wooim a’ oraka’po. Ju’u taewapo weamame, ini’i ka te’itine. Bwe’ituk aapo inim aniapo tachiriata ayukamtae bichakai. Junuen san, katte jain eaka am bicha katne, bwe’ituk juka’ taewaita in aet muknee’u a’ yuma’anee’uta ketuni be’ee âti ameu jiiakâ. 10 Taa seenu, tukaapo weama’ateko juna’a ala a te’itine, tachiriata au a’ be’e’ betchi’bo. 11 Che’a chukula ju’u Jesus a’ majtimmeu: âJu’u itom aamak tutu’ika itom eiyaa’u, Laasaro’ teame koche. Taa ineponee aman sika a’ busa’ane âti ameu jiiak. 12 Junak jume’ a’ majtim: âAchai, aapo kotche’eteko, tu’ibaeka junen koche âti au jiiak. 13 Taa ju’u Jesus, juka’ Laasaro’ teamta a’ mukuka’uta ameu a’ teuwaabaen o’oben. Jume’ a’ majtim intok, senuk inim yum jo’eka a’ kotche’ut a’ noka’ati ean. 14 Junen su, chukula ju’u Jesus ju’unakkiachisia: âJu’u Laasaro mukia âti ameu jiiakâ. 15 Inepo, ka ama in aneka’ betchi’bo nee kaachin ino eetua. Bwe’ituk ini’i, emo betchi’bo che’a tu’isi yeu weama. Junuen enchim nee sualne’ betchi’bo. Taa jantebu, aman te a’ bitne âti ameu jiiak. 16 Junak intok ju’u Toomaj teame, wa’a wo’oli ti teuwaawame, ini’i, jume’ waate aamak yeu pu’arimmeu: âJantebu itepo ketchia, junuen aman aamak nau kokko betchi’bo âti ameu jiiak. 17 Aman yepsakai ju’u Jesus, juka’ Laasaro tuka’uta, jaibu naiki ta’apo jum senu tetapo wojo’oriata ya’aripo a’ ma’aritau aman yepsak. 18 Ju’u ili jo’ara Betaania’ teame, bwe’u jo’ara Jerusalen tea’u ka mekkaekan, jumak wooi kiloometrom ama mamni siento meetrom tukan jiba. 19 Jume’ juriom betana intok, juebenaka aman Maata’ teamtau intok Maria’ teamtau aanen, juka’ bem abachi mukuka’a betana am jiapsi jo’abaekai. 20 Ju’u Maata’ teame, juka’ Jesujta aman a’ yebijsuseka’po a’ ju’une’eiyaakai, aapo a’ nankibaeka yeu siika. Taa ju’u Maria’ teame a’ jo’awapo taawak. 21 Ini’i Maata intok ju’u Jesujtau: âIn yo’owa, enchi inim aneo, ju’u in abachi ka muk ean âti au jiiakâ. 22 Taa ket ne ju’unea, juka’ Liojta, si’imeta juka’ aapo’iku bicha em a’awa’uta, a enchi a’ bittua’po âti au jiiak. 23 Ju’u Jesus, aapo’iku: âJu’u em abachi juchi jiapsine âti au jiiak. 24 Ju’u Maata intok junak: âLutu’uria, ju’uneanee chukula taewait, jume’ kokkoarim jiabijteneeo, juchi a’ jiapsinee’u âti au jiiak. 25 Junak ju’u Jesus iniau: âIneponee juna’a, ju’u kokkoarim nasuk yee jiabijtetuaka, jiba yuu jiapsiwamta yetet utuane. Junuen, wa’a nee sualeme, kia mukiataka juni’i, juna’a juchi jiapsine. 26 Intok jabetaka juni’i, ketun inim jiapsaka intok nee sualeme, ini’i, jakwoo juni’i ka mukne. Jaisa empo inika’a suale ja’ani âti au jiiak. 27 Aapo intok: âJeewi in yo’owa. Inepo nee enchi junen ju’u Krijtotuka’u enchi suale. Ju’u Liojta yoemia ju’u inim bwiau yebijneeka bo’o bitwame âti au jiiak. 28 Chukla inika’a teuwaasukai ju’u Maata, ju’u a’ waaibeu Maria’ teamtau chaaebaeka au siika intok junau: âJu’u yee majtame im aane intok eu chaae tebo âti jiaka, ka kusisi a’ tejwaak. 29 Kia inika’a jikkajaka jiba ju’u Maria, kikteka intok Jesujta ane’u au siika. 30 Ju’u Jesus junama ili jo’ara Betaania’ tea’u ketun kee aman kibaken. Taa ketun, jiba jum Maatata au yepsaka’po aanen. 31 Junak jume’ juriom a’ jo’apo a’ jiapsi yechaka aamak ama ane’um, junuen Mariata, kikteka intok sep yeu sikamta bichakai, inime’e aet cha’aka sajak, bempo, juka’ Laasaro tuka’uta ma’ariu sika aman a’ bwanbae’eti eakai. 32 Junak intok ju’u Maria, Jesujta ane’u yepsakai, aapo’iku tonommea kikteka intok: âIn yo’owa, enchi im aneo, ju’u in abachi ka muk ean âti au jiiak. 33 Ju’u Jesus, juka’ Mariata intok jume’ juriom aamak ama yajakame bwaname bichakai, tua a’ sioka’u intok a’ jiapsipo tua a’ juiwa’u aet ayukan. 34 Intok aapo: âJakunsa eme’e a’ teekak âti ameu nattemaek. Bempo intok: âItom yo’owa, a’abo sika a’ bitne âti au jiiak. 35 Junak ju’u Jesus bwaanak. 36 Junak jume’ juriom: âAke’em a’ bicha, tua a’ nakken âti jiian. 37 Taa juname betana waate: âIni’i, waka’a liptita a’ bittuakame, jaisa juka’ Laasaro tuka’uta, ka a’ mukne’ betchi’bo a’ ania ean ja’ani âti jiiak. 38 Jesus, juchi tua jiapsipo a’ juiwaka, jum tetapo wojo’orita ya’ariu ruktek. Ini’i, senu kau tejtukan. Intok ini’i, senu bwe’u tetae pattitukan. 39 Junak ju’u Jesus: âJuka’ tetata em omola kechaa âti jiiak. Ju’u Maata, ju’u mukukamta mak weri: âIn yo’owa, ini’i jiba tua jumak, jaibu tua juuba, bwe’ituk jaibu naiki taewaim jipue mukiatakai âti jiiak. 40 Taa ju’u Jesus iniau: âJaisa inepo, juka’ Liojta betana tua eiyaawatchika, a jita a’ joa’uta em a’ bitnee’uta, ka eu teuwaala ja’ani. Inika’a enchi a’ sualeo âti au jiiak. 41 Junak intok ju’u teta omola biaktawak. Ju’u Jesus intok teekau jikau bicha bitchuka intok: âIn yo’owa, enchi ne bai sae, bwe’ituk empo ju’u in teuwaa’ut nee jikkaja. 42 Ju’uneane, ju’u in teuwaa’ut, jiba em nee aet jikkaja’po. Taa inika’a nee teuwaa jume’ inim aneme aniabaekai, junuen inime’e, em a’abo nee bittuaka’po bem a’ sualne’ betchi’bo âti jiiak. 43 Chukula, inika’a teuwaasuka, kusisi nokaka: âLaasaro, junum a’abo yeu weye âti jiiak. 44 Ju’u intoko mukia tuka’u, yeu siika, mampo intok wokpo tajo’orimmea biijti takai. A’ pujbat intok ket tajo’orimmea bi’iti takai. Ju’u Jesus inimmeu: âTajo’orim em a’ woitaria, a’ weene’ betchi’bo âti ameu jiiak. 45 Inia betchi’bo jume’ juriom betana juebenaka Jesujta sualek. Jume’ Mariata mak aman yajakame intok Jesujta yaaka’uta a’ bichakame. 46 Taa inime betana waate, jume’ paiseeom teammeu lauti sajaka intok inime’e juka’ Jesujta yaaka’uta ameu teuwaak. 47 Junako jume’ paiseeom intok jume’ te’opopo tekiakammeu yo’owe, inime’e, ju’u jurio yoemratau, si’ime ju’u yo’oraata ama emo nau toji tebok intok inimmeu: âJaisa tua tee aune. Ini’i o’ou, machilaata juebenak, a jita a’ joa’ue a’ jooa âti jiianâ. 48 Itepo inika’a junuen a’ su’u tojako, si’ime ju’u inim yoemra a’ sualne. Junak jume’e, jum bwe’u jo’ara Rooma’ tea’po yo’ooraa, sontaaom a’abo bittuaka intok inime’e itomak nassuaka, itom bwe’u te’opota tatapnee intok inim yoemrata a’ lu’utane âti jiian. 49 Taa inime’e betana seenu, Kaipaaj teame, ju’u junae wasuktiat, si’ime jume’ te’opopo tekiakammeu che’a yo’o tuka’u, ini’i inimmeu: âEme’e kaita em tatta’aa âti ameu jiiakâ. 50 Intok kia eme’e ka a’ mammate juni’i, ito betchi’bo che’a a’ tu’ireaka’u, junuen inim senuk itom yoemrata betchi’bo, wepu’ulaik jiba a’ muknee’u. Intok ka junuen si’ime yoemrata a’ lu’utanaa’u âti ameu jiiak. 51 Taa aapo ju’u Kaipaaj teame, ka aapo a’ ea’po junuen jiiak. Ala aapo junae wasuktiat, jume’ te’opopo tekiakammeu che’a yo’o ya’atakai, aapo, Liojta betana aet ju’uneetuawaka junuen, Jesujta ju’u jurio yoemrata betchi’bo a’ muknee’uta a’ teuwaak. 52 Intok ka kia junae yoemrata betchi’bo jiba, taa ketchia si’imem jume’ Liojta yoemiam, aniat na’ikimtulame junuen nau am toji betchi’bo. 53 Junuen san, jiba junae taewait naateka, ju’u jurio yoemratau yo’oora, juka’ Jesujta a’ me’e tebo betchi’bo, inime’e nau etejoka a’ lutu’uria yaak. 54 Inia betchi’bo san ju’u Jesus, ka intok ju’u jurio yoemrata nasuk ame bichapo weaman. Ala aapo, jum a’ ane’u betana yeu sika intok aman bweka pa’ariau yeu ka au mekka kateka, ili bwe’u jo’ara Epra’im tea’u bicha siika. Junama’a a’ majtimmak tawakai. 55 Junama’a jaibu ka mekka be’een, jume’ juriom bwala jissu’aka pajko jiba bem joa’uta a’ yuma’anee’u. Yoemra intok juebenaka junama’a ili ka bwere jo’aram be’ekatana junaman bwe’u jo’ara Jerusalen tea’u nau yajak. Inime’e junuen, juka’ pajkota, kee a’ naateo, Liojta bichapo emo tu’utewamta a’ ya’abaekai. 56 Junama’a waate, Jesujta jaiwan. Intok jum te’opopo anekai, bempo: âJaisa eme’e jiia, jaisa a’abo pajkou yebijnee ja’ani, oo ka a’abo weene âti nau nattemaen. 57 Jume’ paiseeom intok wame’e te’opopo tekiakammeu yo’owe, inime’e, jabeta juni’i, Jesujta jakun a’ ane’uta a’ ju’uneiyaamta, junaka’a bempo’im a’ tejwaanee’uta a’ teuwaalatukan, junuen bempo’im a’ bwijne’ betchi’bo.