JOAN 18
TBL1 Chukula aapo inika’a teuwaasukai, ju’u Jesus jume’ a’ majtimmak yeu siika, junuen jakia Setroon teamta beas anbaekai. Junama’a wajpo juyam tatakaka echitukan. Inim Jesus a’ majtimmak ama yepsak. 2 Ket ju’u Juuraj teame, ju’u yeu a’ bwijneeme, aapo junama’a juyam echipo ta’aan. Bwe’ituk ju’u Jesus, jume’ a’ majtimmake juebenasi junama a’anen. 3 Junuen san ju’u Juuraj teame junama yepsak, juebena sontaaom weiyaakai, intok waate, jume’ te’opopo yee suuatuawammake. Inime’e, jume’ te’opopo tekiakammeu yo’owem betana intok jume’ paiseeom betana aman bittuarimtakai. Inime’e, tettebem kukuche’eka intok mampo tachiriam weiyaaka kaaten. 4 Taa ju’u Jesus, si’imeta juka’ au yeu weenemta betana jaibu ju’uneakai, yeu sikaa, intok inimmeu: âJabetasa eme’e jaiwa âti ameu nattemaek. 5 Bempo: âJuka’ Jesujta, Nasaret tea’po jometa âti a’ yoopnak. Ju’u Jesus intok: âIneponee juna’a âti ameu jiiak. Ju’u Juuraj teame, ju’u aapo’ik yeu bwisekame ket inime’emak ama weaman. 6 Juka’ Jesujta: “Ineponee juna’a”, ti ameu a’ jiako, inime’e amau rukteka intok bwiau ko’om to’otek. 7 Junak intok ju’u Jesus juchi: âJabetasa eme’e jaiwa âti ameu nattemaek. Bempo intoko: âJuka’ Jesujta, Nasaret tea’po jometa âti jiiak. 8 Junak ju’u Jesus: âJaibu su ne enchim tejwaasuk in juna’atuka’po. Eme’e nee jaiwa’ateko, inime’e nemak rejteme am saka’atuane âti ameu jiiak. 9 Ini’i inien tuk, jiba aapo’ik Jesujta, ju’ubwa jeela: “Jume’e, in yo’owata neu bicha yeu a’ pu’aka’um betana, tua kaabe, jitat ta’abwisi eaka, nee betana au na’ikimtek”, ti a’ teuwaaka’uta, junuen a’ chupne’ betchi’bo. 10 Junak ju’u Simoo Peeo’o teame, ini’i, tebem sisi’iwook kuche’ekame, yeu am wikeka intok senuk, Malko’ teaka, ju’u te’opopo tekiakammeu yo’ota sawe’uta, inika’a batatana naka chukti a’ beebak. 11 Taa Jesus, ju’u Peotau: âJume’ kuchi’im, em yeu am wikeka’po am ketcha. Inien, juka’ in yo’owata, jiokot nee ino a’ bit i’ao utte’atune, inien tua jiokot in ino bitnee’u âti au jiiak. 12 Junak jume’ sontaaom yeu pu’arim, ju’u ameu weyekamtamake, intok jume’ te’opopo yee suuatuawame, inime’e, Jesujta bwiseka intok a’ sumaka, 13 chukula ket, bempo che’a bat ju’u Anaj teamta kariu a’ tojak. Juka’ Anaj teamta, ju’u Kaipaaj teame a’ ase’ebwakan. Ini’i ju’u junae wasuktiat ama te’opopo tekiakammeu che’a yo’otuka’u. 14 Ini’i Kaipaaj teame jiba juna’atukan, ju’u juriommeu: “Si’ime jurio yoemrata betchi’bo, wepu’ulaik a’ muknee’po aman, bempo’im betchi’bo che’a a’ tu’inee’uta”, ti a’ teuwaakame. 15 Simoo Peeo’ teame intok senu Jesujta majti, inime’e Jesujtat cha’aka kaaten. Ini’i senu Jesujta majti, junama’a te’opopo tekiakammeu yo’ota betana ta’eewan. Junuen san ini’i, Jesujta mak junama’a yo’ota kariu bicha, jitae bat kora ya’ariu aman kibakek. 16 Taa ju’u Peeo, junama’a aman kikkimuwa’po, pa’aria tana taawak. Inien san ju’u senu majti, ju’u te’opopo tekiakammeu yo’ota betana ta’eewame, ini’i yeu sika intok juka’ jamutta, aman kikkimuwa’po yee suuamta, a’ tejwaaka, juka’ Peota aman kibachak. 17 Junak ju’u jamut, aman kikkimuwa’po a’ suuatuawame, Peotau: âJaisa empo ka juna’a ketchia, inia o’outa betana senu a’ majti ja’ani âti au nattemaek. Ju’u Peeo intok: âE’e, ka inepo juna’a âti a’ yoopnak. 18 Junama’a sebekai, jume’ junama’a jitaa suuame, intok jume’ tekoka ama sawame, nayaka, oubammeu ja’abweka sukawen. Ju’u Peeo ket junama’a amemak oubammeu weyeka sukawen. 19 Ju’u te’opopo tekiakammeu che’a yo’owe, Jesujtau nattemai taitek, jabem a’ majtimtuka’ummet intok aapo’ik juka’ junen yee a’ majta’u betana. 20 Iniau ju’u Jesus: âInepo nee inim si’imem ane’ebichapo yeteu nonoksuk. Intok jum juriom te’opompo, intok inim bwe’u te’opopo, si’ime jume’ juriom nau emo totoja’po jiba aneka nee yee majtasuk. Junuen san kaita nee etbwa teuwaalaa, 21 jaisaaka empo neu su nattemae. Jume’ nee jikkajilammeu nattemainee intok bempo ela’po a’ teuwaanee juka’ in am majtalatuka’uta. Bempo tu’isi ju’unea juka’ in ameu noklatuka’uta âti au jiiak. 22 Junak Jesujta inien jiako, junama te’opopo yee suuame betana, senu ama aneme, pujbat a’ chochonaka intok: âKat ju’u te’opopo tekiakammeu che’a yo’otau junuen jiia âti au jiiak. 23 Ju’u Jesus inika’a inen yoopnak: âKa tu’ik nee teuwaariako, junae betana a’ teuwaane. Taa juka’ in teuwaarita a’ tu’ireako, jaisaaka empo nee chona âti au jiakai. 24 Junak ju’u Anaas, aapo’ik suma’ita, Kaipaaj teamtau, ju’u te’opopo tekiakammeu che’a yo’otau a’ bittuak. 25 Ju’u Peeo ketun junama’a tajimmeu weeka sukawen. Iniau intok: âJaisa empo ka juna’a, ju’u inia o’outa betana majti ja’ani âti au jiuwak. Peeo intok: âE’e, ka inepo juna’a âti jiiak. 26 Junak intok seenu, juka’ te’opopo tekiakammeu che’a yo’ota tekokame, ini’i ju’u seenu, Peota naka chukti a’ bebaka’uta a’ wawaekame, aapo Peotau: âJaisa nee ka enchi jum juya etripo aamak bichak ja’ani âti au jiiak. 27 Ju’u Peeo, juchi ka au a’ ta’aa ti jiaka nookak. Junama’a intok sep, totoi o’owia kukussuk. 28 Junak intok ju’u Jesus, Kaipaaj teamta kari a’ kateka’a betana, aman ju’u kobanaaota bwe’u kariu nu’upawak. Junama’a jaibu matchun. Jume’ juriom intok junaman bwe’u kariu ka aman kiimuk. Inime’e, Liojta junuen bem a’ yo’oree’ut, junuen ayuka Liojta bichapo ka tu’ik emo ya’a machiakai. Intok junuen, Liojta yo’ori betchi’bo, kupteo, bwala jissobata bem bwa’ee’uta, ka a emo a’ bwa’ane’eti eakai. 29 Inia betchi’bo ju’u kobanao Pilaato’ teame, pa’akun yeu siika junuen ameu nokbaekai. Intok aapo inimmeu: âJitat sa eme’e inika’a o’outa a’ na’atejo âti ameu jiiak. 30 Bempo, inika’a: âKa tu’ik ka a’ ya’ariako, itepo ka eu a’ toji ean âti a’ yoopnak. 31 Junak ju’u Pilaato: âEme’e a’ nuk sajaka intok jiba enchim jachin nesawe’po aman a’ ya’uraa bittuane âti ameu jiiak. Jume’ juriom intok: âTaa itepo jume’ juriom, ka iniau lutu’uriak, senuk a’ me’etunee’ut itom aet nesaune’ betchi’bo âti au jiiak. 32 Junuen chupuk ju’u, aapo’ik Jesujta, tua jachin weyeka a’ muknee’u betana a’ teuwaariaka’uta. 33 Pilaato, jum bwe’u kariu wajiwa juchi aman kibakeka, Jesujtau chaai teboka intok: âJaisa empo juna’a ja’ani, ju’u, jurio yoemratau che’a yo’o ya’ari âti au nattemaek. 34 Jesus intok iniau: âInika’a inia betana nattemaekai, jaisa empo kia emo a’ ju’uneiyaaka a’ nattemae ja’ani, inika’a inim in che’a yo’o ya’ari tuka’u, oo watem betana a’ jikkajilatakai âti au jiiak. 35 Pilaato ju’u kobanaao a’ yoopnak: âIneponee ka jurio. Ju’u inim ele benasi jurio yoemra intok jume’ te’opopo tekiakammeu yo’owe, inime’e junen enchi a’abo neu tojak. Jitasa empo ya’ari âti au jiiak. 36 Junak ju’u Jesus: âChe’a yo’otaka in nesaunee’u, ka i’an inim juna’a. Nee junuen inim nesaweo, junak jume’ nemak eaka rejteme, nassua ean, junuen, juriommeu ka in su’u tojina’ betchi’bo. Taa che’a yo’otaka in nesawe’u, ka i’an inim juna’a âti a’ yoopnak. 37 Pilaato intok: âJunak su, jaisa empo lutu’uriapo juna’a ja’ani, ju’u che’a yo’o ya’ari âti au nattemaek. Jesus inika’a: âIneponee juna’a ju’u che’a yo’o ya’ari, jiba em a’ teuwa’a benasia. Ineponee inim yoemtuk, intok inepo juka’ lutu’uriata ju’uneiyaa tebobaekai nee inim a’abo yepsak. Si’ime jume’e, juka’ lutu’uriata bo’o jooriaka jiapsame, inime’e, juka’ in teuwaa’uta a’ jikkajine âti a’ yoopnak. 38 Ju’u Pilaato aapo’iku: âJitasa intok juna’a, ini’i lutu’uria âti au jiiak. Jesus, a’ me’etune’ betchi’bo aet nesawa Inien au nattemaisuka ju’u Pilaato juchi yeu siika, jume’ juriommeu nokbaekai. Intok junammeu: âKaita ka tu’ik nee inia o’outat teu machi âti jiiakâ. 39 Taa eme’e au joiwalataka jiba junuen a’ bibicha, chikti bwala jissu’awaka pajko taewaitchi, seenuk eta’ita in emou a’ su’u tottojamta. Junak su, jaisa eme’e juka’ juriommeu che’a yo’o ya’arita nee a’ su’u toji i’a ja’ani âti ameu jiiak. 40 Junako si’ime juchi chaai japtek: âKa junuka’a su’u tojine. Ala juka’ Barabaaj teamta su’u tojine âti jiakai. Ini’i Barabaaj teame intok jita etbwawamta tu’uren.
