JOAN 7

1 Iniet chukula ju’u Jesus, bwiaraa Kalilea’ tea’po jiba weaman intok aapo jum bwiaraa Jurea’ tea’po ka anbaekai. Bwe’ituk junaman jume’ juriom a’ me’ebae’ betchi’bo. 2 Taa junako juka’ pajkota, jume’ juriom bem jo’aam be’ekatana juya karim joaka bem pajkota. Ini’i jurio yoemrata ket bem pajkoo abe a’ yumao, 3 jume’ aapo’ik sailawam aapo’iku inen jiiak: âKat inim tatawa. Bwiaara Jurea’ tea’u bicha weene. Junuen junaman jume’ emak eaka em majtim ket juka’ a jita em joa’uta, bem a’ bitne’ betchi’bo. 4 Bwe’ituk seenu, ini’i, si’imekut au a’ ta’aa i’a’ateko, ini’i ka etbwa a’ joa’uta joone. I’an empo inile benaka eiyaawatchik joakai, kia bu’uuraata bichapo em bitna’ betchi’bo a’ joone âti au jiiak. 5 Bwe’ituk junama’a kia tua jume’ a’ sailawam juni’i, aapo’ik ka sualen. 6 Junak intok ju’u Jesus inimmeu: âKetun kee yuuma ju’u taewai junaet in aman weenee’u. Taa enchim aman katne’ betchi’bo kaita emoas aayuk âti ameu jiiakâ. 7 Jume’ inim weyemta bo’o jooriaka jiapsame, enchim kaachin a omtane. Taa inime’e nee tua omta bwe’ituk inepo, inime’e, tua nee machisi juka’ ka tu’ika bem joa’uta aet am ju’uneetua. 8 Eme’e junaman pajkou katne. Inepo nee ka aman weenee bwe’ituk kee yuuma ju’u taewai junaet in aman weenee’u âti ameu jiiak. 9 Intok aapo inika’a ameu teuwaasukai, junama aapo, bwiaraa Kalilea’ tea’po taawak. 10 Taa chukula jume’ a’ sailawam am bicha am saka’asuko, aapo ju’u Jesus ket junaman pajkou siika. Taa junak aapo etbwa junuen, kaabeta tua a’ bichao o’oben. 11 Jume’ juriom junama pajkopo a’ jaiwan intok inime’e: âJaksa tua aane wa’a yoeme âti nat jiakai. 12 Junama bu’uuraata nasuk juebenaka aapo’ik betana nokaka, waate: “Tua tu’i yoeme”, ti jiian. Taa wate intok: “Ka lutu’uria, bwe’ituk inim yoemrata bai tatta’aa”, ti jiian. 13 Taa junama’a kaabe ame betana juka’ bem ae tana ea’uta machisi a’ teuwaan, juka’ juriommeu yo’oraata junaet am nok tejwaa majjaekai. 14 Juka’ pajkota jaibu taewaika nasuklaapo a’ weyeo, junak ju’u Jesus te’opou yepsaka intok junama wajiwa yee majta taitek. 15 Jume’ juriom intok inia betana suum eaka taawak, intok: âJaisa tua ini’i yu’in jita ta’aa, ini’i ka jak au majtalatakai âti jiian. 16 Ju’u Jesus junak inime’e: âJu’u in yee majta’u, ka nee betana weye. Ala ini’i, wa’a inim nee a’abo bittuakamta betana weye âti am yoopnakâ. 17 Inim jabetaka juni’i, ju’u achai Liojta waataka a’ joo i’a’uta a’ joobaeme, ini’i in yee majta’ut, Liojta betana a’ weye’po, oo kia nee betana jiba a’ weyeka in a’ teuwaa’ut, machisi aet ju’uneene. 18 Ju’u aapo a’ ea’po jiba jita nokame, ini’i, yoemrata a’ eiyaaka a’ yo’ori i’aka junuen noknee. Taa wa’a, juka’ a’abo a’ bittuakamta a’ eiyaawaka a’ yo’ori i’aka junuen nokame, ini’i tua lutu’uriata jiba noknee. Intok yee a’ bai ta’aanee’u iniat kaita aune. 19 ‘Ju’u Moiseejtuka’u juka’ nesauri ji’ojteita enchim ji’oteriak. Taa junuentaka juni’i, emo nasuk kia jabe juni’i, kaabe a’ chupaka a’ bo’o jooria. Junak su, jaisaaka eme’e nee me’ebae âti ameu jiiak. 20 Ju’u bu’uuraa inen aapo’ik yoopnak: âBebeje’erita betana ka tu’i jiapsita et aane. Kaabe enchi me’ebae âti au jiakai. 21 Jesus inen ameu jiiak: âAet yum jo’e ta’apo senu weemta in a’ yaaka’ betchi’bo eme’e si’ime a’ suum eiyaa. 22 Taa ju’u Moiseejtuka’u, juka’ sirkunsision teamta, jiba enchim a’ bo’o jooriane’ betchi’bo, enchim tejwaak. Taa ka aapo inika’a bat a’ yaaka juni’i. Ala inika’a, che’a bat naataka enchim yo’owasuka’um a’ naatekai. Intok eme’e inia betchi’bo, kia sabalata aet yum jo’e taewait juni’i, senu ili usi o’outa a’ sirkunsiraaroane. 23 Junuen san, eme’e, Moiseejtuka’uta nesauri ji’ojtei a’ chupa’abaekai, ili usi o’outa junuen aet yum jo’e ta’apo juni’i a’ sirkunsiraaroaneekai, jaisaaka intok eme’e neu omte junuen aet yum jo’e ta’apo, senuk tua in a’ tu’uteka’ betchi’bo. 24 Kia bitpo jiba, inim senuk ka tu’i yoemta benasi a’ machiaka’ut, eme’e a’ bichakai, ka junae eme’e ka tu’isi a’ tatawaabaane. Ala senuk jita ka tu’ik a’ joa’ut tua aet ju’uneaka, junae jiba, ka tu’isi a’ tatawaane. 25 Junak intok waate jume’ bwe’u jo’ara Jerusalen tea’po jo’aakame: âJaisa ka ini’i juna’a ja’ani, ju’u me’ebaawaka jariuwame âti jiaka nattemae japtekâ. 26 Junum aane i’ani, juebenam mak aneka intok yee majtakai. Intok kaabe au monte. Jaisa tua lutu’uriapo ju’u ya’uraa, a’ Krijtotuka’uta a’ suale ja’ani âti jiianâ. 27 Taa itepo tee tu’isi ju’unea inika’a jakun a’ jometuka’ut. Taa ju’u Krijto’o teamta inim a’ yepsako, junak tua kaabe ju’uneenee jaku’ubo a’ weye’po âti jiian. 28 Inika’a jikkajakai ju’u Jesus, intok aapo ket jum te’opopo yee majtakai, tua kusisi nokakai: âJunuen san eme’e nee ta’aa intok eme’e, jakun in jometuka’ut ju’unea. Taa inepo nee ka kia in ea’po inim a’abo yebijlaa. Ala inepo, senuk ju’u tua a yoem eiyaatuka intok junae tua ka enchim ta’aa’u betana nee a’abo bittuaritaka weye. 29 Junaka’a inepo nee a’ ta’aa. Bwe’ituk jiba inepo aapo’iku mak nee aman aanen intok jiba aapo a’abo nee bittuari âti jiiak. 30 Junak intok juname’e a’ bwiseka a’ weiyaabaaen. Taa kaabe au ruktek. Bwe’ituk junama’a, junae betchi’bo, ju’u taewai kee yuuman. 31 Taa juebenaka jume’ junama te’opopo aneme aapo’ik sualek, intok inime’e: âJu’u Krijto’ teame junak a’abo yepsako, kaachin a jita a’ joa’uta intok machilaata inia bepa a’ joone âti jiiak. 32 Jume’ paiseeom teame, inime’e, Jesujta betana juka’ yoemrata a’ teuwaa’uta jikkajak. Junak intok bempo intok jume’ junama te’opopo tekiakammeu yo’owe, inime’e nau, junama’a te’opopo, waatem jume’ yee suuatuawame junuen aapo’ik bem a’ bwijne’ betchi’bo, Jesujtau am bittuak. 33 Junak intok ju’u Jesus junammeu: âTua ka binwa inepo inim emomak annee. Intok chukula inepo ju’u a’abo nee bittuakamtau nee juchi nottine. 34 Eme’e inim nee jariunee taa eme’e ka jak nee teune. Bwe’ituk eme’e jum in yebijnee’u ka a aman nemak yajine âti ameu jiiak. 35 Junak wame’e juriom, bempo nau nattemae japtek: âJakunsa ini’i weeneeka itepo ka a’ teune. Oo jaisa aapo, aman jume’ juriom, inime’e ju’u yoemra rieekom teammak kuutilammeu, intok jume’ rieekom majtabaeka aman weeneekai ja’ani. 36 Jaisa aapo jiaka junuen: “Eme’e inim nee jariunee taa eme’e ka jak nee teune, bwe’ituk eme’e jum in annee’u ka a aman yajine”, ti jiakai. 37 Ju’u taewai juka’ pajkota aet lu’ute’u, ini’i che’a juni’i yo’oriwan. Jiba junako, junae taewait ju’u Jesus, kikteka intok tua kusisi nokakai: âJabetaka juni’i, ju’u ba’a ji’ipeame, ini’i neu sika intok ba’a ji’ine âti jiiakâ. 38 Jum Liojta betana ji’osia ji’ojteim tua junuen a’ jia’a benasia: “Inim jabeta juni’i, juka’ nee sual ta’aamta betana, batwee ba’am buiteme benaka yee jiapsituame ka aet lu’utine” âti jiiak. 39 Inien jiaka ju’u Jesus, jume’ a’ sualeme, Liojta betana juka’ a’ tu’u jipasiwata bem mabetnee’uta a’ teuwaan. Bwe’ituk junak ju’u Liojta tu’u jiapsiwa, bempo kee a’ mabettuawan. Bwe’ituk ju’u Jesus, kee junuen teekau yo’otaka yejten. 40 Waate junama’a bu’uuraata betana inika’a jikkajaka: âTua lutu’uriapo ini’i juna’a, ju’u Liojta betana ju’uneetuawaka chukula yeu weenemta teteuwaame ini’i yebijneeka bo’o bitwa’u âti jiian. 41 Wate intok: âIni’i juna’a, wa’a Krijto’ teame âti jiian. Taa junama’a ket waate: âE’e, ju’u Krijto’ teame kaachin, bwiaara Kalilea’ tea’a betana jometune âti jiaka aanenâ. 42 Jum Liojta betana weyeka ji’osia ji’ojteimpo, juka’ Krijto’ teamta, ju’u che’a yo’o ya’ari Labiituka’utat yeu katriam betana a’ weenee’uta intok jum ili jo’ara Beleem tea’po betana, jiba ju’u Labiituka’uta a’ jiapsaka’po, junama’a a’ jometunee’uta a’ utte’atunee’u, ti ji’ojtei. 43 Junuen san ju’u yoemra, aapo’ik Jesujta betchi’bo ka nanancha eaka taawak. 44 Waate intok, a’ bwiseka a’ weiyaabaen, taa kaabe au suuak. 45 Jume’ ama te’opopo yee suuatuawame, inime’e, jume’ paiseeom intok jume’ te’opopo tekiakammeu yo’owem ane’u nottek. Juname’e intok: âJaisaaka eme’e ka a’ nu’upak âti ameu nattemaek. 46 Jume’ intok ama te’opopo yee suuatuawame: âTua jakwoo juni’i itepo kee jabeta inim, junaka’a o’outa, aapo’ik yee a’ majta’a benasi nokamta a’ jikkajilamtukan âti am yoopnak. 47 Junak intok jume’ paiseeom, inimmeu: âJaisa ket eme’e inia betana emo bai ta’aa tebolam ja’ani âti ameu jiiakâ. 48 Ju’u itou yo’ooraata betana kaabe a’ suallaa. Intok kia jume’ paiseeom betana juni’i. 49 Taa wa’a yoemra, Moiseej tuka’uta betana juka’ nesauri ji’ojteita ka a’ ta’aame, inime’e ka tu’isi tawalam âti jiian. 50 Ju’u Nikoreemo’ teame, ju’u che’a bat naataka Jesujta mak etejo betchi’bo tukaapo au noitekame, ini’i, jume’ paiseeom mak weyen. Aapo intok: 51 âJuka’ inim ae itom nesawee’uta, a’ jia’a benasia, itepo kaabeta ka tu’isi a’ tawaane, inika’a ka bat a’ jikkajakai, junuen ju’u a’ yaaka’ut ju’unee betchi’bo âti ameu jiiak. 52 Junak bempo inen au jiiak: âJaisa empo tua lutu’uriapo, bwiaraa Kalilea’ tea’po ket joome ja’ani. Liojta betana weyeka ji’osia ji’ojteim emo majta. Intok empo junuen a’ ju’uneiyaane, Liojta betana ju’uneetuawaka chukula yeu weenemta nokame, kia wepu’ulaika juni’i, bwiaraa Kalilea’ tea’a betana ka a’ jometuka’po âti au jiiak. 53 Junak intok bempo, nau etejosuka, si’ime we’epulaka, bem jo’aammeu bicha sajak.