JOAN 9
TBL1 Junama jak wa’am katekai, Jesus senuk yeu a’a tomteka’po naatekai, liptita ama bichak. 2 Jume’ a’ majtim intok: âYee majtame, jaisaaka tua ini’i yoeme, ka bichaka yeu tomtek. Jaisa jume’ a’ yo’owawam ka tu’ik bem a’ ya’ala’ betchi’bo ja’ani, oo jiba aapo’ik ka tu’ik a’ ya’ari betchi’bo ja’ani âti au nattemaek. 3 Ju’u Jesus inimmeu: âKa ini’i aapo, ka tu’ik a’ ya’ari betchi’bo, intok kia ka jume’ a’ yo’owawam ka tu’isi aula’ betchi’bo juni’i ini’i inien yeu yoemtuk. Ala ini’i junuen yoemtuk, inien Liojta a jita joa’uta a’ bitna’ betchi’bo âti ameu jiiakâ. 4 Ketun taewaituko, itepo juka’ nee a’abo bittuakamta betana tekilta itom a’ ya’anee’uta utte’a. Bwe’ituk lauti ka machine, junak kaabeta a tekipanoaneeo. 5 Inepo ketun inim aniapo anekai, nee, jume’ inim jiapsammeu, inepo tachiriata benasi nee ameu maachi âti jiiak. 6 Inika’a teuwaasuka, chukula ju’u Jesus, bwiapo chit wattek intok iniae techoata iliikik yaaka intok ju’u ka bichamta a’ pusim bepa a’ yaak. 7 Junak intok inen au jiiak: âAman jum ba’a maneka’u, emo baksiane, Siloe’ tea’awi. Inime’e team: Aman Bittuari, ti jiubae. Ju’u ka bichame aman sikaa, au baksiak. Intok ini’i notteka jaibu bichan. 8 Junak jume’ ae naapo jo’aakame intok jume’ bat naataka aapo’ik ka bichamta a’ ta’aa’um, inime’e: âJaisa ini’i ka juna’a, bat naataka kateka netane’u ja’ani âti jiiak. 9 Waate: âIni’i juna’a âti jiian. Wate intok: âKa aapo juna’a, taa tua ale bena âti jiian. Taa jiba ini’i, aapo: âLutu’uria, ineponee juna’a âti jiiak. 10 Junak intok bempo: âJaisa empo puj tu’utewaka a bicha âti au nattemaek. 11 Aapo intok: âSeenu, wa’a Jesuj teame, aapo techoata yaaka, pujpo net a’ yaak intok inen neu jiiak: “Aman jum ba’a maneka’u, Siloe’ tea’u emo baksiane”, ti neu jiiak. Nee intok aman siika, intok nee junuen ino pujba baksiasukai beja, ne bit taitek âti am yoopnak. 12 Junak inime’e: âJaksa intok i’an aane juna’a âti au nattemaek. Aapo intok: âKannee ju’unea âti ameu jiiak. 13 Junak intok inime’e, juka’ bat naataka liptituka’uta, jume’ paiseeommeu yeu a’ tojak. 14 Taa junae taewai junuen juka’ Jesujta techoata yaaka intok juka’ liptita a’ tu’uteko, inika’a aet a’ yum jo’e taewai tuka’ betchi’bo, 15 jume’ paiseeom inia o’outau juchi au nattemaek, jaisa yeu sika i’an tu’ika a’ bicha’po. Aapo intoko: âPujpo techoata net yaak. Inepo intok ino baksiaka i’an intok ne jaibu bicha âti ameu jiiak. 16 Junak jume’ paiseeom betana waate: âJu’u inika’a yaakame, kaachin Liojta betana weene. Bwe’ituk ini’i, juka’ aet yum jo’e taewaita ka a’ yo’ore âti jiian. Taa wate intok: âJaisa tua aapo inika’a machilaata a’ joone, junuen ini’i ka tu’i yoem tuko âti jiian. Inia betchi’bo san, bempo’im nasuk ka nau eewame ayukan. 17 Intok inime’e juchia ju’u bat naataka ka bicha’utau: âEmpo su jaisa jiia, ju’u yoeme enchi bittuakamta betana âti au nattemaek. Ini’i intok: âInepo ala nee, junaka’a, senu inim Liojta betana ju’uneaka chukula yeu weenemta tetteuwaka a’ yoeme’e ti jiia âti ameu jiiak. 18 Taa jume’ juriom, inika’a, junuen bat naataka a’ liptituka’uta, intok juchi a’ bicha’uta ka a’ sualbaen. Inime’e chukula junae yo’owammeu chai tebokai, 19 intok junammeu: âJaisa ini’i juna’a enchim yoemia, ju’u enchim liptitaka yeu a’ yoemtuk ti jia’u. Junak su jaisa auka i’an bicha âti ameu nattemaek. 20 Jume’ a’ yo’owawam intok: âJu’uneate inika’a itom a’ yoemiaka’po, intok junuen liptitaka yeu a’ yoemtuka’po. 21 Taa itepo, katte ju’unea jachin yeu sika intok i’an a’ bicha’po. Intok kia jabeta junen aapo’ik a’ bittuaka’po juni’i, te ka ju’unea. Inia betana eme’e aapo’iku nattemaine, aapo su jaibu yo’owe intok jiba aapo a enchim lutu’uria maka âti ameu jiiak. 22 Jume’ a’ yo’owawam inien jiiak, jume’ juriom bem majjae’ betchi’bo. Bwe’ituk jume’ juriom jaibu nau lutu’uriakan, jabeta juni’i, juka’ Jesujta a’ Krijto’oti jiamta, jum juriom te’opompo, ka intok ama a’ lutu’urianee’u betana. 23 Inia betchi’bo san, jume’ a’ yo’owawam: “Inia betana aapo’iku nattemaine, aapo su jaibu yo’owe”, ti jiakan. 24 Junak intok jume’ juriom, ju’u bat naataka ka bichamtau juchi chaaek intok: âInia betana, yuma’isi, achai Liojta jiba em a’ bai sae’uta a’ teuwaane. Itepo te ju’unea, junaka’a o’outa, a’ ka tu’i yoem tuka’uta âti au jiiak. 25 Junak intok juna’a: âInepone, inika’a aapo’ik a’ ka tu’i yoem tuka’u betana nee ka ju’unea. Inika’a bat naataka in liptitaka, taa i’an intok in bicha’uta, inika’a ala nee ju’uneiyaa âti am yoopnak. 26 Inime’e intok juchi wee’po iniau: âJitasa eu yaak. Jaisa enchi puj tu’utek âti au nattemaek. 27 Ini’i intok: âJaibu ne enchim tejwaasuk, eme’e intok ka nee sualek. Jaisaaka eme’e juchi wee’po nee enchim tejwaa i’a. Jaisa eme’e ket aapo’ik Jesujta mak eebae ja’ani âti ameu jiiak. 28 Junako inime’e, inika’a ka a’ yo’oreka au noksuka intok: âEmpo ala junaemak eaka jiapsa. Taa itepo tee juka’ Moiseej tuka’utamak eaka te jiapsa âti au jiiakâ. 29 Itepo, juka’ Liojta, ju’u Moiseej tuka’utau a’ nokaka’ut tee ju’unea. Taa inika’a, kia jakun a’ jometuka’ut juni’i, te ka ju’unea âti au jiiak. 30 Junak ini’i o’ou inimmeu: âJu’u enchim teuwaa’u suakiachisi maachi. Eme’e, jakun a’ jometuka’uta ka ju’unea. Aapo intok nee puj tu’uteka nee bittuak âti jiiakâ. 31 Tu’isi ite ju’unea, juka’ Liojta, jume’ ka tu’ik joaka jiapsame, ju’u bem a’awa’ut aapo’ik ka a’ jikkaja’po. Ala, jume’ aapo’ik yo’oreka intok aapo’ik ea’po aman jiapsame, bem a’awa’ut am jikkaja ju’u Lios. 32 Inim jakwoo juni’i, kee senuk betana jikkajiwa senuk ka bichaka yeu tomtekamta inika’a juchi a’ bittuaka’u betana. 33 Ini’i o’ou ka Liojta betana weye’eteko, tua kaita inile benak machilaata a joo ean âti ameu jiiak. 34 Junak intok bempo iniau: âEmpo em yeu tomteka’po naateka, ka tu’i yoemtakai, jaisa ket empo jitat itom majtabae ja’ani âti au jiiak. Intok inime’e, bempo bem te’opopo, juka’ a’ lutu’urianee’uta a’ u’aak. 35 Ju’u Jesus juka’ liptituka’uta, junama’a bem te’opopo ka intok ama a’ lutu’uriane’ betchi’bo yeu bepwakamta ju’uneiyaak. Intok chukula junaka’a bichakai: âJaisa empo juka’ inim yoemta a’ suale ja’ani âti au nattemaek. 36 Ini’i o’ou intok: âAchai, inia betana nee tejwaanee a’ jabe tuka’uta junuen nee a’ sualne’ betchi’bo âti au jiiak. 37 Ju’u Jesus junau: âJaibu empo a’ bitlaa. Ineponee juna’a, inim ju’u em aamak etejo’u âti a’ yoopnak. 38 Junako ini’i o’ou Jesujtau tonommea kikteka a’ yo’orek intok: âAchai, enchi nee suale âti au jiiak. 39 Junako ju’u Jesus: âInepo nee inim bwiau ne yepsak, junuen Liojta bichapo tu’ika bemelak ya’uraata inim aune’ betchi’bo, junuen iniae, jume’ liliptim bebenam, inime’e am bitne’ betchi’bo. Jume’ intok bibichame, inime’e, liliptim benasi am tawane’ betchi’bo âti jiiak. 40 Junak intok jume’ paiseeom, waate junama’a aamak aneme, inika’a a’ teuwaaka’uta jikkajaka: âJaisa itepo intok ketchia liliptim bebena ja’ani âti au nattemaek. 41 Jesus intok inimmeu: âEme’e lutu’uriapo liliptim benaeko, junak enchim ka tu’uwa ya’arim betchi’bo, ju’u ka tu’isi enchim tawaa’u ka emot au ean. Taa eme’e emo bibicha’ati jia’ betchi’bo, eme’e jiba iniat juka’ ka tu’ik enchim ya’ari’uta jiba emot tatawaa.
