LUUKAS 5

1 Sejtul ju’u Jesus, bwe’u bau ba’a Jenesaret tea’po inim mayoat aanen. Junama intok ju’u yoemra juebenaka nau yajaka inime’e kia ama nau a’ pit pittan bwe’ituk inime’esu, Liojta betana nok lutu’uriata jikkajibaekai. 2 Jesus, junama’a bau ba’a mayoat, wooi bwere kuta kanoam ba’apo kia beja cha’akammeu yepsak. Bwe’ituk jume’ kuchureeom inime’e junama to’o saka’alataka intok inime’e jume’ bem jite’im baksian. 3 Junak ju’u Jesus juname betana senu kanoa, Simo’ teamta atteau ja’amuk intok iniau, che’a ba’au a’ ruktane’ betchi’bo au nookak. Junak ju’u Jesus junama’a yejtek, chukula intok ama jikat kateka juka’ yoemrata majta taitek. 4 Junak, junammeu noksukai, ju’u Simo’ teamtau: âInika’a kuta kanoata ba’ata che’a bu’uukun a’ nuk sika intok kuchum nu’u betchi’bo enchim jite’im ko’om jimmaane âti au jiiak. 5 Ini’i Simoo intok: âYee maj majtame, si’ime tukaata te inim tekipanoala kaita bwij machikai. Taa ne jume’ jite’im sep ba’au ne am jimmaane, i’an em junen a’ nesawe’ betchi’bo âti jiaka a’ yoopnak. 6 Junak inime’e aman bem tejwaawaka’uta yaakai, kuchum ka ilikim ama teaka, junuen kia jume’ jite’im juni’i chukti taitek. 7 Junak inime’e, jume’ wate amemak rejteme, senu ta’abwi kuta kanoapo anemmeu, maammea ameu chaaek, junuen inime’e aman am aniane’ betchi’bo. Inime’e ameu sajaka intok jume’ wooi kuta kanoam tapuniak, kia tua inime’e abe ammea roptekai. 8 Inika bichakai ju’u Simoo Peo’ teame, Jesujta bichapo tonommea kikteka intok: âIn yo’owa, inim nee to’o simne. Bwe’ituk tua nee ka tu’i yoeme âti au jiiak. 9 Bwe’ituk ini’i Simoo majaen intok kia si’ime jume’ wate aamak rejteme juni’i junuen jume’ kuchum bem yeu wikeka’ betchi’bo. 10 Ju’u Jakoobo intok ju’u Joan, seenu, Sebereo’ teamta yoemiam, Simo’ teamtamak tekipanoame, inime’e ket womtilamtukan. Taa ju’u Jesus Simo’ teamtau: âKa majaune, empo i’an naateka jume’ inim yoemem, bem jinne’uimtune’ betchi’bo am jariune âti au jiiak. 11 Intok junako inime’e, jume’ kuta kanoam bwiau yeu am tojisukai, si’imeta junama’a su’u tojaka intok Jesujtamak yeu sajak. 12 Junak, Jesujta junama senu ili bwe’u jo’araapo a’ aneo, seenu, lepra’ teamtae, unnaa ko’okoeka au yepsak. Intok ini’i, Jesujta bichakai, tonommea kikteka, bwiau ko’om cha’aka intok au ujbwanak: âAchai, empo junen ea’ateko, inia in ko’okoata betana nee ino ine’etetuane âti jiakai. 13 Junak intok Jesus, inika’a, aet mamteka: âJana’aka, junuentune. Sep tu’ika tawane âti au jiiak. Aapo’ik inika’a teuwaako, ju’u lepra’ teame ko’okoa iniat kaitatuk. 14 Junako ju’u Jesus inia betana aet nesawek inika’a kaabetau a’ teuwaasaekai: âAla sikaa, intok aman ju’u te’opopo tekiakamtau noitinee jiba. Intok em tu’ureaka’ betchi’bo intok inia betana empo Liojta yo’ori betchi’bo, inien ko’okoeme aman toji’ea’uta aman tojine, juka’ Moiseejtuka’uta a’ nesaweka’a benasia, junuen si’imem ju’uneene’ betchi’bo, em ko’okoa betana jaibu em tu’ireasuka’po âti au jiakai. 15 Taa ju’u tu’ika Jesujta joa’u nooki, che’ewa su si’imekut weyen. Yoemra intok juebenaka au nau yaajan a’ teuwaa’uta jikkajibaekai intok aapo’ik ju’u bem ko’okoa betana am tu’utene’ betchi’bo. 16 Taa ju’u Jesus, pa’akun, omot, kaabeta ane’u bicha yeu sisimen, intok junaman Liojtau bicha nonokan. 17 Sejtul, juka’ Jesujta yee a’ majtao, junama waate paiseeom teame intok Moiseejta nesaurim yee majtame ket junama aanen. Inime’e jume’ ili jo’aram be’ekatana, bwiaraa Kalilea’ tea’po intok Jurea’ tea’po jokame betana intok bwe’u jo’ara Jerusalen tea’a betana ama yajilamtakai. Liojta betana intok ju’u a jita a’ joa’uta aet bitwan, aapo jume’ ko’okoeme emo ine’etetuakai. 18 Intok waate o’owim junama yajak, seenuk, ka au taka yekamta, tapejtim benaku a’ weiyaakai. Intok inime’e, inika’a kariu Jesujta ane’u a’ nuk kimubaen. 19 Taa inime’e, juka’ bu’uuraata betchi’bo kaak luula a aman kiimuk. Junako inime’e kari jikau ja’amuka intok junama’a jikat, jume’ babue ya’arim kooktaka, juka’ ko’okoemta, jipetekpo ama aneme nasuk, Jesujtau ko’om a’ teekak. 20 Ju’u Jesus, inime’e junuen tua a’ sualeme ju’uneiyaakai, ju’u ko’okoemtau: âEmpo in nake’u, jume’ em ka tu’ik ya’arimmet, i’an ne enchi jiokoe âti au jiiak. 21 Junak jume’ Moiseejta nesaurim yee majtame intok jume’ paiseeom teame, inime’e: “Jabetaka sa ini’i, a’ nokie Liojta beje’eka, ka tu’ik teuwaame. Kaabe intok ka tu’uwa ya’arimmet a yee jiokoe, aapo Lios jiba”, ti bempo ee japtek. 22 Taa Jesus, inime’e ju’u bem emo eetua’ut witti ju’uneaka intok: âJaisaaka eme’e junuen emo eetua âti ameu jiiakâ. 23 Bwe’ituk jitasa che’a ka obiachi a’ chupnee’u: “Em ka tu’uwa ya’arimmet empo jiokoiri”, oo: “Empo, yejteka intok weene”, ti in au teuwaanee’u âti ameu jiiakâ. 24 Tu’i, junuen san enchim ne a’ ju’uneiyaa i’a juka’ inim emo benasi yoemta, inim bwiapo junuen jume’ ka tu’uwa ya’arim, yetet a’ jiokoinee’ut, yo’o’utte’ata aet ayuka’po. Junako aapo, ju’u ka au yekamtau: âEu ne nooka. Yejteka em jipetekta nu’uka intok em jo’au weene âti au jiiak. 25 Ju’u san ka au taka yekame, junama lautipo bempo’im bichapo ka obiachisi kiktek. Ini’i, juka’ a’ jipetekta nu’uka intok a’ jo’aau bicha siika, alleaka Liojta a’ baisae’uta teuwaakai. 26 Si’ime jume’ ama aneme, junaet suum eaka taawak, intok inime’e, Liojta bem yo’ore’uta a’ teuwaan. Intok tua majjaika: âI’an inim itepo te juka’ ka jiba bitwaka, tua ka a jootu maisi weyeka ya’arita itepo bitlaa âti inime’e jiian. 27 Iniat chukula ju’u Jesus junama yeu sika intok seenuk Lebi’ teaka, ya’uraata betana tomita nau totojamtau yepsak, inika’a jum junaka’a tomita a’ totojiwa’po ama au katekamta, intok iniau: âNemak weene âti au jiiak. 28 Junak intok ju’u Lebii’ teame sep kikteka intok si’imeta junama su’u tojaka, Jesujtamak yeu siika. 29 Iniat chukula ju’u Lebi’ teame, a’ jo’aapo Jesujta betchi’bo ji’ibwa teboka, bwe’uusi alleewamta weetuan. Junama intok ket juebenaka waate, ale benasi ya’uraata betchi’bo tomita nau totojame ama aanen. Intok wate ket ama yajilame bempo’immak mesau jookan. 30 Taa jume’ paiseeom teame intok jume’ inimemak, Moiseejta nesaurim yee majtame, inime’e, Jesujta majtim ka amma’ali am ane’eti jiaka, nok japtek. Intok inimmeu: âJaisaaka eme’e, jume’ tomita nau totojammak intok jume’ ka tu’i yoememmak emo alleetuaka intok amemak ji’ibwa âti ameu jiiak. 31 Inime’e inen yoopnak ju’u Jesus: âJume’ kaita inne’aaka, ka ko’okoeme, juka’ jittoata am makneemta ka a’ jariune. Ala jume’ ko’okoeme. 32 Kannee jume’ tu’i yoemem jinne’uimtune’ betchi’bo ameu noki’isek. Ala, jume’ Liojta bichapo ka tu’i yoemem, junuen inime’e, ka tu’ik betana emo am temaine’ betchi’bo, junaka’a koptakai âti ameu jiiak. 33 Junak intok bempo: âJaisaaka jume’ Joan tuka’utamak eame intok jume’ paiseeom teammak eame, inime’e jaarekisi ka ji’ibwaka Liojta yo’oriwamta intok Liojtau bicha nokwamta weetua. Taa jume’ em majtim inime’e jiba junaen ji’ibwa, ka jume’ watem benasia âti Jesujtau nattemaek. 34 Jesus inen am yoopnak: âKaachin eme’e, jum jujupwaa’u, jume’ nunurim a utte’a jooriane, inime’e ka ji’ibwaka ama anne’ betchi’bo, ket juka’ jupbaemta ama a’ aneo. 35 Taa yuma’anee ju’u taewai, junak inime’e, juka’ jupbaemta am u’aatuneeo. Junak ala inime’e ka ji’ibwane âti ameu jiakai. 36 Ketchia aapo inile benak ta’abwik teuwaaka ameu nookan: âKaabe bemela supem chuktaka, jume’ moeram ammea cha’abwabaane. Junuen ini’i ayuko, jume’ bemela supem nasontene, intok che’a ket, jume’ bemela tajo’orim, moerampo ka ama tu’i âti jiakaiâ. 37 Intok kia, ju’u bemela pa’asi ba’awa juni’i, kaachin moera bea boosampo kima’anaa. Bwe’ituk junuentuko, ju’u bemela pa’asi ba’awa, jume’ bea boosam siutane. Intok ju’u paa’sai ba’awa intok kia jume’ bea boosam juni’i junuen nasontune. 38 Junuen san, ju’u bemela paasi ba’awa, beemela bea boosampo kima’atune. Junuen nanancha binwatune. 39 Intok kia kaabe, wa’a, juka’ pa’asi ba’awata binwatuk ya’arita je’eeme, chukula bemelak ji’ibaane. Bwe’ituk ini’i: “Ju’u binwatuk weeria che’a tu’i” âti jiakai.