Menu

MATEEO 14

TBL

1 Junakriapo taewaimmet ju’u Eroorej teame, bwiaraa Kalilea’ tea’po yo’o ya’atuka’u, Jesujta betana, ini’i etejoriawak. 2 Aapo intok, jume’ ama tekiaka, aamak anemmeu: âIni’i jiba ju’u Joan, yee bato’owaame tuka’u. Mukiataka jiabijtela. Kiali’ikun junuen ka a jootu maisi machik a’ joone’po au yuma’atualaa âti jiiak. 3 Ini’i Eroorej teame, bat naataka juka’ Joanta bwij teboka intok suma’ita, yee e’eta’awa’u a’ toji tebolatakai. Inika’a yaak, jamut Eroriaj teaka, bat naataka a’ saila, Jeriipe’ teamta jubisuka’u betchi’bo. 4 Ju’u Joantuka’u, ju’u Eroorejtau inen jiulatukan: âKa eu lutu’uria em a’ jubeka’a benasi a’ jipu’une’po. 5 Ju’u Eroores inika’a Joanta a’ me’e tebobaek taa juka’ yoemrata a’ majjaen bwe’ituk si’ime, juka’ Joanta, Liojta betana ju’uneetuawaka yeteu a’ noka’apo junuen a’ sualen. 6 Taa jum, juka’ Eroorejta wasuktiam yuma’ariaka a’ pajko’po, ju’u, junae jamut Eroriaj teamta jamut asoa, aman nunurim bichapo anwa’po a’ ye’eko, junaka’a, ju’u Eroores tua a’ musa’ulek. 7 Junuen aapo, iniat ka yumako, ka tu’ik au chupnee’u teuwaaka, jita juni’i au a’ a’awaka’uta, aapo tua au a’ makne’eti jiaka nokakan. 8 Junako ini’i beme jamut, a’ malawa betana bat inen tejwaatakai, ju’u Eroorejtau: âPu’atopo, juka’ yee bato’owaame Joanta koba inimi’i nee makne âti au jiiak. 9 Ini’i, juka’ junama’a che’a yo’ota Eroorejta, ka a’ alleetuak. Taa aapo, ini’i, tua aet a’ yuma’anee’uta a’ teuwaalatuka’ betchi’bo, intok jume’ junaman nunurim a’ jikkajilatuka’ betchi’bo, a’ makna’ betchi’bo nesawek. 10 Junuen san juka’ Joanta aman a’ eta’ituka’po, a’ koba chuktana’ betchi’bo aet nesawek. 11 Chukula ini’i koba, pu’atopo aman tojiwak intok ju’u usi beme a’ makwaka, intok aapo a’ malabeu a’ tojak. 12 Junak intok jume’ Joantuka’uta a’ majtim ama yajaka, inime’e intok juka’ takaata nuk sajaka intok inika’a ma’ak. Chukula inime’e sajaka intok Jesujta tejwaak. 13 Junak ju’u Jesus inika’a ju’uneiyaakai, jum a’ ane’epo, senu bwe’u kuta kanoapo, aapola, omot kaabeta ane’u bicha yeu siika. Taa ju’u yoemra a’ ju’uneiyaakai, intok ini’i, jume’ bwere jo’aram betana yeu sajak, junuen bwiat aet cha’aka kat betchi’bo. 14 Juka’ Jesujta junama ko’om cheptekai, yoemrata juebenak ama anemta bichak. Intok inime’e, am nak jiokolek. Intok jume’ ko’okoeme, bem weiyaa’um, aapo emo am ine’etetuak. 15 Junak junama’a jaibu ka machiseo, jume’ Jesujta majtim au rukteka intok: âJaibu tua kupte intok inim kaabe jo’aak. Im aneme am kat saune, inime’e jumun ili jo’arammeu sajaka intok bem bwa’anee’uta bem jinune’ betchi’bo âti au jiiak. 16 Ju’u Jesus: âKa utte’a bem saka’anee’u. Eme’e am ji’ibwatuane âti ameu jiiak. 17 Bempo intok: âKaita te im jipue, mamni paanim intok wooi kuchum jiba âti au jiiak. 18 Inimmeu Jesus: âA’abo em neu am toja âti ameu jiiak. 19 Junak intok aapo, juka’ yoemrata, bajpo am joote saek intok chukula jume’ mamni paanim intok jume’ wooi kuchum am nu’uka, jikau bitchuka, Liojta a’ baisaeka am rebekta taitek. Jume’ a’ majta’ummeu am bwisek. Inime’e intok junae yoemratat am na’ikimtek. 20 Si’ime juname’e ji’ibwak intok yuma’isi jatteaka taawak. Intok chukula, woj mamni ama woika bwere waarim tapunak, jume’ ama yeu be’akammea. 21 Junama’a jume’ ji’ibwakame, o’ouraa, mamni miil tukan, ketun jume’ jaamuchim intok jume’ illitchim ka na’ikiatakai. 22 Che’a chukula intok ju’u Jesus, jume’ a’ majtim, jum kuta kanoapo am ja’amutuak, bau ba’at sajaka, aapat waitana bem yaajine’ betchi’bo, aapo’ik ketun juka’ yoemrata a’ saka’atuao. 23 Inime’e am saka’atuasukai, aapo ju’u Jesus, ili kawiu jikau siika, junama’a aapola, Liojtau bicha nokbaekai. Tukaariau yumakai ju’u Jesus aapola junama’a aanen. 24 Juka’ bwe’u kuta kanoata ket bau ba’a nasukun a’ weyeo, jume’ ba’a biaktiam, juka’ kuta kanoata naas beban. Ju’u su jeeka am nankika weyen. 25 Jaibu abe matchuu ini’i Jesus ameu ruktek, ba’a bepa weyekai. 26 Intok junako jume’ majtim, aapo’ik ba’a bepa weyemta bichakai, womtek. Intok majjaeka: âIni’i, tukaapo yee wom womtame âti chaaen. 27 Taa ju’u Jesus inimmeu nokaka: âKate’em jain ea, ineponee juna’a ju’u im aneme. Kate’em majjae âti ameu jiiak. 28 Junak ju’u Peeo intok au nookak: âAchai, empo tua juna’atuko, ba’a bepa weyeka em ane’u nee yebijtua’e âti au jiiak. 29 Ju’u Jesus intok: âA’abo neu bicha weyema âti au jiiak. Junak san ju’u Peeo jum kuta kanoapo ko’om chepteka, intok ba’a bepa wee taitek junuen Jesujta a’ ane’u au yebijbaekai. 30 Taa aapo, juka’ jekata utte’akamta mammatekai, majjaek intok ko’om kibak taitekai: âNee jinne’u’e, achai âti chaaen. 31 Junama’a sep ju’u Jesus, mampo a’ bwiseka intok: âTua empo ka yuma’isi a Liojtat yoem ea. Jaisaaka empo ka net yoem eak âti au jiiak. 32 Bempo’im intok jum bem kate’epo ja’amuko, cha’atuk ju’u jeeka. 33 Junako jume’ kuta kanoapo kateme, Jesujtau tonommea japteka: âTua lutu’uriapo, empo Liojta betana yoemiari âti au jiiak. 34 Bempo junae bwe’u bau ba’at waitana sajaka, intok bwiau Jenesaret tea’awi yeu yajak. 35 Junak ju’u yoemra, junama’a jo’aakame, juka’ Jesujta tata’aakai, inime’e, junama’a bwiaraapo si’imekut jo’arammeu bicha emo naas tejwaa japtek. Intok jume’ ko’okoeme si’ime jum aapo’ik ane’u au tojiwak. 36 Juname’e intok au ujbwanan, aapo’ikut, kia a’ tajo’ori mayoat juni’i, bem tajtine’ betchi’bo. Intok si’ime jume’ aet mamtekame, emo ine’etek.

Everything we make is available for free because of a generous community of supporters.

Donate