MATEEO 17

1 Busan taewaim sikaa, ju’u Jesus, juka’ Peota intok juka’ Jakoobo’ teamta intok juka’ Joanta, ju’u Jakoobo’ teamtamak weri, nunuka intok aapo, aapola amemak senu mekka jikat kawiu jikau amemak siika. 2 Junaman intok aapo ame bichapo ta’abwisi au bittebok. A’ pujbawa ta’ata benasi machisi tachiriakan. Ju’u intok a’ tajo’oriwa, tossaala tachiriata benasi aayuk. 3 Intok bempo, junama’a sep su, juka’ Moiseej teamta intok juka’ Eliaj teamta, ju’u Jesujtamak etejome bichak. 4 Junak intok ju’u Peeo, Jesujtau: âAchai, tua su te tu’isi im aane. Enchi junen eao, itepo baji ili juya karim te ya’ane. Ee betchi’bo senuk, Moiseejta betchi’bo senuk, intok Eliajta betchi’bo intok ket seenuk âti au jiiak. 5 Ket juka’ Peota nokao su, naamu, tua beojkoka am roptak. Junama’a namupo betana intok, jiawai jikkajituk: âIni’i juna’a ju’u in yoemia in nake’u, ae betchi’bo tua in allea’u. Aapo’ik eme’e a’ nok jikkajine âti jiakai. 6 Inika’a jikkajakai jume’ a’ majtim yeu a’ pu’arim, bwiapo pepetala to’otek intok inime’e tua womtek. 7 Junak intoko ju’u Jesus ameu rukteka, amet mamteka intok: âJapte’em bu âti ameu jiiakâ. Kate’em majjae. 8 Inime’e juchi aman bitchukai, kaabeta intok ama bichak, juka’ Jesujta aapolaik jiba. 9 Bempo’im junae kau betana ko’om kateo, ju’u Jesus amet nesawek: âInika’a enchim bittuawaka’uta, kaabetau eme’e a’ etejone. Chukula, juka’ inim emo benasia yoemta kokkoarim nasuk a’ jiabijtesuk ju’ubwa a’ teuwaane âti ameu jiiak. 10 Junak intok jume’ a’ majtim: âJaisaaka junen, jume’ Moiseejtuka’uta nesaurim yee majtame, a’ utte’a ti jiia, juka’ Eliaj teamta bat a’abo a’ yebijnee’u âti Jesujtau nattemaek. 11 Junak intok ju’u Jesus inime’e inen yoopnak: âLutu’uria juka’ Eliaj teamta, utte’a, bat a’ yebijnee’u. Intok inika’a si’imeta a’ tu’utene’po. 12 Taa inepo ne, juka’ Eliajta jaibu a’ yebissuk ti jiia. Bempo intok a’ jabetuka’po ka a’ ta’aak. Ala bempo si’imeta juka’ jiokot machik bem au ya’abae’uta au yaak. Ket jiba junaeni ju’u inim emo benasi yoeme, jiba inime’e betana jiokot ya’atune âti ameu jiiak. 13 Junak intok jume’ Jesujta majtim aet ju’une’eak, Jesujta, ju’u Joan, yee babatoowamta betana ameu a’ noka’apo. 14 Chukula junak, bempo’im jum anwa’u am yajakai, seenu, junaman Jesujtau rukteka, ini’i ket au tonommea kikteka intok: 15 âAchai, inika’a in ou yoemiata nak jiokole’e. Beja su, aapo epileepsia’ teamtae ko’okoeka weeche. Intok tua unnaa jiokot au bicha. Juebenasi tajipo oo ba’apo weeche. 16 A’abo ne ime’e em majtimmeu ne a’ tojak taa bempo ka a au a’ ine’etetua machi âti au jiiak. 17 Ju’u Jesus inen a’ yoopnak: âOu, eme’e, kaita sualeka intok tua ka tu’i yoemra. Jakwoo tajtiasa tua nee inien enchim bitne. Jakwoo tajtiasa tua ne jiokot emomak anne. Juka’ usita em a’abo neu toja âti jiiakai. 18 Junak ju’u Jesus, ju’u bebeje’eri ka tu’i jiapsitau kuttipo au nokaka intok inika’a, ju’u usi o’outat yeu a’ simtuak. Junuen ini’i junama’a sep tu’urekai. 19 Chukula jume’ Jesujta majtim, omola sajaka, Jesujtamak etejoko intok bempo: âJaisaaka tua, itepo, juka’ ka tu’i jiapsita ka a yeu a’ beebak âti au nattemaek. 20 Ju’u Jesus inimmeu inen jiiak: âBwe’ituk eme’esu tua ka a Liojtat yoem ea. Tua lutu’uriapo ne inen jiia, eme’e, kia ju’u mojtaasa bachiata belleekik juni’i, Liojtat a enchim yoem ea’u emot ayuko, inia kawiu eme’e: “Inim yeu sikaa, omot yejtene”, ti au jiu ean. Ini’i kawi intok omot bicha weene. Junuen eme’e lutu’uriapo Liojtat a yoem ea’ateko, kaita emo betchi’bo obiachine. 21 Taa inile benaka ka tu’i jiapsi, ini’i, ka ji’ibwawaka Liojta yo’oriwaka intok au bicha emo nokriawamtae jiba a yeu beeptu âti ameu jiiak. 22 Ketun jum bwiaraa Kalilea’ tea’po nau rejtekai, ju’u Jesus, juka’ inim yoemta, jume’ inim ka tu’i yoemem mampo a’ su’u tojina’ati jiiak. 23 Intok juname’e a’ me’eenee’u. Taa ket, baji taewaim sikaa, a’ jiabijtenee’u ti jiiak. Ini’i, ju’ubwa a’ teuwaari, bempo’im tua sioktuak. 24 Juka’ Jesujta intok jume’ yeu a’ pu’arim, bwe’u jo’ara Kapernaum tea’u yeu am yajako, junama’a jume’ te’opota betchi’bo tomita nau totojame, ju’u Peotau yajaka intok: âJu’u enchim majtame, jaisa tomita te’opota betchi’bo ka a beje’etua ja’ani âti au nattemaek. 25 Ju’u Peeo intok: âJana’aka âti jiiak. Junako, juka’ Peota kariu a’ kibakeko, ju’u Jesus bat au nonokak: âJaisa eu maachi Simoo âti jiakaiâ. Jume’ inim bwiapo che’a yo’o ya’arim, inime’e, juka’ ya’uraatau bicha tomita weyemta, intok juka’ jita’apo yee aniabaawaka tomita, jabemmeusa junuen a’ waata, jume’ ama bem bwiaraapo jomemmewi oo jume’ ka junama’a bwiaraapo joomemmewi, ja’ani âti au nattemaekai. 26 Ju’u Peeo: âJume’ omot bwiaraa yoemratau âti a’ yoopnak. Ju’u Jesus junak: âJunuentuko, jume’ ama bem bwiaarapo yoemem, kaita beje’etuane âti au jiiakâ. 27 Taa junuen, kaabeta ka alleetuabaekai, jum bau ba’au sikaa, jume’ kuchum ammea yeu wiikwame ba’au jimmaane, intok juka’ bat ama cha’atukamta yeu wikne. Junae tenpo empo tosai tomita, tua au yuma’ik teune. Juna’a, in beje’etua’ea’uta intok em aman toji’ea’uta, junae aman am beje’etuane âti au jiiak.