MAEKOS 14

1 Chukula intok, wooi taewata be’eeo, bem pajko, bwala’aso’ola jisu’awa taewaitune’ betchi’bo, intok jume’ paanim ka reberuakame, bwa’a taewaitune’ betchi’bo. Intok jume’ te’opopo, ama saiwame bepa che’a yo’o yaa’uchim, intok jume’ maejtom, Jesujta etbwa bwij betchi’bo, intok a’ me’etune’ betchi’bo, awim a’ jaiwan, junuen a’ ya’abaekai. 2 Inenim nau jiakai intok: âKa jume’ taewaim weye’po te inen aune, bwe’ituk te junuen ayuek âtiianâ, juka’ yoemrata, itou omtineekai, ka yanti eewame aune âtiian. 3 Aapo’ik intok, Jesujta, jo’ara Betaania’ tea’po aneo, junama’a yoeme Simo’ teame, bat naataka junerasi taka sa’awakai, junama’a jo’aaka, ju’u Jesus intok, junae jo’aapo aanen. Aet jiji’ibwawapo intok, aapo’ik aman yejteko, senu jamut, ama Jesujtau yepsaka, juka’ ochokok tu’isi win jubak, naaro’ teamta ausu’lik, intok tu’isi beje’ewakamta weeyan. Junama’asan juka’ ili tosai teta soto’ita, aet a’ auka’uta, jamtaka, junaka’a ochokok a’ kobawapo aet a’ to’aak. 4 Waate intok ama aneme, inia weemta betchi’bo emo o’omtituak, inen emo eetuakai: âJaisaaka tua, beuta’a yaak âtim jiakaiâ. 5 Bwe’ituk ini’i ochoko win jubak, che’a tu’i ean, bu’uu tomipo nenkitu ean. Bwe’ituk a’ beje’ewa’u, batte senu wasuktiapo tekipanoaka ama kobaka’u, junaka’a beje’ewaek. a’ nenkak intok juna’a tomi poobemmet na’ikimte’eewan. Inia betchi’bo san, junaka’a jamutta a’ beje’eka, ae tana nookan. 6 Taa Jesus intok, junammeu: âAke’em a’ su’u tojaka, katem suati a’ bicha âti ameu jiiakâ. Bwe’ituk ini’i jamut, tu’uwata neu ya’ala âtiiaâ. 7 Bwe’ituk jume’ poloobem jiba emo mak anne, intok tu’uwata enchim ameu ya’abae’po aman, jiba emou aune. Taa nee ka jiba inim emo mak annee. 8 In mukuka, in aet ma’ana’ata’apo neu ya’anaa’uta, ini’i jamut, ket be’eeo aapo jaibu inika’a ochokok win jubak a’ yuma’ala’po aman, in takaat net a’ si’itala. 9 Lutula wee’po inien ne emou jiia, ini’i Liojta tu’i nokta, kia jak juni’i, si’ime bwiat yeu tajtia, a’ teuwaawa’po, inika’a jamutta, juka’ ochokok win jubak, net a’ si’itaka’po aman, ket teuwaatunee aapo’iku waatitune’ betchi’bo. 10 Junak intok ju’u Juuraj Ijkarioote’ teame, woj mamni ama wooi a’ majtimpo na’ikiatuka’u, juna’a, jume’ te’opopo saiwame, bem yaa’uchimmeu sikaa, Jesujta ameu yeu bwiseka, bempo’im mampo a’ su’u tojine’ betchi’bo amemak au tu’utek. 11 Juname’e intok, a’ jikkajaka, junae weemta betana, emo alleetuaka, intok tomita a’ mikrokaka a’ tejwak. Chukula intok ju’u Juuraj Ijkarioote’ teame, a’ bwijtune’ betchi’bo, aet tekipanoa taitek. 12 Intok, ju’u bem pajko, jume’ paanim ka reberuakame bwa’e taewaita yumako, intok jume’ bwara’aso’olam aet su’anaa’u. (Juna’a intok pajkua’atea tiia.) Junak san beja, jume’ a’ majtim: âJakunsa âtiianâ, jume’ paanim ka reberuakame, intok juka’ bwala jisu’ari jissobata itom bwaa i’a âtim a’ temaek. 13 Junak intok, aapo, wooi a’ majtim, bwe’u jo’arata kateka’u am bittuak, intok: âSenu o’outa, soto’po ba’am weeyamta enchim nankika weene âtiiaâ. Junaet cha’aka em katne âti ameu jiiakâ. 14 Intok senu jo’arapo a’ kibakeko, junaman, junaka’a karita atteakamtau eme’e yajaka, inen au jiunee: “Ju’u yee majtame inen jiia: Inim em jo’apo, jume’ paanim ka reberuakame, intok juka’ bwara jisu’ari jissobata, aet a’ bwa’a taewaita yumaka’po aman, inim em jo’apo a’ ji’ibwarokaka nokla. Kiali’ikun te a’ ju’uneyyabae, jakuni itom ji’ibwane’po." 15 Junak intok juna’a, junama’a, junae karita bepa, intok senu bwe’u kari katek. Junaka’a intok enchim tejwane. Junama’a intok si’ime aayuk, itom ae ji’ibwanee’u. Eme’e junen intok, junama’a, ito beasi si’imeta ama tu’utene. 16 Jume’ majtim intok, aman bwe’u jo’arau bicha sajaka, junuen ameu jiuwaka’po aman, junuen ameu yeu siika. Intok paanim, ka reberuakame, intok bwara jisu’ari jissobata, bwa’ana’po, junama’a si’imeta tu’ulisi tu’utekamme. 17 Kupteo yumak intok, ju’u Jesus, jume’ woj mamni ama wooi ama a’ majtimmak, junaman, paanim ka reberuakame, intok juka’ bwara jisu’ari jissobata, bem bwa’ane’po yepsak. 18 Junama’a intok, ama aet jiji’ibwawa’po, ji’ibwa betchi’bo, ama jootekai, Jesus inen jiiak: âLutula wee’po âtiiaâ, emo tana senu aane, i’an nemak inim ji’ibwame, nee yeu bwiseka nee nenkineeme âtiia. 19 Junak san beja, bempo, ka emo alleetua japtek, intok we’epulaka inen au jiu japtek: âJumak juni’i inepo ja’ani âti jiakai. 20 Junak intok aapo am yoopnaka: âJume’ woj mamni ama wooim betana âtiiaâ, wepu’ulaka juna’atune âtiiaâ. Pu’atopo in ji’ibwa’po, paanim komoniaka, am bwa’akame âtiiaâ. 21 Taa lutula wee’po, ju’u emo benasi yoemta betana junuen a’ ji’ojteituka’po aman, au chupne. Taa tu’isi ae betchi’bo jiokot machine, junae o’outawi, ju’u, yeu a’ bwiseka a’ nenkakamtau âtiiaâ. Che’a tu’i ean âtiiaâ, juna’a o’ou, jakwoo juni’i ka inim yeu tomteka’ateko âtiia. 22 Junak intok ju’u Jesus, ketuni am ji’ibwaosu, juname’e paanim, ka reberuakame, nu’uka, Liojtau bicha noksuka intok, am rebekta taiteka a’ majtimmet naas am na’ikimte taitek: âJibabu âtiakaiâ, ini’i juna’a, ju’u in taka benasi machik, enchim bwa’anee’u. 23 Juka’ pa’asi ba’awata aet auka’uta intok, nu’uka, Liojtau bicha nookak. Liojtau bicha au nokriasuka intok, junaka’a pa’asi ba’awata, bem a’ ji’ine’ betchi’bo, naas am maktaitek. 24 Intok: âIni’i juna’a âtiakaiâ, ju’u in ojbota benasi maachi. Liojta betana bemelasi lutu’uria ya’ari, juebenam betchi’bo wo’otineeme. 25 Lutula wee’po âtiiaâ, inika’a pa’asi ba’awata ne kaa’intok ne inim emo mak a’ ji’ine âtiiaâ. Taa taewai yuma’ane, junaman Lios yo’o nesaweka kateka’u, ta’abwi, bemelak pa’asi ba’awata in emo mak ji’inee’uta yuma’ane âtiia. 26 Junama’a intok, Liojtau bicha weyemta juka’ bwikta bwiikak. Junama’a intok, junuen ausuka, senu kawiu, tu’isi oliibo’ouwota auka’u bicha sajak. 27 Junama’a Jesus intok, inen ameu jiiak: âInie tukaariat, si’ime eme’e, neu aunemta betana emo womtaka, nee to’o tennine’em âtiiaâ. Bwe’ituk chupi’iseka weye ju’u Ji’ojtei inen jiame: “Bwaram womteka, na’ikim bem tennine’ betchi’bo, juka’ am suuamta ne me’enee”, ti jiia ju’u ji’ojtei. 28 Taa chukula intok, ne jiabijtesuko, bwia Kalilea’ tea’u bicha ne emo pat weene âtiia. 29 Junak intok, ju’u Peeo inen au jiiak: âEu aunemta betana, si’imem emo womtaka’ateko juni’i, inepone kaachin ino majjaituaka enchi to’o simbaeka’eene âti au jiiak. 30 Taa ju’u Jesus intok, aapo’ik inen yoopnak: âLutula wee’po âti au jiiakâ, ne inen ne eu jiia, inie tukaariat, totoi’o’owiata kee wosa a’ kukuseosu, empo, bajisi temaiwako, junalensu ket, bajisi, ka nee emo ta’aa tiune. 31 Taa ju’u Peeo, che’a juni san au ousi eetuaka: âKia nee a eemak muke’etek juni’i âtiiaâ, nee eemak mukne âtiiaâ, intok jiba ino enchi ta’aa tiakai. Jume’ waate juni’i, ket jiba junaensu jiian. 32 Junak intok, sajaka, Jetsemani’ tea’u yajak. Jesus intok, junama’a am joosaeka am tejwaak. Bwe’ituk bempo’immeu, ameu ili mekka, aapola, Liojtau bicha nokbaeka ean. 33 Taa juka’ Peo’ teamta nuk siika, intok juka’ Jakoobo’ teamta intok juka’ Joan teamta. Intok tu’isi au jachin eetuataitek. Intok ka au alleetuataitek. 34 Juname’e bajika intok, aamak sajakammeu: âIn jiapsi abe siok muke âti ameu jiakaâ, emo’em suuaka, im em taawa âti ameu jiiak. 35 Junak intok ju’u Jesus, jum a’ ane’epo, mekka jeela sikaa, bwiapo, tonommea kikteka, Liojtau bicha nokbaekai, jumak juni’i, junama’a lautipo, ka ine’e maisi machik au weyemta, ka utte’atune, ti eakai. Intok Liojtau bicha nokaka, inen jiiak: âIn achai âtiiaâ, empo che’a, si’imeta a jooa. Inika’a neu weyemta, empo a omot bicha, ta’abwisi a’ kuaktaka’ateko, junuen aune. Taa ka in junen ea’po, taa em ea’po amantune. 37 Junak intok, jume’ baji a’ majtim, a’ to’o sika’apo aman, ameu yepsaka, kokocheme teaka, Simotau: âJaisa empo koche Simo âti a’ temaekâ. Jaisa empo kia chubala juni’i, ka kocheka a aane âtiiaâ. 38 Ka tu’uwata ka enchim ya’ane’ betchi’bo, aet emo suuaka Liotau bicha noka’em âti ameu jiiakâ. Bwe’ituk ju’u jiapsi ala, tu’uwau bicha jiba ea, taa ju’u enchim takaa, ka ama aawe âtiia. 39 Intok juchi’intok, bat naataka, Liojtau bicha nok betchi’bo, tonommea a’ kikteka’u bicha sikaa, junaman, jiba junaka’a, bat naataka junaman a’ teuwaa’uta nookak. 40 Junak intok, jume’ baji a’ majtim a’ to’o sika’apo aman ameu yepsaka, juchi kokocheme teak. Bwe’ituk juname’e intok bem yete kokkolamtuka’ betchi’bo, kia kaita nok machiakan, juchi bem kokocheka teuwaaka’ betchi’bo. 41 Bajisi junuen auka beja, juchi juname’e bajimmeu notteka: âJaisa eme’e ketuni kokoche âtiiaâ, intok ketuni yum jo’ewamta weetua âti am temaekâ. Jote’embu âtiiaâ. Eme’e jaibu kaachin an machi. Bwe’ituk yuma’asuk ju’u in teuwaaka’u, emo benasi inim yoemtukame, ka tu’i jiapsi yoemem mampo a’ su’u tojinaa’u. 42 Japte’em. Bwe’ituk a’abo weye ju’u nee yeu bwiseka, nee nenkineeme. 43 Ket a’ nokaosu intok, ju’u Juuras Ijkarioote’ teame bat naataka woj mamni ama wooi a’ majtimpo na’ikiarituka’u, juebena yoememmak ama Jesujtau yepsak. Te’opopo saiwame, bem yo’o ya’uram betana intok junama’a yoemrapo che’a ama yo’o ya’arim betana, intok junama’a bem maejtom betana, aman bittuarimtakai. Waate tettebem kukuche’eka kaaten. Wate intok bwere kutam mampo machu’utisakan. 44 Ju’u yeu a’ bwijneeme intok a’ nenkineeme, jaibu senu machilaata am maklatakai, inen ameu jiulatukan: âTe aman yajako âtiakaâ, waka’a a’ pujbawapo, in aet tentenee’u, junaka’a, eme’e, tu’isi a’ suuaka a’ bwiseka a’ weeyane âti ameu jiulatukan. 45 Intok ama yajaka, ju’u Juraj Ijkarioote’ teame, Jesujtau rukteka, a’ pujbawapo aet tenteka: âYee mamajtame âti au jiiak. 46 Junak intok juname’e, junuen bem tejwarimtuka’po aman, Jesujta bwisekamme. 47 Jesujta majtim betana intok, seenu, a’ bainapo jume’ tebe kuchi’im yeu wikeka, te’opopo nesawemta a’ nesaureowata aman bittuarita, naka chukta’a beebak. 48 Jesus intok, ameu nokaka: âJaisa nee etbwareotuka’a benasia eme’e, mampo kuche’eka, intok kutam machu’uteka a’abo nee bwij betchi’bo, a’abo neu yajak âti am temaekâ. 49 Kati’ikun nee chikti ta’apo, emomak jum te’opopo aneka intok yee majtan. Junama’a intok jaisaakai eme’e ka nee bwisek âti am temaekâ. Taa juka’ ji’ojteita junuen a’ chupne’ betchi’bo, utte’a inien a’ ya’atune’po âtiia. 50 Junama san, jume’ a’ majtim, si’ime a’ to’o tennek. 51 Taa seenu, ju’ubwa yo’otume, ka tajo’oreka taa kia bwe’u tosai tajo’orimmea au ropti jintuarika, junama’a Jesujtaimmak ama aanen. Junak intok, jume’e, Jesujta junuen bwisekame, ket junaka’a ju’ubwa yo’otumta aamak weeyabaeka, ammea au a’ jintuarim bwisek. 52 Taa juna’a intok, am mamajuka, jume’ a’ jineka’um, bem mampo a’ to’o buiteka, ama yo’eeka, june’elaka siika. 53 Jesujta intok, te’opopo che’a yo’o ya’ataka, nesawemta jo’au tojiwak. Junama’a intok, si’ime jume’ ama te’opopo ju’u yo’oora intok junama’a yoemrapo ama yo’o ya’arime ama aanen. Intok si’ime jume’ junama’a bem maejtom. 54 Taa ju’u Peo’ teame, a’ weeyawao, ili mekka, aet cha’aka weyen. Intok a’ junama’a jo’ara mayoau tajtia aamak yepsak. Te’opopo yo’o ya’ataka nesawemtau a’ tojiwako. Intok ama saiwammak, tajimmeu kateka sukawen ju’u Peeo. 55 Intok junama’a, ju’u yo’oora, jum te’opopo nesaweme, intok si’ime ju’u ya’uraa, Jesujta me’ betchi’bo, watem, jitat, ka tu’ikut betana, a’ me’etune’ betchi’bo, a’ na’atejonemta waatan. Taam kaabeta teak. 56 Bwe’ituk juebenaka, aa noki’ichiata, ka tu’ik ae tana nookan. Taa bem aet noka’u, intok aetana a’ waatiawa’po aman, ka ama yeu weaman. Bwe’ituk utte’atukan, wooi oo baji yoemem, nanancha bem a’ teuwaane’ betchi’bo, juka’ bem a’ na’atejonee’uta. 57 Junak intok, waate, a’ beje’eka, aa noki’ichiata nok japtek inenim jiakai: 58 âItepote che’a, inika’a inen ti jiamta te jikkajila. Aapo, ika’a te’opota, maamea ya’arita au tatapne, tiia. Baji ta’apo intok, ta’abwi te’opota, ka maamea ya’atunemta au ya’ane’etiia. 59 Taa junuentak juni’i, a’ beje’eka bem teuwaa’u, ka nanancha a’ teuwaak. A’ waatiawa’po aman ka yeu weaman. 60 Junak intok ju’u te’opopo che’a yo’otaka, ama nesaweme, nasuk kikteka, Jesujtau: âJaisa empo kaita am yoopna machi âti a’ temaekâ. Inika’a weemta enchi beje’eka nokammewi. Jaisa lutu’uria ja’ani, bem et noka’uta âti a’ temaek. 61 Taa aapo intok, ju’u Jesus, tua kaita am yoopnariak. Juchi intok ju’u te’opopo che’a yo’otaka ama nesaweme, juchi au nattemaeka: âJaisa empo juna’a ja’ani, ju’u Krijto âti a’ temaekâ. Intok ju’u, tua yo’oriwamta Liojta betana, empo usiwai âti a’ temaek. 62 Junak san beja, ju’u Jesus: âInepo juna’a âti au jiiakâ. Intok juka’ Liojta usiwaita empo bitne, Liojta, si’ime utte’awata betana, intok a’ batatana katekamta bitne. Intok ket, namupo a’abo ko’om weyemta’e’e bitne âti au jiiak. 63 Junak intok ju’u te’opopo, che’a ama yo’o ya’arime, kujteerimmea, au supe siuti wikeka, ama anemmeu inen jiiak: âI’an, junuen a’ nokaka’ betchi’bo âtiiaâ, junuet a’ nok bwijlataka, intok a’ beje’eka aet nokneeme, kaabe intok waatiatune âtiiaâ. 64 Eme’e a’ jikkajila, junuen ju’enasi a’ jiaka’po. Jaisa emou maachi âti am temaek. Juname’e intok, si’ime, a’ me’e i’aka nookan. 65 Waate intok, aet chit watti japtek. Intok a’ puj suma’ika, a’ beebaka, inen au jiian: âNoolia âtiianâ, itom tejwaa jabeta ju’u enchi choname âtim au jiakai. Jume’ waate intok, ama saiwame, a’ chonaka, ko’okosi a’ jooan. 66 Te’opopo che’a yo’o ya’arita, jamut nesaureowa aman ko’om siika. Peota intok junama’a betuk a’ ane’epo, 67 tajimmeu sukawemta bichaka, tu’isi a’ bitchuka, inen au jiiak: âJaisa empo ket, Jesuj nasareeno’ teamtamak empo weaman ketchia âti au nattemaek. 68 Taa aapo ju’u Peeo intok: âTua ne ka’a ta’aa junaka’a âti au jiiakâ. Intok ne kia ka ju’unea jachin em neu jia’apo âtiia. Intok junama’a, ama yeu rejtiwa’po, pa’akun bicha yeu siika. Intok ju’u totoi’o’owia kukusek. 69 Ju’u jamut nesaureo intok, juchi a’ bichaka, ama anemmeu inen jiiak: âIni’i ket juna’a, Jesujtaim betana weyeme âtiia. 70 Taa ju’u Peeo intok, juchi, ka’a lutu’uria’atiaka nookan. Intok juchi intok, chukula, jume’ ama aneme: âLutula wee’po âtiianâ, empo amemak weaman âtim Peotau jiianâ, intok’e Kalileotakai. Bwe’ituk bempo’im benak nooka. 71 Taa ju’u Peeo, tua a’ sualna’ betchi’bo inien au noktaitek: âTua ne ka’a ta’aa junaka’a o’outa âtiiaâ, enchim nee aamak weama tia’u. Intok ka tu’uwa neu a’aune’uta net aune’etiia, in noki ka lutu’uriatuko âtiia. 72 Junak intok ju’u totoi’o’owia, iniamak nau, jaibu wosa kukujlatukan. Junak intok ju’u Peeo, Jesujta au nokaka’utau wawaateka, inen au a’ jiaka’po: “Juka’ totoi’o’owia kee wosa kukuseo, empo bajisi netana temaiwaka’ateko, junama’a empo ket junalensu, ket bajisi, ka emo nee ta’aa tiune.” Peeo intok, junuen au nokwakamtau wawaateka, bwan taitek.