2 Tesalonika 3

1 Nmî tîdê mbwó yoo, nmî lêêê dîyêo dmyina a ngêpê. U yi nmo a kwo, Nmî Lémi ngê choo a ngêêpî nmo, pi yilî knî yêoo u kópu dyuu u ngwo paa nyêee yêe. Myenté, u kópu dyuu ka ntee nmyi kêlîmî mbê dniye, ala wee u kwo pi yilî yinté u kwo myepaa kêlîmî mbê dniye. 2 Nmî lêêê dîyêo myedmyina a ngêpê, nmî Lémi ngê yoo dono yi kêlê paa dyé nmîne. Nmyi lama ka tóó, pi yilî nmî Lémi ka daa kêlîmî té. 3 Ngmênê nmî Lémi ka nmye kêlîmî té, ntênê daawa dóó nmyo. Nmyi gha dmi wa wêdêwêdê kalê té, Setan kwulo wa dyé nmyo. 4 Nmî lama ka tóó, nmî Lémi ngê wunê ngêêpî nmyo, kópuni nmye nmêuu vyi too, yi kópu nmye dêuudêuu têoo, kópuni ala ngwo nmînê dêêêdêêê té, yi kópu amyenmyinêaa dêuudêuu dé. 5 U yi nmo a kwo, Nmî Lémi ngê ala kópu nmyi lama a kalê ngê, nmî nuu ghi dmi nmî Mî nódo ntênê a tóó. Myenté, Yesu Kédisu ngê dono yilî ntee doo a vyîmî, u vyîmî pyu ngê yinté paa pyódu nmyine. 6 Nmî tîdê mbwó yoo, nmî Lémi Yesu Kédisu u pi ngê ala kópu nmye nmînê tpapê. Yesu u yoo vyêo yélini a lîme nyédi, myedaa dpodo nyédi, yi yéli yi vyêo a pwii dmyeno, nmî dnye dmi daa nyêmî têoo. 7 Nmyi lama ka tóó, nmyi vyêo dênmee a mgeemgee. Nmyi vyêo ntee nmee a dpodo, yinté myedmyina a dpodo. 8 Nmyi ntépînâ knî yi kêoo dênmeenêaa kmaapî, ngmênê wêêênî mgîdî vyêo nmeenêaa dpodo. Yi dpodo têdê nmî chóó nmî ndapî nmee kmênêkmênê, mu kópu u dîyêo u yi nmo dêpwo kwo, Nté ndapî nmo dnyêoo a kuwo. 9 U ntââ nté ndapî nmye pêoo dmyêee doo, u kópu daapodoo ya, ngmênê tpile nmye dpîpêe dmyêee ngê, mu kópu u dîyêo u yi nmo doo kwo, nê, Nmî pêuu pîdnyêoo a mtyîmwe ngêêpî. 10 Dini ghi nêii ngê nmyi vyêo nmeenêaa kwo, munmyenê, Nêii daachoo dpodo knomomê, nté kîmê pîpî. 11 Yi kópu dé nmye dpêo vyi té, mu kópu u dîyêo ala kópu kudêo nyêoo, nmyi vyêo pi knî ngmê daa dpodo nyédi, a lîme nyédi, daa yi kêoo ghê wumê mbumu nyédi. 12 Nmî Lémi Yesu Kédisu u pi ngê yi yéli yi kuwó dmyinê mbumu, yipi, Nuwêo ngê dmyinê paa, kîlî dmyinê dpodo, nmyi ndapî nmyi chóó dmyinê kmênêkmênê. 13 Nmî tîdê mbwó yoo, dmyina a mbêaambêaa, kîdmyenêngê yé ngmê. 14 Nêii ngê nmî kópu dyuu daawa nyêee knomomê, dpî mya yó, kpeme u kwo dpî yaa dmyeno, mywene u ngwo paa ghê we. 15 Dpodombiyêe u kwo nangmê nodêe, mu kópu u dîyêo nmyi mbwó, ngmênê u kwo dmyinê kwódu yé. 16 Nmî Lémi, nêii ngê u kwo dpo kââdî nmo, dye ghi yintómu mbêaambêaa ngê nmye choo a vyuwo. Kêomo tpile ló kópu nmye ngmêdê pyaa knomomê, nmye myechoo a vyuwo, kîdangê kuwo nmyo. 17 Nê Póól, ala kópu dyuu a chóó a kêê ngê nêaa dêêêdêêê. A dêêê a mya yó, alanté nêaa dêêê yédi. 18 Nmyo yintómu, nmî Lémi Yesu Kédisu ntênê nmye choo a vyuwo. Wu u dî.