Hipîlu 1

1 A tîdê mbwó yoo, nmî lama ka tóó wunê nêii knî yêoo Chóó Lémi u komo dnyimo a kapî, yi yéli yêoo nmî knêââ knî ye daa kópu ngmidi dnyimo a tpapê, ye dnyimo a mgongo, ntênê ye myednyimo a danê, 2 ngmênê nmî dye ghi ngê Chóó Lémi ngê Tpêoo nmo a dyêââ ngê, u Mî komo nmo yinê mî kââ. Vyîlo yi pini Chóó Lémi kêii tpile yintómu nipi lêâmo ngópu. Kuwókuwó wéni ngê tpile yilî yintómu yi kada pini ngê vyîlo ayi pyódu. 3 Tpêoo pêuu nmo wêee ngê, nê, Chóó Lémi u pi ndîî, dyââpe pêuu daangma a têa. Chóó Lémi ntee a tóó, Tpêoo ndêndê mye yinté. Tpile yilî yintómu knî ye vyîlo yiwunê vyuwo, chóó u kópu mbêmê wunê mbêpê kîgha té. Dini ghi nêii ngê nmî dono chedê too, u Mî ka mê diyé wo, u che pêââ pee ngê mî pyodo. 4 Pi woni knî yêoo enjel yoo mbêaambêaa ngê a chââchââ tumo, ngmênê nmî Mî Tpêoo u pi ndîî, enjel yoo yi pi dmi têdê. Nmî Mî Tpêoo kada mê tóó, enjel yoo kuwó mê pyede. 5 Chóó Lémi ngê Tpêoo u pi ndîî ngê pyódu ngê, kwo, Nyi a tpêee, ngmênê enjel ngmê ka daa vyu, Nyi a tpêee, awêde m̱î ngê dî pyódu. Myenté enjel ngmê pêuu daa vyu, A tpêee ngê wa pyódu, u mî ngê anî ya. 6 Tpêoo Kaa dyámê mbêmê ghêlî dêpê dyêââ ngê, Mósisi ngê komo alanté a kââ, ala kópu a dêêê ngê, apê, Chóó Lémi u enjel knî yêoo ntênê dnyêoo chââchââ. 7 Chóó Lémi u kópu enjel knî yi pêuu puku yedê alanté a tóó, Yópu lîmî ntee a dpodo nódó, enjel yoo Chóó Lémi pêuu yinté a dpodo nyédi. 8 Ngmênê Tpêoo pêuu Chóó Lémi u kópu puku yedê alanté a tóó, Yâpwo ndêndê, dye ghi yintómu ṉyoo anyi yêenê, chedê ngê daawa pyódu. Ṉyoo ntênê anyi yêenê. 9 Lêêê ghi mbêaa ṉuu u lêêê ghi dé, yoo dono u yi ṉga daa kwo. Yi kópu u lêêê dîyêo yâpwo ndêndê, ṉyâpwo ngê a ngmidi nyoo, ṉga mbêaambêaa ngê a pyódu ngê, wêaa u ngwo nyinê pywêângo, m̱yipe knî yêoo yintoo wêaa dêpê pywêee ngópu. 10 Ala kópu mye tóó, A Lémi, mwiyémwiyé dini ghi ngê dyámê pê nyi lêâmo ngê, ṉgêê dê yêoo mbóó nyi lêâmo ngê. 11 Yi tpile yilî yintómu chedê ngê wa pyaa dmi, ngmênê chedê ngê daanyi pyódu. Kpîdî ntee mbwee ngê dpî pyódu, mbóó dyámê yinté mbwee ngê amye pyaa knî. 12 Pi ngê u kpîdî ntee dpo kmongo, ntee myoo ngmêê, tpile yilî yintómu yinté amêii ngmêê té, ngmênê ntee nye tóó, dye ghi yintómu yinté anyi ya, daanyi dyênê. 13 Chóó Lémi ngê enjel ngmê ka daa vyu, M̱i ndîî ngê nêaa pyépi, a wéni pee dpî yey, pi yintómu chi yêenê dé. Yélini m̱êuu a lêêê té, dîyo anî vya té, ṉyi yodo u maknopwo wanî yé té. 14 Tpêoo ka yi kópu u mo vyu, enjel ngmê ka daa vyu. Tpêoo kada a tóó, enjel yoo kuwó a pyede. Enjel yoo ghê dmi dé, Chóó Lémi pêuu a dpodo nyédi. Yi dpodo têdê dpodo têdê dpî dyêââ té, yélini yi mbwámê ngê Tpêoo pyodo, yêoo a ngêêpî tumo.