Hipîlu 5

1 Kpêê yiyé pyu knî yêoo yi vyêo pini ngma a ngmidingmidi ngópu, yi kada pini ngê a pyépi ngópu, yoo yi lêêê dîyêo Chóó Lémi pêuu a dpodo yédi. Yoo yi dono yi lêêê dîyêo Chóó Lémi ka wumê kpêê yiyé yédi. 2 Nêii u lama Chóó Lémi u kópu dyuu dnyinté a kwo, dono kópu ngmêdpî dêuu knomomê, kpêê yiyé pyu u kwo dnyinté dpî nodêe, mu kópu u dîyêo yi kpêê yiyé pyu ngê dye ghi ngmê ngê myêoo dpî knêaadi. 3 Daa yoo yi mo yi dono knî yi lêêê dîyêo a kpêê yiyé yédi, ngmênê chóó u dono knî yi lêêê dîyêo mye kpêê yiyé yédi. 4 Pi ngê chóó u pi daa kmîmî ngê, dêuudpî vyi, Kpêê yiyé pyu yoo yi kada pini ngê nêaa pyodopyodo, ngmênê Chóó Lémi ngê Alon ntee a ngmidi ngê, kpêê yiyé pyu ngê a pyódu ngê, mye yinté, kpêê yiyé pyu nêii Chóó Lémi ngê dpo ngmidi, yi pini kada pini ngê dpî pyódu. 5 Yesu Kédisu mye yinté. Chóó u pi daa kmungo, chóó daa vyu, Nê kpêê yiyé pyu ndêndê, ngmênê Chóó Lémi ngê kwo, Nyi a tpêee, awêde m̱î ngê dî pyódu. 6 Myenté kwo, Nyi kpêê yiyé pyu ngmê, chedê ngê daanyi pyódu, Mélkisadek ntee pini ngê anyi ya. 7 Dini ghi nêii ngê Yesu dyámê mbêmê doo a paa, Chóó Lémi ka ngêpê têdê doo kââkââ, myedoo mbê, mu kópu u dîyêo u yi u ngwo dêpwo kwo, Ghêlî kêii nî pwêonu. Chóó Lémi ngê u ngêpê a nyongo, mu kópu u dîyêo u yi u ngwo doo kwo, Chóó Lémi u nuu u kópu dé ntênê mwiyé nî dêuu té. 8 Kêomo tpile Chóó Lémi Tpêoo, ngmênê Chóó Lémi daa kede wo, Tpêoo mgînî vyîmî têdê dyêââ ngê. Yesu myedaa kede wo, u mî u kópu u wépi daa puwâ, mgînî vyîmî têdê loo, 9 pi yilî yi Mbwámê ngê u ngwo pyodo. Nêii ngê u dnye adî nyêmî, u Mbwámê ngê adî ya, chedê ngê daawa pyódu. 10 Chóó Lémi ngê kpêê yiyé pyu ngê mye pyódu ngê, kwo, Mélkisadek ntee pini ngê anyi ya. 11 A tîdê mbwó yoo, u ya a nga a kwo, Yi kópu pêuu kópu yilî nmye nî vyi, ngmênê u kakêmê chámêchámê nmye dpodo ndîî, mu kópu u dîyêo nmyi mbodo dmi dîngîdîngî dé. 12 Yesu u yoo vyêo ló dini munmyinê ghê dniye, lukwe dîyêo ndiye kîgha pyu ngê dmyongê pyaa dniye. Chóó Lémi u kópu nêii nmyi ndê tumo, lukwe dîyêo dnyinté nmyi ndê tumo, woni dmyongê ndê tumo. Lukwe dîyêo nmye ngmo ndanî nyédi, nté wêdêwêdê dpêee pîpî ngmê. Nmyi nuwêo pwiipwii dé. 13 Nêii a ngmo ndanî yédi, yi pini tpómu ntee tpile, kópu mbêaa u dî u lama daa tóó. 14 Nté wêdêwêdê pyââwe mââwe knî yêoo vyîlo ye pîpî ngópu, yi nuwêo dmi Åépwi ngmê dé dono mbêaambêaa ntênê dpî mya dêoo.