1 PETƆLÀ 1

1 Mɛ Petɔlà, ntööm a Yɛsu Klistɔ, an’pà mbɔr akà baar kàsɔ̈ɔ̈l Nzam, bàfàkal u nsi a ingyey anà bàkyàpää u Pɔn, Ngalàtyà, Kapadɔs, Azi anà Bitini, 2 Taa Nzam kàlasɔ̈ɔ̈l kusà asànaa kàkwen nde, u mbwo a un’kyɛɛl a Dweelà, ntɔn bɛ làkäl anà unkyeey akà Yɛsu Klistɔ anà bàŋàpɔŋà u mbwo a an’kil ande. Wɛy kab a ngway anà duu màkäl mbɔɔn anà bɛ! 3 Wɛy nsaak ikäl akà Nzam, Taa a Mwol abi Yɛsu Klistɔ! Unsà ngyɛb ande yàkölàköl, nde kipɛ mɔ̈ɔ̈ akün ntɔn bi ikäl anà làkyän a mɔ̈ɔ̈ u mbwo a ngwiiyà a Yɛsu Klistɔ uboo a akü, 4 ntɔn mudil kwal alà kàlɔ̈ɔ̈n Nzam ntɔn baar ande. Kwal alà làkwe anki làtay, itàkal làbü ŋingyäy, itàkal làpiy ntwɛn a la bwà. Nde wàmulɔ̈ɔ̈nà la u du ntɔn bɛ, 5 bɛ baar ukatii nde kà unkaak a ngwal ande u mbwo a làkwikilà, ntɔn ngweel a mɔ̈ɔ̈ ayà isàmɛnà kà ilä a ntsüü. 6 Kyakin, bɛ làbàŋàyɔl a un’sak, itàkal naa u kitaaŋ bɛ làbà u ngyɛb u mbwo a nsii ifà ifà. 7 Ntɔn ntal a làkwikilà abɛ làŋàsii yan’söön ntal a wɔl alà làfàtay itàkal naa la ban’fub u mbaa. Lakwikilà alà làsàwal nsyäŋà, làkoo anà ibyääl umpal usàmɛnà Yɛsu Klistɔ. 8 Bɛ làfàkwen Yɛsu Klistɔ ukɔɔn akun’man. Apanà sye bɛ làbàmusà làkwikilà amu nde itàkal naa bɛ ŋàtuman anki, anà bɛ làbàmufuur a un’sak ifà asin anà wàlàkoo, 9 ntɔn bɛ lan’wal isin a làkwikilà abɛ: ngweel a mɔ̈ɔ̈ abɛ. 10 Aŋangɔɔm bàleŋ anà bàbaal pànsi pànsi ngweel a mɔ̈ɔ̈ ayi, anà ba bàtɛ ngɔɔm ntɔn kab a ngway alà kàlɔ̈ɔ̈n Nzam ntɔn bɛ. 11 Ba bàleŋà naa paŋà nà, naa sye ndaa nà isàkal asànaa kàkyään Dweelà a Klistɔ kàkäl uboo a ba, umpal kàkyään nde mpay isàkal akà Klistɔ kusà anà làkoo ande làsàyà ungö. 12 Nzam kàmɛɛy akà aŋangɔɔm naa isal aki kà kyàkäl ntɔn ba ŋakwo anki, wɛɛ ba kya bàkyerà ntɔn bɛ. Ntɔn, apanà indiir ibi, alɔɔŋ a Làsaŋ Aŋàbwaŋ bàlakyäänà bya u mbwo a ngwal a Dweelà In’kyɛɛl kàtöm Nzam fà du. Akyeey, ba ŋakwo bàkwen musà ileer aba unsà bya. 13 Kyakin, làyöŋà an’kyän abɛ ntɔn isal, làkäl unsà làbɔ̈ɔ̈n, làsi làkyän abɛ lanswà unsà kab a ngway alà bàlatwääl kà ilä a mɛɛy a Yɛsu Klistɔ. 14 Asànaa baan a unkyeey, twon lan’lab ilään a ndür làkäl bɛ akyà umpal làkäl bɛ aŋàdiimà, 15 wɛɛ ifà imwɛy asànaa mbuur kàlabel wà in’kyɛɛl, wɛy bɛ làkäl bà in’kyɛɛl unsà nkääl abɛ yanswà, 16 ntɔn, bàsön naa: « Bɛ làsàkal bà ŋin’kyɛɛl, ntɔn mɛ in’wà aŋin’kyɛɛl. » 17 Wɛɛ isàkal naa bɛ làfàbeel naa Taa, mbuur awà afàtsul nsaŋ, ukɔɔn un’kɔl aŋàyↄŋ akà mbuur wanswà unsà isal ande, làkäl unsà bɔɔmà sye umpal làbà bɛ pà u mɛɛn. 18 Làyöb naa kà unsà indiir aŋàkwà anki, asànaa ngim, itàkal wɔl, waa bàlabeen unsà nkääl a ube làwɛl bɛ akà ataaràbɛ. 19 Aay, bɛ bàlabeen unsà an’kil a ntal a Klistɔ, asànaa mwan a un’kɔk akɔ̈ɔ̈n too itàkal làbiin, 20 awà bàtöm kusà mutàkyer du anà mɛɛn, anà bun’swɛŋ kà ilä a ntsüü ntɔn bɛ. 21 U mbwo a nde, bɛ làfàsà làkwikilà amu Nzam awà kun’wiiy uboo a akü, anà kun’pɛ làkoo, ntɔn làkwikilà anà làkyän abɛ màkäl amu Nzam. 22 Bɛ làpöŋ mɔ̈ɔ̈ abɛ u mbwo a unkyeey akà ndandaa, ntɔn bɛ làkwen bɛ a bɛ ukɔɔn akal ayà mpem yweel. Wɛy ukwen a mpem a pɛɛlà anà bà ipepey bàkäl uboo a bɛ. 23 Ntɔn bɛ bàlabör u mɔ̈ɔ̈ akün, kà u mbwo a imbɛŋ kyan’kwo mukwà anki, wɛɛ u mbwo a imbɛŋ mpa kyan’kwo mukwà, unsà ndaa a Nzam ayà mɔ̈ɔ̈ anà yà mbul a in’tye. 24 Ntɔn: mbuur wanswà wà asànaa un’lɛŋ aŋàyɔm, anà làkoo ande lanswà là asànaa iful a un’lɛŋ, un’lɛŋ usàyɔm, iful ande kyan’bwà, 25 wɛɛ ndaa a Mwol yà mbul a in’tye. Kyekà, ndaa ayi, yà Làsaŋ Aŋàbwaŋ alà bàlakyään.