ƐBƐLYƆ 1

1 Itaan, Nzam kàyäämà anà ankaa abi, mbalà mbɔɔn, u ntɛɛn yà ifà ifà, u mbwo a aŋangɔɔm. 2 Wɛɛ apanà, u paŋà a ntsüü ibà bi là, nde kàyääm anà bi u mbwo a Mwan awà kàsi nde ŋakwal a indiir byanswà, u mbwo a nde sye nde kàkyer mɛɛn manswà. 3 Mwan awà wà pɛɛlà a làkoo ande anà idiim muswaŋ naa Nzam wà aben, anà nde afàkaar indiir byanswà unsà ngwal a ndaa ande. Ungö mupöŋ man’be a baar, nde kàkàbwaay u du u kɔɔ a ibaal a Nzam aŋàsöön ngwal yanswà. 4 Mwan kàbulà wàŋàsöön akyeey, waa Nzam kun’pɛ ikɔb aŋàsöönà kyà ba. 5 Kyakin, nde kàtɛn anki akà ikikye akà un’kyeey mwɛy naa: « Ngye awà Mwan amɛ, mɛ amàbɔr ŋàbà. » Anà sye: « Mɛ in’yàkal Taarànde anà nde ayàkal Mwan amɛ. » 6 Wɛɛ, umpal ubiil nde nswɛm u mɛɛn, nde kan’tɛn naa: « Wɛy akyeey a Nzam banswà bun’kömà. » 7 Ntɔn akyeey, nde kan’tɛn naa: « Nde akyeey ande afabuul an’dweelà, anà asyääl ande làlem a mbaa. » 8 Wɛɛ ntɔn Mwan, nde kan’tɛn naa: « Kir angye là imwol, Nzam, làŋàsà ntɔn mbul a in’tye, ngye imwol angye afàyaal a swalaa. 9 Ngye kàkwen balàbal anà kàyiiŋ ube, kyakin Nzam, Nzam angye, kàtsüül nde may a un’kyɔm aŋàsöön atɔŋ angye. » 10 Nde an’fàtɛn sye naa: « Inye, Mwol, u nsɛmà ngye kàsi in’bään a mɛɛn, du là isal a an’kɔɔ angye. 11 Bya byàkyer asàkwà, wɛɛ ngye, ngye awe anà mɔ̈ɔ̈. Bya byanswà byàsànün asànaa ipfɛy, 12 ngye asabwɛlà asànaa ufàbwɛlà kàzak, ngye asasɔɔm asànaa ipfɛy. Wɛɛ ngye, ngye awà ifà imwɛy, mbul angye isàwà anki. » 13 Nzam kàtɛn anki akà un’kyeey ande mwɛy naa: « Bwaay u kɔɔ amɛ là ibaal, tii mpal in’sàsà mɛ ayiiŋ angye ungyɛl in’kɔl angye. » 14 Kyekà akyeey bà an’dweelà unsà isal a Nzam. Nde afatɔm musyääl baar bàsàwal kwal a mɔ̈ɔ̈.