YWAN 1

1 U nsɛmà kàkäl Ndaa, Ndaa kàkäl anà Nzam, Ndaa kàkäl Nzam. 2 Nde kàkäl u nsɛmà anà Nzam. 3 Indiir byanswà bàkyer u mbwo a nde, kà we anà undiir anki bàkɔ̈ɔ̈n akyer u mbwo a nde. 4 Mɔ̈ɔ̈ kàkäl amu nde, mɔ̈ɔ̈ wa kàkäl pɛɛlà a baar. 5 Pɛɛlà wàmunyɛŋ uboo a mpib, wɛɛ mpib bun’yöb anki. 6 Kàkäl anà mbuur mwɛy, ntööm a Nzam, ikɔb ande Ywan. 7 Nde kàyi asànaa mbäl, ntɔn mutɛɛl pɛɛlà imbäl, ntɔn baar banswà bàsi làkwikilà u mbwo a nde. 8 Nde kàkäl anki pɛɛlà, wɛɛ nde kàkäl ntɔn mutɛɛl pɛɛlà imbäl. 9 Ndaa kàkäl pɛɛlà a ndandaa. Kàyi nde u mɛɛn, nde àfàpà kyɛɛy akà mbuur wanswà. 10 Nde kàkäl u mɛɛn, mɛɛn màyàmɛnà u mbwo ande, wɛɛ mɛɛn mun’yöb anki. 11 Nde kàyi ntsü akà bànde ŋakwo, wɛɛ ba bun’wɛl anki. 12 Wɛɛ akà baar bun’wɛl, akà baar bàfàsà làkwikilà kà ikɔb ande, nde kapɛ ikɔ̈b mubulà baan a Nzam. 13 Baar abanà babör anki unsà an’kil, itàkal unsà ukwen a ndür, itàkal unsà ukwen a mbuur, wɛɛ unsà ukwen a Nzam. 14 Ndaa kàbwäär ndür, nde kàkäl uboo a bi, wàŋàyɔl a kab a ngway anà ndandaa. Bi kàkyàman làkoo ande, làkoo a Mwan baal mwɛy mpɛl kàfü akà Taa. 15 Ywan amun’tɛɛl imbäl, waa kan’kyään naa: « Le mbuur akwà kàtɛn mɛ naa: “Mbuur awayà ungö a mɛ kàfweel kusà a mɛ, ntɔn nde kàkäl kusà a mɛ.” » 16 Abun, unsà ukwà ande, bi banswà kàwɛl kab a ngway udu a kab a ngway. 17 Isàkal naa un’kɔɔn bàpɛ u mbwo a Mɔsɛ, kab a ngway anà ndandaa byàyi u mbwo a Yɛsu Klistɔ. 18 Akà mbuur mwɛy kàmɛn anki Nzam akà ikikye, Mwan baal mwɛy mpɛl awà Nzam, awà uboo a Taa kà imɛɛy awà. 19 Le imbäl kàtɛ Ywan mpal amfum a Ayudà a Yɛlusàlɛm bun’tööm ba angaŋ anà alɛwi ntɔn mukun’fuul naa: « Ngye, ngye awà nà? » 20 Nde kàkyer kyey mufuur, waa kàtɛn naa: « Mɛ, mɛ kà in’wà Klistɔ anki. » 21 Waa ba bun’fuul naa: « Waa ngye awà nà bà? Nkye ngye awà Ɛli? » Nde kàfuur naa: « Aay, mɛ kà in’wà nde anki. » - « Nkye ngye awà Ŋangɔɔm? » Nde kàfuur naa: « Aay. » 22 Abun, ba bàtɛn a nde naa: « Ngye awà nà bà? Ntɔn bi ikàpà mfuur akà baar bitöm. Ngye atɛn aben ntɔn ngye ŋakwo? » 23 Nde kàtɛn naa: « Mɛ, mɛ in’wà “ndaa a mbuur ifàsà in’kwɛŋ u nsye a ipɔl: Làlɔ̈ɔ̈n alää mbwo a Mwol!” » asànaa kàtɛn ŋangɔɔm Yɛsay. 24 Kyekà baar abà bàtöm bàkäl Amfarisi. 25 Ba bàläb mufun’fuul, waa bàtɛn naa: « Isàkal naa ngye kà Klistɔ anki, itàkal Ɛli, itàkal Ŋangɔɔm, ntɔn nkye akadümà ngye? » 26 Ywan kàfuur naa: « Mɛ, mɛ in’kadümà kà an’dà. Uboo a bɛ we anà mbuur mwɛy mpa làyöb bɛ, 27 nde wàmuyà ungö a mɛ. Mɛ in’kwe anki musɔɔl in’siŋ a idyäär ande. » 28 Indiir abi byanswà byàlyaaŋà u Bɛtani, u sim a Yɔrdan, mper kàfadümà Ywan. 29 Taaŋtyà, nde kan’man Yɛsu wàmuyà ntsü akà nde, waa kàtɛn naa: « Le Mwan a un’kɔk a Nzam awalwom man’be a mɛɛn. 30 Awà mbuur akwà kàtɛn mɛ naa: “Ungö a mɛ, we anà mbuur ayà, nde kàfweel itaan, ntɔn nde kàkyàtàkal." 31 Mɛ ŋakwo sye kun’yöbà anki. Wɛɛ ntɔn nde muyàmɛnà akà un’sɛŋ a Isàlɛl, waa mɛ kàyi mudümà kà an’dà. » 32 Ywan kàtɛ imbäl ande naa: « Mɛ, mɛ kàmɛn Dweelà kan’fà du, kan’yàtyà asànaa yem, waa kàn’yàbwaay udu a nde. 33 Mɛ, mɛ kun’yöbà anki, wɛɛ mbuur akwà kan’töm mudümà kà an’dà, kan’kyään naa: “Mbuur ayàman ngye naa Dweelà kan’yàtyà anà kan’yàbwaay udu a nde, nde awun ayàdümà u Dweelà In’kyɛɛl." 34 Mɛ, mɛ kàkyàman anà kàkyàtà imbäl naa nde, nde wà Mwan a Nzam. » 35 Taaŋtyà, Ywan kàfàkal ikal nsil kya anà alɔŋki abɔ̈ɔ̈l uboo alɔŋki ande. 36 Mpal kàsyebà nde Yɛsu wàmulyaaŋ, nde kàtɛn naa: « Le Mwan a un’kɔk a Nzam! » 37 Alɔŋki abà bàbɔ̈ɔ̈l bàwem ndaa kàtɛn Ywan, ba bàläb Yɛsu. 38 Yɛsu kàbulà ungö, waa kàmɛn ba bàmuyun’lab, nde kafuul naa: « Ininà bɛ làleŋà? » Ba bàfuur naa: « Rabi - iswaŋà naa Un’lɔɔŋ - ngye afàkal ken? » 39 Nde kàtɛn a ba naa: « Làyi, waa bɛ làkàman. » Apan sye laa bun’läb ba, bàmɛn ba ikal kàfakalà nde, waa bàkäl apà nde ilä akin, la làkäl taaŋ lànà ungö a midi. 40 Andrɛ, un’tɔŋ a Simɔn Petɔlà, kàkäl umwɛy uboo a abɔ̈ɔ̈l bàwem Ywan anà bàläb Yɛsu. 41 Kusà a nde mukàman mbuur asin, nde kàtàkàman un’tɔŋ ande ŋakwo Simɔn, waa kàtɛn a nde naa: « Bi kan’swaal Mɛsya! » Ikaswaŋà naa « Klistɔ ». – 42 Nde kun’syen akà Yɛsu. Yɛsu kun’ler a lää, waa kàtɛn a nde naa: « Ngye, ngye awà Simɔn, mwan a Ywan, ngye, ngye bàyabeelà Sɛfas. » Ikɔb aki ikaswaŋà naa Petɔlà. 43 U taaŋtyà, Yɛsu kàwɛl an’kyän mukyà Ngalilɛ. Nde kàbwey a Filipo, waa kàtɛn a nde naa: « Yan’läb! » 44 Kyekà Filipo kàkäl un’nsi Bɛtesayidà, bul làmwɛy anà Andrɛ anà Petɔlà. 45 Nde kàkàman Natanayɛl, waa kun’kyään naa: « Bi, bi ban’swaal mbuur akwà bàsön unsà Un’kɔɔn a Mɔsɛ anà unsà aŋangɔɔm. Mbuur wa Yɛsu, mwan a Yɔsɛfi, un’nsi Nasàlɛr. » 46 Natanayɛl waa kàtɛn a nde naa: « Nkye undiir aŋàbwaŋ sye kan’kwo utoo u Nasàlɛr? » Filipo naa: « Yà, man. » 47 Umpal kàmɛn Yɛsu Natanayɛl wàmuyàsin tsütsü apà nde, nde kàtɛn ntɔn nde naa: « Le un’nsi Isàlɛl umwɛy wà ndandaa, awà akɔ̈ɔ̈n loor uboo a nde. » 48 Natanayɛl kun’fuul naa: « Ngye mɛ an’yöb aben? » Yɛsu naa: « Kusà Filipo mutabel, mɛ amɛn itaan umpal akäl ngye u ngyɛl a un’te a fige. » 49 Apan Natanayɛl kàfàfuur naa: « Rabi, ngye, ngye awà Mwan a Nzam, ngye, ngye awà mfum a Isàlɛl! » 50 Yɛsu kun’fuur naa: « Nkye ntɔn amakyään mɛ naa: mɛ amɛn u ngyɛl a un’te a fige, waa ngye an’sà làkwikilà? Ngye, ngye ayàman indiir mbɔɔn byan’söön bi. » 51 Nde kàfàkwɛy naa: « Ndandaa, ndandaa mɛ alàkyään, bɛ làsàman du lan’dubà, akyeey a Nzam bàmubeenà anà bàmutyà udu a Mwan a mbuur! »