MALAKƆ 6

1 Yɛsu kàlwomà kà ikal akin, waa kan’yà bul ande, alɔŋki ande bàkäl mukun’lab. 2 Ilä a saba, nde kàsɛmà mulɔŋ u ndwà a nköŋ a Ayudà. Baar mbɔɔn bàweemà nde bàkäl mubem, waa bàtɛɛnà naa: « Nde indiir abi byan’fà ken? Amà an’yeerà a nkye ifà bun’pɛ, waa an’kɔɔ ande ikakyerà isal a ngwal a ngwal a tub abi? 3 Nkye nde kà sharpantye anki, mwan a Màlye, un’tɔŋ a Zyak, anà Yɔsɛ, anà Yude, anà Simɔn? Nkye atɔŋ ande bakaar kà bà anki uboo a bi apà? » Kyakin bàbööl ba kyà ntɔn làkwikilà aba. 4 Apan Yɛsu kàtɛɛnà a ba naa: « Ŋangɔɔm bàfun’bɛy nà u bul ande, u mbil ande anà u ndwà ande mpɛl. » 5 Nde kàsàkwo anki mukyer akà impà mwɛy kwo, wɛɛ nde kàsi nà an’kɔɔ udu a ndam a aŋatoo, waa kakɔɔr. 6 Nde kàbemà ntɔn mpa bàkäl ba anà làkwikilà. Ntööm atàtwɛb yà alɔŋki kwem aŋiyweel (Màt 10.5-15; Luk 9.1-6) Ungö apan nde kàyilyaaŋà kan’bul a tsütsü muyilɔŋ. 7 Nde kàbel Bàkwem Aŋiyweel, kàsɛmà mukatɔm abɔ̈ɔ̈l abɔ̈ɔ̈l, kapɛ ikɔ̈b udu a an’dweelà an’be, 8 waa kaswɛŋ naa: « Twon lan’wal akà undiir mwɛy ntɔn mbwo, nà unsɔk mpɛl. Twon lan’wal isaa adyà, itàkal ngɔɔr, itàkal ngim uboo a un’di, 9 wɛɛ làbwäär idyaar, twon lan’bwaar an’kàzak an’mɔ̈ɔ̈l. » 10 Nde kàfàtɛn a ba naa: « Isàkal naa kà ikal imwɛy, bɛ lan’bilà u ndwà mwɛy, làbwaay paa tii umpal làsàlwomà bɛ kà ikal akin. 11 Isàkal naa kà ikal imwɛy bàlawɛl anki, bàlawem anki, làlwomà apan, làkɔɔb un’twà a in’kɔl abɛ. Kya isàkal imbäl ntɔn ba. » 12 Alɔŋki bàkyen ba, ba bàkyäänà naa baar bàkyer abuul mpem. 13 Ba bàyiböŋà insɔŋà mbɔɔn, bàkiirà aŋatoo mbɔɔn may, waa bakɔɔrà. 14 Mfum Ɛlɔdi kàwem naa bàtaa Yɛsu din, ntɔn ikɔb ande kyàtoo làpaan. Baar bàtɛɛnà naa: « Ywan Un’düümà kan’wiyà kukwà! Undiir awun awà nde anà ikɔ̈b mukyer indiir a ngwal a ngwal. » 15 Bumwɛy bàtɛɛnà naa: « Nde wà Ɛli. » Bamwey sye naa: « Nde wà ŋangɔɔm asànaa umwɛy uboo a aŋangɔɔm. » 16 Mpal kàwem Ɛlɔdi ndaa ayi, nde kàtɛɛnà naa: « Ywan akwà kàtsül mɛ un’tswe, kan’wiyà! » 17 Abun, Ɛlɔdi kàswɛŋ mukɔr Ywan anà bun’si u bɔlokà, ntɔn kàbääl nde Ɛlɔdyas awà kàkäl un’kyay a un’tɔŋ ande Filipo. 18 Ntɔn Ywan kàtɛɛnà a Ɛlɔdi naa: « Mbwo yatɛy ngye muwal un’kyay a un’tɔŋ angye! » 19 Undiir awun Ɛlɔdyas kàyiiŋ nde Ywan, waa kàkweenà mukun’dwa. Wɛɛ nde kàsàkwo anki, 20 ntɔn Ɛlɔdi kàtiinà Ywan bɔɔmà, abà kàyöb nde naa nde wà mbuur a balàbal anà wà in’kyɛɛl, laa kun’tii nde. Mpal kun’wɛɛmà nde, ya yun’pää mpay mbɔɔn. Wɛɛ nde kàkweenà mukun’wɛm. 21 Kyekà, Ɛlɔdyas ipöl aŋàbwaŋ kàmɛn ilä a un’kyɔm a mböör a Ɛlɔdi. Nde awà kàpɛ udyà akà ayɔl ande anà amfum a aŋità ande, anà akà abyääl a Ngalilɛ. 22 Mwan a Ɛlɔdyas wà un’kaar waa kàyàkyen. Ɛlɔdi anà baar kàbel nde bàmɛn un’sak mbɔɔn. Mfum kàtɛn a mwan un’kaar naa: « Lɔm undiir wanswà akwen ngye, mɛ in’kyer ayapà wa. » 23 Nde kun’dyeel kyän naa: « Undiir wanswà ayàlɔm ngye, mɛ in’kyɛr ayapà, itàkal naa yar a mɛɛn a imfum amɛ. 24 Mwan un’kaar kàtoo u ndwà, waa kàtɛn a ngwän naa: « Ininà mɛ in’lɔm? » Nde waa kàfuur naa: « Un’tswe a Ywan Un’düümà. » 25 Nde kàfurà agyägyä akà mfum, waa kun’lɔ̈ɔ̈m: « Mɛ in’kwen naa ngye an’pɛ agyägyä udu a làlɔŋà, un’tswe a Ywan Un’düümà! » 26 Mfum kàwem ngyɛb. Wɛɛ, ntɔn kyän ande anà baar kàbel nde, nde kàkwen anki utön mukun’pà. 27 Apan sye, mfum kàtöm un’seey mwɛy anà nswɛɛŋ mutwal un’tswe a Ywan Un’düümà. Un’seey kàkyen u bɔlokà, waa kàtsül un’tswe a Ywan, 28 kàtwääl wa udu a làlɔŋà, waa kàpɛ wa akà mwan un’kaar. Waa mwan un’kaar kàpɛ wa akà ngwän. 29 Mpal bàwem alɔŋki a Ywan làsaŋ alan, ba bàyàwal ndom ande, waa bàsi ya kan’dii mwɛy. 30 Yàmɛnà naa mpal bàyàfurà antööm, ba bàkɔ̈ŋ apà Yɛsu, ba bun’sam ndaa yanswà bàkyer ba anà bàlɔɔŋà ba. 31 Nde kàtɛn a ba naa: « Bɛ bumwɛy, làyi u mpey, làyöör ikye u nsye a ipɔl. » Ntɔn baar mbɔɔn bàkälà muyaa anà mukyeenà, waa ba bàkäl anki itàkal anà taaŋ mudyà. 32 Lalan bàkyen ba, ba mpɛl, uboo a bwaar u mpey, u nsye a ipɔl. 33 Baar batääl mukyà, bàmbɔɔn laa bayöb ba. Apan, fà an’bul manswà, ba bàkyen ntiin ntiin kà in’kɔl, waa bàfweel kà ikal bàkwen ba mukyà. 34 Umpal katoo Yɛsu u bwaar, nde kàmɛn un’sɛŋ a baar mbɔɔn, ngyɛb waa yun’wɛl ntɔn ba, ntɔn ba bàkäl asànaa in’kɔk myakɔɔn aleer, waa kàsɛmà mukalɔŋ indiir mbɔɔn. 35 Taaŋ làkyen mbɔɔn, alɔŋki bàsin apà Yɛsu, waa bàtɛn a nde naa: « Ikal ki kyà ipɔl, taaŋ sye lan’kyà mbɔɔn. 36 Afuur baar bà, ba bàkyà u bitsuŋ a ndwà anà an’bul a tsütsü mukàsom isaa adyà. » 37 Wɛɛ nde kafuur naa: « Lapɛ udyà bɛ ŋakwo! » Ba bàtɛn a nde naa: « Nkye bi ikàsom mampà a itɛr a ngim nkam yweel ntɔn bi ipɛ ba udyà? » 38 Nde waa utɛn a ba naa: « Mampà an’kwe bɛ làwe amà? Kàlaler! » Ungö muler, ba ban’tɛn naa: « An’tyeen, anà nsö yweel. » 39 Apan, nde kaswɛŋ naa ba bàsi baar banswà unsà an’kab bàŋàbwaay udu a un’lɛŋ un’bu. 40 Baar bàbwaay unsà in’lwaaŋ a nkam anà myà an’kwem an’tyeen. 41 Yɛsu kàwɛl mampà man’tyeen anà nsö yàyweel, nde kàler u du, kàsaak ma, kàtsül ma, waa kàpɛ akalɔŋki ntɔn mukääb baar banswà. 42 Ba banswà bàdi, waa bàyüür. 43 Ba bàsyen in’lwaŋ kwem aŋiyweel myàŋàyɔl a itiir a mampà anà byà nsö byàsäl. 44 Baar bàdi mampà bàkäl abaal nsaab tyeen. 45 Apan sye, Yɛsu kàswɛŋ alɔŋki ande mubilà u bwaar anà mufweel kusà a nde, u sim a ɛwà lumwɛy, u ntsü a Bɛtesayidà, umpal nde ŋakwo usàpay nde un’sɛŋ a baar. 46 Ungö mupay ba, nde kàbeenà u mɔŋ mukàyamà. 47 Làsisye, bwaar làkäl lan’tol uboboo a ɛwà, nde kàsàkal nde mpɛl u mɛɛn. 48 Muman naa alɔŋki ande bàmunwan a ngwal muluk nkay ntɔn un’pöb kàyee lisà, tsütsü a taaŋtyà, nde kan’yà mper akà ba wàmuyikyà udu a ɛwà, waa kàlasoonà. 49 Mpal bun’mɛn ba wàmuyikyà udu a ɛwà, ba bàsi naa bwo kàkäl, waa bàsi in’kwɛŋ. 50 Ntɔn ba banswà bàkyer un’man, lingyoomà waa lawɛl. Wɛɛ apan, nde kàyäm anà ba, waa kàtɛn a ba naa: « Làwɛl ibaal! Wà mɛ, twon lan’man bɔɔmà! » 51 Apan, nde kàbilà u bwaar apà ba, un’pöb waa kànye. Uboo a ba ŋakwo, ba bàbemà mbɔɔn. 52 Kutɛn aŋàbwaŋ, ba bàsàyöb anki mbuul a impà a mampà, ntɔn mpem aba yàkäl bwoor. 53 Ungö a nsaabà, ba bàtɔlà u mɛɛn a Ngɛnɛsàlɛr, waa bàbäm bwaar aba. 54 Pa bàtoo ba u bwaar, baar waa bàyöb Yɛsu, 55 waa bàkyen ntiin kà itiir a nsi akin kyanswà, waa bàsɛmà mukun’twääl aŋukyal udu a ipɔy kà ikal kyanswà bàweemà ba naa Yɛsu wà kwo. 56 Ntsü yanswà kàbilà nde: uboo an’bul itàkal an’bul a kölàköl, itàkal kà itsuŋ a ndwà, baar bàtɔ̈ɔ̈là aŋukyal u làbay, waa bun’bɔ̈ɔ̈nà naa nde kawɛy ba bàbä itàkal làpan a ipfɛy ande mpɛl. Abun baar abà bàtɛɛ kya mpi bàkyer akɔɔrà.