LƆMÀ 1

1 Pɔl, un’syääl a Klistɔ Yɛsu, bun’bel mukal ntööm anà bun’si ukɔl ntɔn mukyään Làsaŋ a Nzam. 2 Làsaŋ alà, nde kàtɛn itaan uboo a in’kaan in’kyɛɛl u mbwo a ŋangɔɔm ande. 3 Abun, ya yà ntɔn Mwan ande, bun’bör unsà ndür kà itoo a David, 4 bun’si Mwan a Nzam anà ngwal, u mbwo a Dweelà In’kyɛɛl, ntɔn ngwiiyà ande uboo a akü, Yɛsu Klistɔ, Mwol abi. 5 U mbwo a nde, bi kàwɛl kab a ngway mukal ntööm ntɔn musyen, kà ikɔb ande, in’sɛŋ myanswà mpa amyà Ayudà mukun’kyey u mbwo a làkwikilà, 6 in’sɛŋ làbà bɛ sye uboo mwo, bɛ baar làwɛl làbeel a Yɛsu Klistɔ, 7 - akà atɔŋ banswà abà nkween a Nzam, u Lɔmà, abà bàwɛl làbeel a Nzam mukal bà in’kyɛɛl, wɛy bɛ làwɛl kab a ngway anà duu byan’fà akà Nzam awà Taaràbi anà akà Mwol Yɛsu Klistɔ. 8 Mɛ in’tàkwen mufuur an’tɔɔn akà Nzam amɛ u mbwo a Yɛsu Klistɔ ntɔn bɛ banswà, ntɔn u mɛɛn manswà bàmutà imbäl a làkwikilà abɛ. 9 Nzam awà in’fàsyääl mɛ unsà dweelà amɛ, u mbwo a Làsaŋ Aŋàbwaŋ a Mwan ande, nde wà mbäl amɛ naa mɛ in’fàlatà din taaŋ lanswà. 10 Taaŋ lanswà, unsà ngyamàkà amɛ, mɛ in’fàlɔm naa unsà ukwen a Nzam, mɛ in’mɛn ipɔ̈l aŋàbwaŋ muyà akà bɛ. 11 Unsà ya yanswà, mɛ iwe anà ngyal mukàlaman ntɔn mukàlapà kab a Dweelà ntɔn bɛ làkäl bàŋàtsim. 12 Itàkal naa u mbwo abɛ, bi banswà iwɛl ngwal, amwɛy anà bumwɛy, u mbwo a làkwikilà abi banswà, làbɛ asànaa làmɛ. 13 Atɔŋ, mɛ in’kwen anki mukalawɛy ukɔɔn ayöb naa mɛ in’fàkal anà an’kyän muyà akà bɛ, ntɔn muwal imbɛŋ imwɛy akà bɛ, asànaa akà in’sɛŋ myumwɛy mpa imyà Ayudà, wɛɛ tii apanà mɛ ipöl ŋàtàman anki. 14 Mɛ, mɛ in’we anà nkul a Angɛlɛki asànaa yà baar mpa abà Angɛlɛki, yà aŋan’yeerà asànaa yà insil. 15 Kyakin, mɛ in’we anà ngyal mukyään Làsaŋ Aŋàbwaŋ akà bɛ sye baar làbà u Lɔmà. 16 Ntɔn mɛ in’we anki anà nswɛn a Làsaŋ Aŋàbwaŋ, ntɔn la là ngwal a Nzam ntɔn mɔ̈ɔ̈ a mbuur awe anà làkwikilà, utàtwɛb akà Un’yudà, ungö akà Ungɛlɛki. 17 Ntɔn balàbal a Nzam làfàmɛnà u mbwo a la, unsà làkwikilà anà ntɔn làkwikilà, asànaa bàsön ya naa: « Mbuur awà balàbal unsà làkwikilà akyer asàwà mɔ̈ɔ̈. » 18 Apan sye, nkyɛl a Nzam ifàmɛnà fà du ntɔn mutɔn ukɔɔn inzaam anà nsaŋ a nkɔɔl a baar bàfàkaar ndandaa uboo a ntsüül a nsaŋ a nkɔɔl. 19 Ntɔn undiir ban’kwo muyöb akà Nzam, wa afàmɛnà ntɔn ba: Nzam kàkyamɛɛy wa. 20 Abun, fà kàkyer Nzam mɛɛn, nsyääl ande yàŋàsöön ubwaŋ yàŋàyee, ngwal a mbul a in’tye anà inzaam ande, byàkyer afàmɛnà ubwaŋàbwaŋ unsà un’yɛnà u mbwo a isal ande. Abun, baar un’lɔɔn bawɛɛl anki. 21 Ntɔn, itàkal naa ba bàyöb Nzam, ba nde làkoo bun’si anki asànaa Nzam, an’tɔɔn sye bun’fuur anki. Wɛɛ an’kyän aba màbulà màbunàbun, mpem aba yà unsil yàbilà uboo a làpib. 22 Ba bàkyeyà uyɔl naa ba bà aŋayeerà, kyekà ba bàbulà aŋukɔŋ: 23 Ba bàsɔɔm làkoo a Nzam mpa afàsɔɔmà anà itɛk a mbuur afàsɔɔmà, anà itɛk a nɛn, anà ntsür a in’kɔl in’nà, anà ntsür yàfilaan. 24 Kyakin Nzam kawɛy nde naa mpem aba ikyer ukwen aba unsà mbiin, ntɔn ya ilwom làkoo a ndür aba ŋakwo. 25 Ba bàsɔɔm ndandaa a Nzam asye a loor, ba bàpɛ làkoo anà bàsyäälà undiir bàkyer kà ikal a Nkyer awàŋàsaak, mbul a in’tye. Wöwö! 26 Lalan, Nzam kasölà nde akà ilään a nswɛn: Akyay aba bàwɛy mukal anà abaal, ba bàbulà mukal ba a ba. 27 Abaal sye u mper yàba, bàpiy nkääl aŋàbwaŋ anà un’kaar, ba bàbilà unsà ilään a amwɛy anà bumwɛy, mukyer ndaa a nswɛn a baal anà baal, anà muwal unsà ndür aba, bweel a balàbal ntɔn ndiimà aba. 28 Asànaa mpa bàmɛn ba naa ndöŋ yatɛy muyöb Nzam, Nzam kasölà akà un’yɛnà aba akɔ̈ɔ̈n an’kyän aŋàbwaŋ: kyakin bàkyerà ba indiir mpa ban’kwo ba mukyer. 29 Ba bàŋàyɔl a un’kɔɔl aŋàyɔŋ wà ifà ifà, wà làmfɛɛl, wà ngyal a ngim, wà nkyɛl, wà un’köl, wà ndwää a baar, wà an’sye, wà impeenà, wà indiir a nswɛn, aŋambämà, 30 aŋatwee, ayiiŋ a Nzam, aŋunkɔ̈ɔ̈n, aŋuyɔl, aswesweey, aŋun’yɛnà abɛ, aŋambɛɛy a aböör aba, 31 bàkɔ̈ɔ̈n un’yɛnà, bàkɔ̈ɔ̈n in’kɔɔn, bàkɔ̈ɔ̈n mpem a ukwen, bàkɔ̈ɔ̈n ngyɛb. 32 Itàkal naa ba bàkyàyɔ̈b ubwaŋàbwaŋ ntsüül a nsaŋ a Nzam ayitɛɛnà naa baar bàfàkyer indiir abi bàkyà ukwà, ba kà nà bàfàkyer bya mpɛl anki, ba bàfàkyey sye baar bàfàkyer bya.