TITƆ 1

1 Mɛ Pɔl, un’syääl a Nzam anà ntööm a Klistɔ Yɛsu ntɔn musyen baar kàsɔ̈ɔ̈l Nzam unsà làkwikilà anà unsà un’yɛnà a ndandaa asànaa inzaam ilɔɔmà kya, 2 unsà làkyän a mɔ̈ɔ̈ a mbul a in’tye kàpɛ Nzam ilää, Nzam awà mpa afàtà loor. Nde kya kapɛ kusà a an’taaŋ a mbul a in’tye, 3 anà u taaŋ kàsi nde, nde kàswɛŋ Ndaa ande uboo a an’lɔɔŋ amà ban’pɛ mulab nswɛɛŋ a Nzam awà Un’tswää a mɔ̈ɔ̈ abi. 4 Akà Titɔ, mwan amɛ wà ndandaa unsà làkwikilà abi là un’tüüb: Wɛy Taaràbi Nzam anà Un’tswää a mɔ̈ɔ̈ abi Klistↄ Yɛsu bapɛ kab a ngway anà duu. 5 Isàkal naa mɛ kàsawɛy u Krɛt, yà ntɔn naa ngye asàmay an’yilà màsääl anà musà andweer a Ikööŋ u bul lanswà mulab nswɛɛŋ kapɛ mɛ. 6 Undweer akal mbuur akɔ̈ɔ̈n ube, un’dim a un’kyay mwɛy mpɛl, akal anà baan aŋàlàkwikilà mpa ban’kwo mukafüün naa ba bye anà nkääl ambe anà aŋunkwɛm. 7 Ntɔn un’kyɛɛŋ a Ikööŋ akal mbuur akɔ̈ɔ̈n ube, ntɔn nde wà un’leer a isal a Nzam: nde ukal anki mbuur afàböön baar ndaa, ŋankyɛl, un’yöör a man, ŋangwiy, mbuur afàleŋ bweel a nswɛn, 8 wɛɛ nde akal ŋun’kaay, un’sam a ndaa aŋàbwaŋ, ŋan’kyän aŋàbwaŋ, mbuur a balàbal, ŋun’kyɛɛl, ŋankääŋ a mpem, 9 wàŋàbääb a Ndaa asànaa bàlɔŋ ya, ntɔn nde ukwe mulɛɛl unsà an’lɔɔŋ a ndandaa anà mutɔn asyeel a mbaaŋ. 10 Ntɔn baar mbɔɔn baŋun’tswe ngwal, anà ŋàloor, sin sin uboo a Ayudà aŋàlàkwikilà. 11 Ngye akyer atsum mun. Ba bàmutwaal lingyoomà uboo a an’ywar aŋikiinà, muyilɔɔŋ indiir mpa byan’kwo mulɔŋ, ntɔn muwal bweel a nswɛn. 12 Umwɛy uboo a ba, ŋangɔɔm aba ŋakwo, kàtɛn naa: « Taaŋ lanswà Bàkrɛt bà ŋaloor, nstür a mpɔr, abwal bàfàkwen nà udyà mpɛl. » 13 Aki imbäl a ndandaa. Lalan, aŋän a ngwal, ntɔn ba bàkäl anà làkwikilà a ndandaa 14 anà ba bàkɔ̈ɔ̈n alab in’sim a Ayudà anà nswɛɛŋ a baar ifàpà ndandaa ngö. 15 Indiir byanswà byàŋàpɔŋà akà baar abaŋàpɔŋà. Wɛɛ akà baar mpa bàŋàpɔŋà anà bàkɔ̈ɔ̈n làkwikilà, undiir mwɛy wàŋàpoŋà watɛy, ntɔn un’yɛnà anà an’kyän aba màŋàtay. 16 Ba bàfàkyey naa ba bàkyun’yöb Nzam, wɛɛ ba bàkyun’tɔn u nsyääl aba. Ba bà baar a ŋingyääy, bun’tswe ngwal anà bàkwe anki akikikye mukyer undiir aŋàbwaŋ.