Kap 142

1 Nak Yawe da aŋpulugosak do tebaisi yaŋ tɨdosot. Bupmɨ nandaŋ namɨŋek aŋpulugosak do bɨsit asat. 2 Nandaba kɨkno gat ae jɨgɨ morap noman taŋ namaŋ uŋun kɨsi iyɨŋ mudosot. 3 Jɨgɨsi nandaŋek wagɨlsi yokwi tokdɨsat yaŋ nandɨsat bɨsapmon, Yawe niaŋsi abeŋ uŋun gak da nandɨsal. Kosiron yokwalgeŋ do amɨn da pat pɨwit. 4 Nak aŋpulugosak amɨn kɨnda kapmat dɨma akban kosot. Amɨn kɨnda da kɨlano dɨma asak, ae amɨn kɨnda da nak do bup taŋek dɨma aŋkutnosok. 5 Yaŋdo, Yawe nak aŋpulugoki do bɨsit gayɨsat. Gak kaloŋgɨn pasɨlɨ tamono. Mɨktɨmon egɨsat bɨsapmon gak gat gɨn egɨp do nandɨsat. 6 Butno obɨsi jɨk tosok, do aŋpulugoki do bɨsit asat uŋun nandaki. Nak aŋsopmaŋgaŋ amɨn uŋun tapmɨmni madepsi. Arɨpmɨ dɨma pabɨŋ yopbeŋ, do uŋun da kɨsiron baŋ pulugaŋ nepbi. 7 Jɨgɨkon yɨkdat, do pulugaŋ nepbɨ tagɨsi egɨpbeŋ. Yaŋ aŋaki yo tagɨsi aŋnamɨsal uŋun do nandaŋek mɨŋat amɨn kabɨyogo muwutnikon mango aŋkɨsikeŋ.