MASMUR 113

1 AMISY ararimbe! Inya, vatano wapanapatambe AMISY Ai weap, Weapo AMISY ararimbe! Syare AMISY Apa tame rararimbe! 2 Unumeso muno ntoa nuge nuganui, syare AMISY Apa tame rararimbe tutir! 3 Nai munijo rani muram uma seo ri nto nanto no munijo varet uma pasyo rije rai, no rui rui vayave tamo AMISY wemi rararin. 4 AMISY opamo akari titi no vombe irati susye kotaro mine so mai, Apa kovo ntiti mo naume rapapayaje vintabo. 5 Are pirati indati po wama AMISY amaisy? Opamo tuna no kursijo titi rai no munijo ntiti. 6 Weramu beakaje rave ti Po nugo naume muno mine so raen kava. 7 Wepi Po vatano ananuge meweno ai aijaseo no anaingkainyo kindua ama uga rai, muno vatano mamanaive ai jewene, aijaseo no apa mayondi rai. 8 Indamu aijaseo tuna akarijo wo nuge raijanande matavon tenambe, weti apa tame ngkovo akari matavon no kawasae Amisye Apa ura maije mansamun. 9 Amisye wepi Po akoeyo nte bayave raijaseo no ama yavaruga, weti ama arikainye inta mansaen no rai, wemirati akoeyo ranuga ntairi anayanambe rautan . AMISY ararimbe!