MASMUR 138
TBL1 Masmur Daud po ratoe. Sya AMISY, syare syo kove raura seo Nai inanuga ntenami rautan, nai ana akokoe ubambunin no Manunggara mansamun, risyo ransyeran kangkamane veano nangkakivambe. 2 Rinamumbeto no Nya Yavaro ndandinit, ribeaje Nai muno syo Nya tame rararimbe. Weye Winyamo Nya muinye no tawan muno winteto Nya urairi rai; weye Nya tame muno Nya urairi mamo Nyo raijaseo titive mo anakotaro kaijinta rakivan. 3 Arono syo winanonae, Winyo sya ana idanonae ore raveti mamaisy, Winyo inanuga raveti mbambunin, weti rijanive jewen. 4 Sya AMISY, vatan tenambe ube akarive no mine so nawamo indati wo nararimbe, weye wo Nya ayao ranaun to. 5 Onawamo indati ukinyo ransyerane rai wo AMISY Nya ana ndave rangkakivambe, weye Nya kovo ntiti manakoe rave. 6 AMISY Winyamo ntiti rave, weramu naemeno vatano awa tame maje rave mai, yara vatano umararine nawamo winggwaravainyo mansai. 7 Ranivara rino irati ana nsosobe ama uga rai, Winyi Nyo rinayaranande ti rikov tutir. Winyavakare muno nanemo vambunine mo rinapaya, mo rinapaya irati marova awa parije rai. 8 AMISY, Winya urairi mamo indati Nyo raveti mamaisyo rinai, sya AMISY, Nya muinyo no tawane mamo ntoa nuge nuganui. Syare vemo naneme mpaya Nya kawasae reansai jinya!