HECHOS 11

1 Ryete myen’ xin’ mté’th Jesús co’ ndxe’ di’s, no mèn co’ ndxàc hues por cón che’n Jesús, co’ nqueltàa le’n yèezya’ co’ nac làaz mèn jude, mèna mbìn le’ mèn co’ inacte mèn nación Israel mdyal mbìn di’s ndac co’ nac di’s ndac che’n Diox. Ngola’s mèna no ngòo mèna loo cón che’n Diox, ne. 2 Co’se’ mbere Pedr, mdyàa Pedr par ciuda Jerusalén, mèn co’ ndxela’s co’ nac mèn nación Israel anze’f mteyol’ di’s con Pedr cón che’n cón mbli Pedr liz Cornel. 3 Ndxab mèna loo Pedr: â¿Chonon ngua too naal mèn co’ inacte mèn nación Israel no axte ndxuhua nol mèna, à’? 4 Sya, mtlo Pedr, mda’ Pedr cuent loo mèn con’ co’ ngòc loo Pedr ndoore’ ya Pedr liz Cornel no axta xal ngòc bautizar mèn liz Cornel. Ndxab Pedr: 5 âDaa ngo le’n ciuda Jop. No láth ngue bezen Diox thìb bzyè, mxyo’f loo thìb con’ loon. Gunèen nde làa thìb con’ co’ ñaa xal thìb le’ mant loo bé’ loon. No natedó’ mant dyap punt. 6 Co’se’ mbui’en co’ huenleque’ le’n mant cón nzo le’n mant, gunèen nzo má’ co’ nzi’f thap nii le’n mant co’ nac má’ huan. Nzo mbel’. No nzo mbin le’n mant. 7 No mbìnen thìb di’s co’ gunee loon: Goo too, Pedr. Lùu nee xá ñaa má’ co’ hual. Beth má’ par hual. 8 Per daa ndxab loo Tad: Aa’a, Tad. Ne’lidena tataa tac daa tarte hua nec thìb nítyèth má’ co’ nac má’ nazab no co’ nac má’ co’ inambìide. 9 Sya, mbere di’s che’n Tad. Mbyèn di’sa tedib vez loo bé’. Gunee di’sa loon: Rye má’ co’ mtembìi Diox, ne’gabtel má’ zab má’a. 10 Mbyon vez tataa gunee Tad loon. Ngoloa, mbere mant. Nguáp mant loo bé’ tedib vez. 11 Leque hora, mzin son xa’bi’ liz Mon co’te’ nzon. Yon xa’bi’a nde axta ciuda Cesar par mbi’th cua’n xa’ daa. 12 Sya, mtel’ Xpii Natú’ daa, nda non yon mèna. No mnibe’ Xpii Natú’ loon ne’gàcte chop loo chop la’s daa par ga non mèna liz Cornel. Ngua no xop mèn ciuda Jop, co’ ndxàc hues na’ por cón che’n Jesucrist, daa liz mbi’ co’ lèe Cornel ciuda Cesar, ne. 13 Mbi’ co’ lèe Cornela mda’guè’ cuent loo nu’ xá mod gunèe mbi’ ngua thìb angl loo mbi’ liz mbi’. Ndxab angl loo mbi’: Ftel’ mèn par ya mèn ciuda Jop par ya xi mèn thìb mbi’ co’ lèe Mon co’ ne’ tedib lèe co’ lèe Pedr. 14 Mon ñee lool xá mod lil par gàc lyá’l loo con’ ryes con ryete mèn gulizl. 15 Co’se’ mtlon, ngue toodiz non mèn guliz Cornel liz Cornel, Xpii Natú’ ngulàa loo mèna no ngòo Xpii Natú’ loo mèna par tlo ñibe’ Xpii Natú’ loo mèna xalque’ ngulàa Xpii Natú’ loo na’ co’se’ ngòc huiz co’se’ nerleque’ ngulàa Xpii Natú’ loo na’ no ngòo Xpii Natú’ loo na’ par tlo ñibe’ Xpii Natú’ loo na’, ne. 16 Axta syare’ mte’ lezon xal gunii Tad Jesús loo na’: Lìcque’, Juàn Bautist mbli bautizar mèn con nít per le’n taaplá huiz lin par lyàa Xpii Natú’ che’n Diox loo ryete gu’ co’ ngola’sle’ loo cón chenen no loon, co’ nee di’s, thidte ngòo gu’ loo cón chenen por cón che’n Xpii Natú’ co’ lyàa loo gu’ xal co’se’ ndxòo mèn le’n nít par ndxàc bautizar mèn. 17 Pues, chele’ Diox mbli ngulàa Xpii natú’ no ngòo Xpii Natú’ loo mèn co’ inacte mèn nación Israel par mtlo ñibe’ Xpii Natú’ loo mèna, ne, xalque’ ngulàa Xpii Natú’ loo na’ no ngòo Xpii Natú’ loo na’ par mtlo ñibe’ Xpii Natú’ loo na’ co’ ngola’sle’ loo Jesucrist, ¿chó nac daa hora par gàc daa thìb xa’ co’ cà’ di’s, no thìb xa’ co’ nac ngolo ngola’s loo con’ ngue li Diox par yila’s taamas mèn, sya, à’? Yende mod gác lin tataa, ¿lé’? 18 Le’ sya, co’se’ mbìn mèn co’ ndxàc hues por cón che’n Jesucrist co’ nac mèn ciuda Jerusalén tataa ndxab Pedr, xèegà mbyau’ ro mèna. Más quee lezo’ mèna ndxab mèna di’s roo di’s xèn no di’s natú’ loo xtàa mèn cón che’n Diox no loo Diox. Ndxab mèna: â¡Ay, Dio’s! Nase non na’ no nanee na’ axta loo mèn co’ inacte mèn nación Israel mbli Diox par mxyal’ ned mxyal’ yó’ par ngulàa yéc mèna no ngulàa lezo’ mèna par mse’ mèna mod co’ ngòp mèna loo Diox. No tataa mod tyon’ xtol mèna par gàc loo mèna yòo ban no mèna Diox thidtene yiloa. 19 Anon mbeth mèn thebol Steb mtlo mèn, ndub ngu’s mèn mèn co’ ngola’sle’ loo cón che’n Jesucrist. Ngo ndxep mèn co’ nzo ne’ñee lezo’ mxon’ axta par le’n yèezya’ co’ nac làaz mèn fenis, no axta par le’n yèezya’ co’ nac làaz mèn chipr co’ nac thìb yòo biiz co’ nziri’ le’n níttó’. No axta le’n ciuda Antioqui mxon’ rye mèna. Mblo mèna yalbàn rye ned mxon’ mèna cón che’n di’s ndac che’n Diox. Per ante loo mèn nación Israel mblo mèna yalbàn. Ne’ngode mèna yalbàn loo mèn co’ inacte mèn nación Israel. 20 Làth xtau’a, ndxep mèn co’ ngola’s co’ ngòc mèn gulàaz che’n làaz mèn chipr, no mèn gulàaz che’n làaz mèn ciren, ngro’ mèna. Ngua que tee mèna. Mzin mèna axta ciuda Antioqui. Mdoodi’s mèna loo mèn co’ inacte mèn nación Israel par neda, ne. Mda’ mèna cuent cón che’n di’s ndac co’ nac cón che’n Tad Jesús co’ ndlu’ xá mod lyá’ mèn loo con’ ryes. 21 Diox mbli ngòp mèna con’ roo con’ xèn la’s nii mèna no la’s ya’ mèna par ngo mèna yalbàn no te’th mèna cón che’n Tad Jesús. No por cón che’n co’ mxo’f zin’ mèn cón che’n Tad Jesús huax mèn co’ inacte mèn nación Israel mblá’ costumbr gox co’ mbed no mèn no ngola’s mèna loo Tad Jesús. 22 Co’se’ mbìn mèn co’ nac mèn ciuda Jerusalén co’ nqueltàa loo cón che’n Jesucrist le’ mèn co’ inacte mèn nación Israel ngola’s, mtel’ mèna Mbèl’ par ngua Mbèl’ axta Antioqui par lyath no Mbèl’ mèn co’ nque tee go yalbàn cón che’n di’s ndac che’n Diox le’n ciuda Antioqui. 23 Co’se’ mzin Mbèl’ ciuda Antioqui, ñèe Mbèl’ anze’f thìb con’ ndac angngue li Diox loo mèn ciuda Antioqui co’ ngola’sle’ loo Jesucrist. No anze’f mdyac lezo’ Mbèl’ gunèe Mbèl’ cón ngue li Diox loo mèna. Sya, mco’x Mbèl’ loo ryete mèna. Ndxab Mbèl’ loo mèn: âDib nzo yéc gu’ no dib nzo lezo’ gu’ bli nèe gu’ gu’ no altantque’ gure gu’ loo cón che’n Tad Jesucrist. 24 Tataa mque tee li Mbèl’ tac Mbèl’ ngòc thìb mbi’ ndac loo Diox. No ñibe’pe’ Xpii Natú’ loo Mbèl’. No anze’f ngòp Mbèl’ yalxla’s loo Diox. Por cona, anze’f thìb mèn ngola’sle’ loo cón che’n Jesucrist por cón che’n Mbèl’. 25 Ngolo mque tee Mbèl’ le’n ciuda Antioqui ndxep tiemp, mxen Mbèl’ ned. Nda Mbèl’ par ciuda Tars par cua’n Mbèl’ Saul le’n ciuda Tars. No co’se’ mzyál’ Mbèl’ Saul, mbe’ Mbèl’ Saul par ciuda Antioqui tedib vez. 26 No ngo no Mbèl’ Saul con rye mèn co’ nqueltàa loo cón che’n Diox ciuda Antioqui le’n thìb lín’ complet. Mblu’ Mbèl’ ryop Saul loo huax mèn cón che’n Diox. Mèn ciuda Antioqui nerleque’ ngòc mèn co’ mdub lèe mèn co’ ndxela’s loo cón che’n Jesucrist mèn co’ ngòo loo cón che’n Jesucrist. 27 Leque le’n huiza ngo ndxep mèn co’ ndxela’s loo Diox por cón che’n Jesús co’ ngòc mèn co’ mde’th di’s co’ ndxab Diox le’n ciuda Jerusalén. Ngro’ mèna le’n ciuda Jerusalén par ngua mèna axta ciuda Antioqui. 28 Láth nzo mèna làth mèn co’ ndxela’s le’n ciuda Antioqui, thìb mbi’ co’ lèe Agab co’ ngòc mèn co’ mde’th di’s co’ ndxab Diox co’ ngua Antioqui, ngo too mbi’ làth mèn co’ ndxàc hues por ndxela’s mèna loo cón che’n Jesucrist. Mnibe’ Xpii Natú’ loo mbi’. Ndxab mbi’ loo mèn co’ nqueltàaa lyàa thìb huin tín’ loo mèn dib athu loo izlyo’. No ngòcque’ con’a le’n tiemp co’se’ mdub ñibe’ thìb mbi’ co’ ngro’ lèe Claud loo mèn ciuda Rom co’ nac làaz mèn ital. 29 Sya, mèn co’ ndxela’s loo Diox por cón che’n Jesús co’ nqueltàa loo cón che’n Diox le’n ciuda Antioqui, ndxab mèna loo xtàa mèna no mdoo lezo’ mèna tel’ mèn ndxep tmi loo mèn co’ ndxàc hues por cón che’n Jesús, mèn co’ naban par ned le’n yèezya’ che’n làaz mèn jude. Tub mèna tmi xal nzote mèna. 30 Tataa mbli mèn co’ ndxela’s le’n ciuda Antioqui. Mtel’ mèna tmi loo mèngool co’ ndyoo ner no co’ ndyoo naa loo mèn co’ nqueltàa loo cón che’n Diox le’n yèezya’ co’ nac làaz mèn jude. Sya, mbe’ Mbèl’ ryop Saul tmi co’ mtel’ mèna loo mèngoola.