HECHOS 2

1 Co’se’ ngòc huiz co’ ngòc huiz lni Pentecostés tiempa, le’pe’ huiza thidte mqueltàa myen’ co’ ndxe’ di’s che’n Tad Jesús le’n ciuda Jerusalén con taamas mèn co’ ngola’sle’ loo Tad Jesús no loo cón che’n Tad Jesús. 2 Láth thidte nziri’ mèna liz thìb mèn, chàa, mbyèn thìb ruid brut co’ mbyèn loo bé’. Mbyèn ruida xal co’se’ nxyo’f thìb mbiidó’. No mbyèn biia le’n nyòo co’te’ nzi ndub rye mèna. 3 Látha, mxyo’f loo loo mèna no mxac mèna ngulàa thìb con’ loo thìb thìb mèna co’ ñaa xal looz bèel. Pues con’ co’ gunaa xal loz bèela ngòc Xpii Natú’ co’ ngulàa loo mèn. Mbyan’ con’a loo mèna dib lal ngo mèna le’n nyòo. 4 Ryete loo mèna ngulàa Xpii Natú’ no ngòo Xpii Natú’ loo mèna. No mbyan’ Xpii Natú’ loo mèna par ñibe’ Xpii Natú’ loo mèna. Le’ sya, hora mtlo mèna, mdoodi’s thìb thìb mèna tedib di’stèe xalque’ mbli Xpii Natú’ par mdoodi’s mèna di’stèe. Di’stèea ngòc di’stèe co’ mdoodi’s chol mèn co’ nzo le’n ciuda Jerusalén le’n huiza. 5 Tataa ngòca tac le’n huiza huax mèn tith, co’ ngòc mèn che’n nación Israel, ngo ban le’n ciuda Jerusalén. Mèna ne’nglá’de mod co’ nac che’n xley’ mèn. Mbi’th mèna ciuda Jerusalén par li mèna xalque’ mnibe’ xley’ mèna loo mèna. Mèna ngòc mèn co’ naban dib athu loo izlyo’. Mbi’th li mèna xal ñibe’ xley’ mèna loo mèn ciuda Jerusalén. 6 Co’se’ mbìn mèna ngòc ruid co’ mbyèn loo bé’a, huax mènléy’ mqueltàa co’te’ mbyèn ruida. No axta ne’ ne’ ñee mèna cón li mèn xtùuz tac thìb thìb mèna ndxòn di’stèepe’ mèn co’ ndyoodi’s mèn co’se’ ngulàa Xpii Natú’ loo mèn. 7 Ante ngüi’ no ante ñaa mènléy’ co’ mqueltàaa. Mbez thìb mèna no tedib mèna loo xtàa mèna. Ndxab mèna: â¿Ché’ inacte mèn ba’ mèn gulàaz che’n làaz mèn galile co’ ndyoodi’s xalque’ ndyoodi’s na’ nalle’, cà’? Lìcque’, nac mèn ba’ mèn gulàaz che’n làaz mèn galile, cara. 8 ¿Xá mod mbli mèn ba’ par ndyoodi’s mèn ba’ xti’s na’ co’ ngóol no thìb thìb na’, sya? 9 Hui’ gu’ nexa. Trè’ nzo mèn gulàaz che’n làaz mèn part; mèn gulàaz che’n làaz mèn med; mèn gulàaz che’n làaz mèn elam; mèn gulàaz che’n làaz mèn mesopotam; mèn gulàaz che’n làaz mèn jude; mèn gulàaz che’n làaz mèn capados; mèn gulàaz che’n làaz mèn pont; mèn gulàaz che’n làaz mèn asia; 10 mèn gulàaz che’n làaz mèn frig; mèn gulàaz che’n làaz mèn panfil; mèn gulàaz che’n làaz mèn egipt; mèn gulàaz che’n làaz mèn africa; mèn co’ nde chol lugar co’ más tith loo làaz mèn ciren. No nzo ndxep mèn co’ nac mèn gulàaz che’n làaz mèn ciuda Rom, ne, co’ naban ciuda Jerusalén làth na’. Ndxep mèn gulàaz che’n làaz mèn ciuda Rom nac mèn nación Israel por ngóol mèn le’n nación Israel. Le’ taandxep mèn ciuda Rom na, ngòc mèn nación Israel por ngòc mèna mèn xley’ mèn nación Israel. 11 Lomisque’ ne, nzo ndxep mèn co’ nac mèn gulàaz che’n làaz mèn cret co’ nac thìb yòo biiz co’ nziri’ le’n níttó’. No nzo ndxep mèn gulàaz che’n làaz mèn arab. Ale ndxòn na’ xti’s ryete mèn ba’ co’ nac con’ roo no con’ xèn co’ mbli Diox loo xti’s na’ co’ nac di’stèepe’ na’. 12 Ryete mèna ante ngüi’ no ante ñaa loo cón ndxàca. Axta ne’ ne’ ñee mèna cón li mèna xtùuz. No mnibdi’s mèna loo xtàa mèna. Ndxab mèna: â¿Cón con’ ndxè’? ¿Chonon tatua’ ngue li Diox loo na’, yoo? 13 Per taamas mèn mxìis co’se’ mbui’ mèn ndxàc cón ndxàca. Mbez mèna loo xtàa mèna: âTatua’ ndxàca loo mèn ba’ tac ndyuuz mèn ba’. 14 Sya, ngo too Pedr con taamas myen’ xtàa Pedr co’ ndxe’ di’s che’n Jesús loo mèn co’ mqueltàaa. Cabii ndxab Pedr loo mèna: âGu’ co’ nac mèn nación Israel no gu’ co’ nac mèn taamas nación co’ naban le’n ciuda Jerusalén, na ndlyaz gòn gu’ no ta’ gu’ cuent cón che’n cón ndxàc ba’. No huen huen tub nza gu’ loo con’ co’ nde niin loo gu’ nalle’. 15 Cón che’n mèn co’ mbez ndxep gu’ ndyuuz, mèn ba’ indyuuzte xal ndli ndxep gu’ xtùuz. ¡Máa yob yéc gu’! Hor ndxè’ inacte hor co’ tyuuz mèn. Pente nzo na’ hor nquée guyè’ xtil’. 16 Ndxe’leque’, con’ co’ ndxàc co’ ngüi’ gu’ ba’ nac con’ co’ ndxàc no con’ co’ mdyaale’ xalque’ ngòc di’s co’ gunii Joel co’ mde’th di’s co’ ndxab Diox co’se’ ndxab Joel taandxè’: 17 Diox ndxab cón che’n con’ co’ gàc le’n lult huiz co’ nde nque. Ndxab Diox: Na làa Xpii che’n daa loo mèn dib athu loo izlyo’. Myen’bi’ co’ nac xgan’ mèn no myen’got co’ nac rsap mèn, te’th myen’a di’s loo mèn co’ ñibe’en loo myen’. Lomisque’ ne, myen’bi’ xyo’f loo con’ loo co’ lu’en loo myen’. Lomisque’ ne, loo mèn gox xyo’f loo con’ loo co’ lu’en loo mèn gox làth mcal’. 18 Lomisque’ ne, ndxab Diox: Daa làa Xpii daa loo mènbi’ no loo mèngot co’ xo’f zin’ zin’ cón chenen co’se’ gàca huiza. No te’th mèna con’ co’ ñibe’en loo mèn par te’th mèna loo mèn. 19 Lin par gàc con’ roo no con’ xèn loo bé’ par hui’ mèn no ñaa mèn con’ lin. Le’ loo izlyo’ na, lin huax con’ co’ gàc thìb señ loo mèn. Lin par gath huax mèn. Lin par lyàa quìi loo mèn huax lugar. Lin par yitoo zen loo mèn xal co’se’ ndxetoo xcuau. 20 Huiza ne’tenìide huiz. Dyau’ loo huiz huiza. Lomisque’ ne, ñaa loo mbe’ xal ñaa ren. Gàc con’a ndoore’ co’se’ gàc tiemp telux Tad Diox izlyo’. Huiza gàc huiz co’se’ lu’ Diox cón che’n con’ roo no con’ xèn che’npe’ Diox. No lu’ Diox rye loothe con’ roo con’ xèn co’ ndxàp Diox la’s nii Diox no la’s ya’ Diox loo mèn. 21 Per ryete mèn co’ mbez lèe Tad, mèna lyá’ loo con’ ryes. 22 Mèn nación Israel, bìn gu’ di’s co’ nde toodizen loo gu’. Jesús che’n yèez Nazaret ngòc thìb mbi’ co’ mtel’ Diox loo gu’. No huen huen nda’ gu’ cuent le’ Diox mtel’ Jesús làth gu’ tac Diox mbli loo Jesús par mbli Jesús huax yalguzye’ roo yalguzye’ xèn loo gu’. No huen huen nda’que’ gu’ cuent cón che’n yalguzye’ co’ mbli Jesús làth gu’, ¿lé’? 23 Per mastale’ mbli Jesús huax yalguzye’ loo gu’, ngo thìb mbi’ co’ mda’xù’ Jesús loo gu’. Sya, ryete gu’ mqueltàa. Mbe’ gu’ Jesús xal thìb pres par mbeth gu’ Jesús co’se’ mnibe’ gu’ loo mèn ye’rsin’ que’ mèna Jesús loo thìb cruz. Mbli gu’ con’a loo Jesús xalque’ mnibe’ Diox no xalque’ mblobe’ Diox lezo’ Diox póla par gàca tataa. 24 Per mbli Diox ngro xban Jesús. No mtelá’ Diox Jesús loo yalguth par ne’ntin lizte Jesús thidtene tac yalguth co’ mtin liz Jesús yende mod ngli gan loo Jesús thidtene. 25 Co’se’ gunii David co’ ngòc rey póla cón che’n Jesús, ndxab David taandxè’: Daa gunèepe’ loo Tad daa. Ndoo Tad daa loon thidtene. No thidteneque’ nzo Tad daa cuaten par yende cón li par zyeb daa no xi’th daa. 26 Por con’a, anze’f mdyac lezon. No ale angmdoon mdoodizen di’s por ndyac lezon. No por cona, mastale’ gath bél’yòo laden, ndxàpen yalxla’s loo Tad daa le’ Tad daa li par yo ban daa tedib vez. 27 Tac U’, Tad, ne’lá’ya’de alm daa par quée yalguth no tin yalguth alm daa thidtene. Ne’ ne’ ta’ U’ lugar yiza’ no ga’s bél’yòo laden, daa co’ mxo’f zin’ zin’ che’n U’, daa co’ anze’f nque’ lezo’ U’ ñèe U’. 28 Tad, U’ mblu’ loon cón lin par ban no daa U’ thidtene. No yiloa, anze’f tyac tín’ lezon co’se’ hui’en loo U’. 29 Gu’ co’ nac mèn nación Israel co’ nac hues xtàa daa, lìcque’, gu’ nda’que’ cuent le’ David co’ ngòc xudgool na’ nguthque’. No mca’s mèn thebol David. No axta nalle’ be’ nax bá’ che’n thebol David co’ ngüi’ na’ no co’ ñaa na’ loo. 30 Per gu’ nda’que’ cuent le’ David ngòc thìb mbi’ co’ mde’th di’s co’ ndxab Diox. No huen huen nanee David le’ Diox mcàbgòn no mbli nèe Diox di’s co’ ngro’ ro Diox co’ ndxab Diox loo David le’ thìb xa’ co’ gàc bin David, xa’a gàc Crist co’ yan’ lugar che’n David co’ tyub ñibe’ loo mèn nación Israel. 31 Por cona, mda’ David cuent cón che’n Crist xal mèn co’ gunèe ngòc con’ loo Crist ndoore’ gàca le’ Crist ryo xban làth mèn nguth. No lomisque’ ne, ndxab David le’ alm Crist no xpii Crist ne’yan’te le’n ye’rbìil. Ne’ ne’ yiza’ bél’yòo lad Crist. No ne’ ne’ ga’s bél’yòo lad Crist. 32 Cona, ngue niin loo gu’: Diox mblo xban leque yub Jesús co’ nac Crist. Ryete nu’, xal nziri’ nu’ trè’, nanee nu’ no nda’que’ nu’ cuent xal ngòca loo Jesús co’se’ mblo xban Diox Jesús làth mèn nguth. 33 Co’se’ ngolo mbli Diox ngro xban Jesús, Diox mnibe’ loo Jesús làa Jesús Xpii Natú’ loo mèn, Xpii Natú’ co’ mcàbgòn Diox li Diox lyàa loo mèn. No yòo Xpii Natú’ loo mèn par ñibe’ Xpii Natú’ loo mèn. No nalle’ ryete con’ co’ mbui’ gu’ no co’ mbìn gu’a, ngòc con’a por Jesús. 34 Inacte yub David co’ ngro xban no co’ mquée loo bé’. Tac yub David ndxab taandxè’: Tad Diox ndxab loo Tad daa: Ftub cuaten, ey, 35 axtaque’ lin le’ rye mèn co’ nac ngolo ngola’s che’nl tyubdi’s lool no gàc mèna mèn nado’ lool. 36 Por cona, daa Pedr ngue nii loo gu’ co’ nac mèn nación Israel: Ne’gànte lezo’ gu’ no ne’gàc chopte lezo’ gu’. Fta’ gu’ cuent co’ huenleque’ leque yub Jesús co’ mbli gu’ mandad mquée loo cruz, Diox mbli par ngòc Jesús Tad no jef loo ryethe con’. Mbli Diox ngòc Jesús Crist, ne. 37 Co’se’ mbìn mèna tataa ndxab Pedr, mxi yéc mèna no mxi lezo’ mèna. Mnibdi’s mèna loo Pedr no loo taamas myen’ xtàa Pedr co’ nziri’ loo Pedr: âGu’ co’ nac mèn gulàaz nu’ no co’ nac xtàa nu’, gunee gu’ loo nu’ cón ndxàal li nu’ por mbli nu’ con’ ye’rsin’ con Jesús, sya, cara. 38 Sya, mcàb Pedr. Ndxab Pedr loo mèna: âBlàa yéc gu’ no blàa lezo’ gu’ no fse’ gu’ ryethe mod ye’rsin’ co’ ndxàp gu’ loo Diox. No yiloa, gòc bautizar thìb thìb gu’ por lèe che’n Jesucrist par tataa mod lu’ gu’ loo mèn le’ Diox mton’ xquin gu’ no xtol gu’. Le’ sya, Diox li par lyàa Xpii Natú’ loo gu’ no yòo Xpii Natú’ loo gu’ par ñibe’ Xpii Natú’ loo gu’. 39 Co’se’ mcàbgòn Diox làa Diox Xpii Natú’ loo mèn, con’a nee di’s, li Diox par lyàa no yòo Xpii Natú’ loo gu’ no loo xin’ gu’ par ñibe’ Xpii Natú’ loo gu’ no loo xin’ gu’. No mcàbgòn Diox par lyàa no yòo Xpii Natú’ loo mèn tith par ñibe’ Xpii Natú’ loo rye mèn co’ nzo ban tith. Con’ co’ mcàbgòn Tad Diox loo na’a par li Tad Diox loo na’a nee di’s le’ Diox co’ xà’ mèn no cui Diox mèn loo con’ ye’rsin’ par yòo mèna loo cón che’n Diox. 40 Con di’s ndxè’ co’ mdoodi’s Pedr no con taamas di’s co’ mdoodi’s Pedr, mco’x Pedr mèn no ndxab Pedr loo mèn nación Israel: âLeque gu’ blàa yéc gu’ no blàa gu’ lezo’ gu’ no fta’ gu’ lugar tí’ no làa Diox gu’ loo con’ ryes làth mèn nación Israel co’ nac mèn nala’s, mèn co’ ne’ndalte ngala’s no co’ ne’ndalte ndubdi’s loo con’ mnibe’ Diox loo mèna par li mèna. 41 Ngoloa, ryete mèn co’ mdub nza no co’ mda’ lugar mbìn di’s co’ ndxab Pedr, mèn co’ ngulàa yéc no co’ ngulàa lezo’ par mse’ mèna mod co’ ngòp mèna loo Diox, mèna ngòc bautizar leque hora. Leque huiza, mqueltàa mèna con mèn co’ ngola’s loo Jesús. Mèn co’ ngòc bautizar huiza ngòc son mil mèn. 42 No ryete mèna mbli nèe leque mèna loo con’ co’ mblu’ myen’ co’ ngòc xin’ mté’th Jesús co’ ndxe’ di’s che’n Jesús loo mèn. Thidte di’s thidte cuent ngure ban rye mèna. No ngurez mèna Diox. No thidte mqueltàa rye mèna par hua mèna xít mèn no lua’ mèn atate huiz. 43 Le’n huiza ryete mèn co’ ne’ndalte ngala’s xal nac di’s co’ ndxab Pedr, ryete mèna mzyeb no ngo no lezo’ mèna por con’ co’ ndxàc le’n huiza. Nde nxon’, mbli myen’ xin’ mté’th Jesús co’ ndxe’ di’s che’n Jesús huax yalguzye’ roo no yalguzye’ xèn. No mbli myen’ huax con’ co’ nac señ loo mèn. 44 Le’ ryete mèn co’ ngola’s na, ryete mèna thidte di’s thidte cuent ngure. No ryete con’ co’ ngòc che’n thìb thìb mèn ndli zin’ ryete mèna xal che’npe’ mèna, 45 axta mtho’ rye mèn co’ ndxàp che’n mèn, con’ co’ nac che’npe’ mèn; angab na’i, xyòn mèn, no má’ mèn, no taamas con’ co’ ngòc che’n mèn par ngro’ tmi par mda’ mèn tmi mcàa thìb thìb mèn co’ ngola’s co’ ndyac yaltìi nesida. 46 Más de cona, atate huiz mqueltàa mèna le’n templ che’n Diox par cuez mèn Diox. Ndxeloa, thidte nqueltàa mèn. Nda mèn liz hues xtàa mèn co’ ndli nab con’ hua mèn; chó mèn ta’i yé’; chó mèn ta’i huize’ co’ ngòc mod che’n mèna tiempa. Látha, nziri’ mèn guyith guxìis. No yende chó mèn ndye’s no nxyal’ làth xtàa mèna. 47 No atate huiz mbez mèna di’s roo di’s xèn no di’s natú’ cón che’n Diox loo mèn. No mbez mèna loo Diox Diox roo Diox xèn nac Diox. Látha, rye mèn ciuda Jerusalén co’ tarte lyàa yéc no co’ tarte lyàa lezo’, ryete mèna ngòp mod. No mbli mèna par mdyu’ mèn co’ ngola’s loo Diox por cón che’n Jesucrist loo mèn ciuda Jerusalén. Más de cona, Tad Diox tolo ngue li par tolo ndlyàa yéc mèn no ndlyàa lezo’ mèn par lyá’ mèn loo con’ ryes no thidte queltàa no mèna mèn co’ ndxela’s loo Jesucrist no loo cón che’n Jesucrist.