SAN MATEO 17

1 Ngolo xop huiz ngòc con’a, mbe’ Jesús Pedr no mbe’ Jesús Cob no mbe’ Jesús Juàn, hues Cob. Mbe’ Jesús yon myen’a loo thìb yii roo. 2 Láth ngo no Jesús myen’ loo yiia, chàa, mzye’ loo loo Jesús loo myen’. Gunaa loo Jesús xal loo huiz co’se’ nguin bée rol huiz. Nde nxon’, xab Jesús co’ noc Jesús ante nagus bèelleque’ gunaa xalque’ thìb con’ co’ nquée xnìi. 3 Láth nzi li myen’ xin’ mté’th Jesús xtùuz cón ndxàc loo Jesús, chàa, ngro’ too Moisés no Lii co’ mde’th di’s co’ ndxab Diox póla. Ngure toodi’s no Moisés no Lii Jesús. 4 Sya, ndxab Pedr loo Jesús: âTad, susque’ huen naca nzo na’ trè’, cara. ¿Ché’ ndlya’s U’ toxcua’ nu’ son ramad par yòo gu’? Thìba par yòo U’. Tediba par yòo Moisés. Le’ tediba na, par yòo Lii. 5 Tatabe’ ndoo toodi’s Pedr con Jesús, chàa, ngulàa beu. Mtau’ beu loo ryete xa’. Látha, chàa, mbyèn thìb di’s le’n beu co’ ndxab: âMbi’ ndxè’ nac xgan’en. Anze’f ngudloon no lezon mbi’ ndxè’. Bìn gu’ di’s co’ ndyoodi’s mbi’ loo gu’, ndee gu’. 6 Texal mbìn myen’ xin’ mté’th Jesús di’s co’ mbyèna, ale mcuau myen’. Ale, ngulàa cotloo myen’ loo yòo, tant mzyeb myen’. 7 Sya, mbii gax Jesús co’te’ nzi myen’, co’te’ ngulàa cotloo myen’. Mxo’f Jesús ya’ Jesús lad myen’. Ndxab Jesús loo myen’: âGoo che gu’, ey. Ne’zyebte gu’. 8 Co’se’ ngo che myen’, ngüi’ ndxè’ myen’. Ngüi’ ba’ myen’. ¿Máa Moisés ryop Lii? Per ñèe myen’ yende Moisés. No yende Lii. Ante Jesús no maste ñèe myen’ ndoo. 9 Sya, mbii Jesús con myen’ loo yiia. Láth nde làa tùub Jesús con myen’ le’n yiia, Jesús mnibe’ loo myen’. Ndxab Jesús loo myen’: âYende chó loo gabte gu’ le’ gu’ gunèe con’ co’ mxyo’f loo loo gu’, ndee. Ne’ta’de gu’ cuent cón che’n co’ gunèe gu’a loo mèn axta co’se’ gàc huiz ryo xban daa làth mèn nguth, daa co’ mbal yáal loo izlyo’ ndxè’ xalque’ ndxáal chol mèn loo izlyo’. Axta syare’, ta’ gu’ cuent loo mèn. 10 Sya, mnibdi’s myen’ xin’ mté’th Jesús loo Jesús cón che’n co’ mbez maistr co’ ndlu’ cón che’n ley co’ mxo’f Moisés loo mèn le’ Lii yi’th. Ndxab myen’ loo Jesús: âTad, fta’ U’ cuent loo nu’ ¿xá mod chonon mbez maistra loo mèn le’ ner Lii yi’th, à’? 11 Jesús mcàb loo myen’. Ndxab Jesús loo myen’: âLìcque’ nac xal mbez mèn le’ Lii yi’th. Lìca, ngole’ Lii làth mèn le’n tiemp ndxè’. Lii mbli par lyàa yéc mèn no lyàa lezo’ mèn no zye’ mod co’ ndxàp mèn par thìb lìte yòo mèn loo cón che’n Diox tedib vez. 12 Per daa ngue nii loo gu’ tedib vez: Lii mbi’thle’. No ne’nda’de mèn cuent le’ Lii nac mbi’ co’ mbi’thle’. Ndxe’leque’, mbli mèn ngòc nguàal con’ xal mblya’s mèn con mbi’ co’ ngòc Lii. Lomisque’ mod ne, tataa tetìi mèn daa xal lya’s mèn, daa co’ mbal yáal loo izlyo’ ndxè’ xalque’ ndxáal chol mèn. 13 Axta syare’, mda’ myen’ xin’ mté’th Jesús cuent le’ Jesús ngue ta’ cuent loo myen’ cón che’n Juàn Bautist. 14 Texal mzin Jesús con myen’ xin’ mté’th Jesús loo mèn co’ mqueltàale’ co’ nzi bed, ngro’ thìb mbi’ xi’th mèna. Mbii gax mbi’a loo Jesús. Mdub xib mbi’ loo Jesús. Ndxab mbi’ loo Jesús: 15 âTad, gulat lezo’ U’ gunèe U’ mbyòo daa ndxè’. Nde teele’ ndyac mbyòo daa ndxè’ yíiz mbii. Cadque’ co’se’ nquée mbii che’n yíiz ndxè’ loo mbyòo, anze’f nè nquée mbii mbyòo. No nde teele’ ngobii mbii mbyòo loo quìi. No ngobii mbii mbyòo le’n nít. 16 No nalle’ ndal non mbyòo loo myen’ xin’ mté’th U’ trè’ par bel’que’ li myen’ gan teyac myen’ mbyòo. Per axta nalle’ tarte li myen’ gan teyac myen’ mbyòo. 17 Sya, cabii ndxab Jesús loo mbii. Ndxab Jesús: â¡Aa, mèn co’ nziri’ loo izlyo’ tiemp ndxè’! ¡Susque’ thidtene indxela’ste gu’ loon no indxela’ste gu’ con’ mbezen loo gu’! ¡Susque’ nala’s gu’ no naad gu’ no nguud gu’! ¡Axta pól tolo go non gu’ par lin gan gàc nado’ gu’ loon! No ¡axta pól tolo nquin xequen con gu’ tua’the nala’s gu’ no tua’the naad gu’ no nguud gu’! Huàa xi mbyòo. Yi’th mbyòo ndxè’. Ãeene’. 18 Sya, mbyoo Jesús xpii ye’rsin’a. Ante gunii Jesús loo xpii ye’rsin’a, ngro xpii ye’rsin’a loo mbyòo. Ale leque hora mbyac mbyòo. 19 Ngolo mbli Jesús ngòc con’a loo mbyòo, sya, xexte mdoodi’s myen’ xin’ mté’th Jesús thìb lad con Jesús. Mnibdi’s myen’ loo Jesús. Ndxab myen’: âTad, ¿chonon ne’ngácte nu’ ngo’ nu’ xpii ye’rsin’a loo mbyòo, à’? 20 Jesús ndxab loo myen’: âNe’ngácte gu’ ngo’ gu’ xpiia loo mbyòoa tac gu’ pente ndxela’s loon. Lìcpe’ ba’i, na nii loo gu’: Chele’ gu’ ndxela’s ndxepte loon xalte nac thìb biz mostaz, gu’ gác gab gu’ loo yii co’ ndub go’: Biiche trè’, yii. Huàa tub tedib lugar ba’. Yiia biiche. Yende chó con’ ne’gácte gu’ li gu’ co’ gàc cón chenen chele’ gu’, lìcque’, yila’spe’ loon no yila’spe’ gu’ loo con’ lin. 21 Per thìb loo xpii ye’rsin’ xal xpii ye’rsin’ co’ ngòo loo mbyòoa, ne’ryo’de tua’te. Ndxe’leque’, xpii ye’rsin’a ryo’ ante co’se’ cuez mèn Diox co’se’ cue xlat mèn. 22 Láth thidte mque tee no Jesús myen’ xin’ mté’th Jesús par ned le’n yèezya’ che’n làaz mèn galile, Jesús ndxab loo myen’ xin’ mté’th Jesús: âDaa co’ mbal yáal loo izlyo’ ndxè’ xalque’ ndxáal chol mèn loo izlyo’, thìb ned mèn tyenxù’ daa par ta’ mèna daa loo tedib ned mèn co’ tetìi daa. 23 No guth mèna daa. Per co’se’ yilo son huiz nguth daa, daa ryo xbanque’. Co’se’ mbìn myen’ xin’ mté’th Jesús tataa mde’th Jesús di’s loo myen’, anze’f mxi lezo’ myen’. 24 Co’se’ mzin Jesús con myen’ xin’ mté’th Jesús le’n yèez Capernaum, le’pe’ nzi tee mèn co’ nthop tmi co’ nquin mèn par tyoxcua’ templ. Ngua mèna loo Pedr. Mnibdi’s mèna loo Pedr: âPedr, ¿ché’ ne’ta’de maistr gu’ plá pes par ayud che’n templ, cà’? 25 Pedr mcàb loo mèna. Ndxab Pedr loo mèna: âPeser ta’ maistra. Le’ sya, texal ngòo Pedr le’n nyòo co’te’ nzo Jesús, ale ner Jesús gunii loo Pedr. Ndxab Jesús loo Pedr: â¿Xá neel, Mon? ¿Chó loo mèn ndli mèn co’ ñibe’ loo izlyo’ ndxè’ cuent ña’b mèna tmi par ta’ mèn ayud che’n contribución, à’? ¿Ché’ ndli mèna cuent ngue na’b mèna ayuda loo mèn gulàazpe’ mèn o ché’ ndli mèna cuent ña’b mèn ayud loo mèn tith co’ nde làazpe’ mèn co’ nac trè’, cà’? 26 Pedr mcàb loo Jesús. Ndxab Pedr: âMèna ña’b ayud loo mèn tith. Sya, ndxab Jesús loo Pedr: âChele’i tataa nac, le’ sya, mèn gulàaz che’n mèn co’ ñibe’ inquinte quix tmi che’n contribución sya, xàa. 27 Per par ne’ta’de na’ xyàn lezo’ mèn ba’, huàa loo lagun co’ nzi go’. Huàa lobii lansuel le’n lagun. Le’ sya, ner mbèel co’ yigaa loo lansuel, tyenl mbèela. No xal’ ro mbèela. Le’n ro mbèela ryo’ thìb pes fchòo plat, co’ nee di’s, thìb pes. Con sobr thìb pesa ta’l ayud loo mèna cón che’nl no ta’l ayud cón chenen co’ nac impuest co’ ña’b mèna loo na’, ndee.