SAN MATEO 6

1 Tolo mblu’ Jesús loo mèn. Mbez Jesús: âNabe’ste fque tee ban ndac gu’ loo Diox. Ne’gàcte gu’ arid mèn nate’s par hui’ chol mèn co’ ndxàc hues xtàa gu’ loo con’ ndli gu’. Tac chele’ gu’ li tataa, sya, tataa mod ndye’s gu’. Le’ sya, xud gu’ co’ nzo loo bé’ ne’lide par gàp gu’ cón che’n gu’ loo xud gu’ Diox. 2 Ngue niin loo gu’, ne: Ne’tubte gu’ arid ruid loo mèn par cuez mèn trompet loo mèn xal ndli mèn co’ anze’f ntembìi ro no co’ anze’f ntembìi xti’s le’n sinagog no le’n yèez par ned ndxè’ par ned ba’. Ale tataa ndli mèna par gab chol mèn: Susque’ huen nac mèn ba’, yoo. Lìcpe’ ba’i, daa ngue nii loo gu’: Por gust co’ nda’ mèna lezo’ mèna, ale leque mèna ndli par guneei loo mèna. No yende chó con’ co’ gàc che’n mèna gàp mèna loo Diox. 3 Per co’se’ ta’ gu’ gòn càa mèn prob, bli gu’ par ne’ mèn co’ ndxàc amiu gu’ ne’ta’de cuent pló cón nac co’ nda’ gu’ gòn. 4 Más huen xexte fta’ gu’ gòn càa prob mèna. Le’ sya, xud gu’ Diox co’ nzo loo bé’, co’ ngue hui’ loo gu’a, li par tolo anggàc con’ ndac loo gu’. 5 Tolo mblu’ Jesús mèn. Ndxab Jesús: âCo’se’ cuez gu’ Diox, ne’gàcte gu’ xal mèn co’ ntembìi ro no xal mèn co’ ntembìi xti’s. Mèna anze’f ndyubla’s cuez Diox, ndoo ga’ mèn le’n sinagog. Mèna ndyubla’s ndyoo ga’ pál squin ned, ne, par cuez mèna Diox par hui’ no ñaa hues xtàa mèna loo mèna. Lìcpe’ ba’i, daa ngue nii loo gu’: Con mod co’ ndxàp mèna, leque mèna mbli guneei loo mèna. No tataa mod yende chó con’ co’ gàc che’n mèna gàp mèna loo Diox. 6 Per co’se’ cuez gu’ Diox, gòo gu’ le’n nyòo co’te’ ndxàt gu’ no ftau’ gu’ ro ryo’. Gurez gu’ Diox xud gu’ co’ nzo loo gu’ le’n cuart co’te’ ndxàt gu’. Xud gu’ Diox co’ ngue hui’ xexte loo gu’, xud gu’ Diox li par gàc con’ ndac loo gu’ loo xnaa. 7 Co’se’ cuez gu’ Diox, ne’cuezte gu’ lèe Diox goze goze con leque di’s co’ mbez gu’ co’ intacte xal ndli mèn co’ inacte mèn nación Israel. Tac ndli mèna xtùuz por di’s co’ mbez mèna goze goze no maste tataa mod más ndxòn Diox ro mèna co’se’ tataa mbez mèna loo Diox. Per ilìcte con’a. 8 Ne’gàcte gu’ lalque’ xal mèna, tá, tac xud gu’ Diox naneeque’ no nonque’ cópe’ nquin gu’ ndoore’ co’se’ ña’b gu’ con’a loo xud gu’ Diox. 9 Cona, ngue niin loo gu’ taandxè’ mod cuez gu’ Diox: Diox xud nu’, co’ nzo loo bé’, ndlya’s nu’ no ña’b nu’ loo U’ le’ mèn ta’ cuent no ten’ mèn thidte U’ nac Diox natú’pe’. 10 Nu’ mbez loo U’ no ña’b nu’ loo U’ le’ U’ ñibe’pe’ loo mèn dib athu loo izlyo’. No gàca xal nee lezo’ U’ loo izlyo’ ndxè’ xalque’ ndxàc co’ nee lezo’ U’ loo bé’. 11 Fta’ U’ lua’ nu’ no xít nu’ co’ hua nu’ nalze no taamas con’ co’ naquinque’ nu’ atate huiz. 12 Fton’ U’ xquin nu’ no xtol nu’ xal nteri’th ntecan’ nu’ xèn xyàn co’ ndli hues xtàa nu’ loo nu’. 13 Ne’lá’ya’de U’ nu’ par aseli nu’ cua’n nu’ xquin nu’ no xtol nu’ loo U’. Ndxe’leque’, blàa U’ nu’ loo ryethe con’ ye’rsin’. Tac U’ ñibe’ loo ryethe con’. No ndxàp U’ ryethe con’ roo no ryethe con’ xèn la’s nii U’ no la’s ya’ U’. No che’npe’ U’ nac ryethe con’ roo no con’ xèn le’n lín’ co’ ntlo, no le’n lín’ co’ ndxelo, no le’n lín’ co’ ne’lith node thidtene. Taandxè’ gàca. 14 Tac chele’ gu’ nteri’th no ntecan’ chol xen no xyàn co’ ndli chol mèn hues xtàa gu’ loo gu’, le’ sya, xud gu’ Diox co’ nzo loo bé’ ton’que’ xquin gu’ no xtol gu’ co’ ncua’n gu’. 15 Per chele’ gu’ ne’teri’thte no ne’tecan’te chol xen no xyàn co’ ndli hues xtàa gu’ loo gu’, ne’ xud gu’ co’ nzo loo bé’ ne’ton’te xtol gu’ no xquin gu’ co’ ncua’n gu’. 16 Co’se’ lya’s gu’ cue xlat gu’ por ndxep tiemp, ne’lu’de gu’ loo mèn le’ gu’ nzi xi lezo’ xal ndli mèn co’ ntembìi ro no mèn co’ ntembìi xti’s. Tac mèna asendli ndlu’ mèna loo mèn le’ mèna nxi lezo’. No nse’ mèna rloo mèna par hui’ taamas mèn le’ mèna nzi xlat. Lìcpe’ ba’i, daa ngue nii loo gu’: Gust co’ nda’ mèna lezo’ mèna, con’a ndli tyathe guneei loo mèna loo Diox. No yende chó cón co’ gàc che’n mèna gàp mèna loo Diox. 17 Per gu’, co’se’ cue xlat gu’, blo gu’ chu’th aceit yéc gu’ no ftee gu’ bèu yéc gu’. No ftech gu’ rloo gu’ par ne’lu’de gu’ gu’ loo mèn nzi xlat gu’ xal ndli mèn co’ ntembìi ro no co’ ntembìi xti’s 18 par tataa mod ne’ten’te lezo’ mèn le’ gu’ nzi xlat. Ndxe’leque’, ante xud gu’ Diox co’ nzo no gu’ non no nanee cón che’n gu’. Sya, xud gu’ Diox li anggàc con’ ndac loo gu’. 19 Lomisque’, ngue niin loo gu’, ne: Ne’gath lyuxte gu’ par que no gu’ yalgon’ gu’ loo izlyo’ ndxè’, co’te’ ndxeza’ yalgon’, no co’te’ ndlyux yalgon’, no co’te’ nquée mxìl yalgon’, no co’te’ mquée mbèd yalgon’, no co’te’ ndli huan’ huan’ yalgon’. 20 Más huen, fcua’n gu’ mod no bli gu’ par gàp gu’ yalgon’ loo bé’ co’te’ ne’quéede mxìl yalgon’, no ne’huade mbèd yalgon’, no co’te’ yende cón li par yiza’ yalgon’, no co’te’ ne’li huan’te huan’ yalgon’. 21 Tac chele’ gu’ anze’f nque’ lezo’ ñèe yalgon’, sya, li gu’ cuent yalgon’a nac lezo’ gu’ no ngudloo gu’ por anze’f ndyac gu’ ñèe gu’ yalgon’a. Le’ con’ co’ más nac cón che’n Diox na, thìb lad nque’ gu’ con’ co’ nac cón che’n Diox. 22 Con ngudloo mèn ngüi’ mèn chol con’, ¿lé’? Per chele’ mèn indyubte yo’f lezo’ loo con’ ngüi’ mèn, mastale’ ngüi’ mèn loo chol con’ ngüi’ mèn, no chele’ mèn inda’de lugar li mèn con’ ye’rsin’ por cón che’n con’ co’ ngüi’ mèn, sya, nambìique’ ndoo mèn no huen nque tee mèn loo Diox. Sya, ne’ ne’ inac ngudloo mèn co’ ncua’n xquin mèn loo mèn. 23 Per ndxe’leque’, chele’ mèn thìb lìte ndli xtùuz no nden’ mèn le’n lezo’ mèn ante li mèn con’ ye’rsin’ por ngüi’ mèn loo con’ con ngudloo mèn par gàc che’n mèna cón che’n yalgon’ che’n izlyo’ ndxè’, mèna thidtene ncuau yéc no ncuau loo par ne’ñeede mèna chó ro yila’s mèn co’se’ tyoodi’s mèn. Ne’ñeede lezo’ mèna cón che’n xá mod ndxàal que tee ban ndac mèna. No thidtene nanguib mèna. 24 Cona, ngue niin loo gu’ tedib vez: Yende chó moz nzo co’ li zin’ loo chop patrón. Tac chele’ moz li preb li moz zin’ loo chop patrón, sya, yòo xyàn lezo’ moz ñèe moz thìb patrón. Le’ tedib patrón na, más huen tyac lezo’ moz ñèe moz patrona. O bien, más altant tyoo moz loo thìb patrón. Le’ loo tedib patrón na, yecloo moz. Cona, ngue niin loo gu’: Yende mod li mèn sirv loo Diox chele’ mèn más ndxath ndlyux loo cón che’n yalgon’ che’n izlyo’ ndxè’. 25 Niin loo gu’, ne, ey: Ne’tyóode gu’ no ne’gath lyuxte gu’ par gab gu’ loo lezo’ gu’ pá ned ya gu’ zin’ par que no gu’ cón hua gu’ no cón gu gu’. Ne’ ne’ tyóo gu’ par gab gu’ loo lezo’ gu’ pá ned tyee centav par tyu’ xab gu’ co’ goc gu’. ¿Ché’ ndli gu’ cuent ante par hua mèn nzi ban mèn loo izlyo’ ndxè’, cà’? No ¿ché’ ndli gu’ cuent más ntac xab mèn leque ladpe’ mèn, cà’? Yende xàa. 26 Hui’ gu’ loo mbin bé’ co’ nxobii loo mbii. No bli gu’ xtùuz cón che’n mbin. Mbin ingode bin. Ne’ ne’ inthop mbin cosech. Ne’ ne’ ingosua’ mbin cosech. Mastale’ tataa ndxàca loo mbin, xud gu’ Diox co’ nzo loo bé’ neeque’ xá mod huaa xud gu’ Diox mbin. Ale’que’ gu’ más ntac leque mbin. ¡Pà ne’ huaa Diox gu’ xal nguaa Diox mbin! 27 ¿Chó thìb gu’ co’ nziri’ trè’ co’ más ndxath ndlyux gác gu’ zib gu’ mase taarol metr loo gu’ par yol’ gu’ taachu’tha? Yende xàa, ¿lé’? 28 ¿Chonon susque’ ndyóo gu’ cón che’n xab gu’ co’ nquin gu’, à’? Hui’ gu’ loo ye’ madalen co’ nzo’f yii den xal ndryoo ye’ madalen. Ne’ ne’ indli ye’ madalen zin’. Ne’ ne’ inzìi ye’ madalen dó. 29 Per na ngue nii loo gu’: Ne’ Salomón co’ ngòc rey póla ne’ngoc xabte xal ye’ madalen, mastale’ mque no Salomón huax xab Salomón co’ nabe’s natoxcua’. 30 Chele’ Diox tataa ndli mdoc xab yii den no yé’ huize’ tec mèn huana le’n rdii liz mèn, ale’que’ loo gu’ ne’ li Diox más co’ ndac xal huana. ¡Aa mèn izlyo’ co’ pente ndxela’s loon! 31 Por cona, ngue niin loo gu’: Ne’tyóode gu’ no ne’gath lyuxte gu’ par gab gu’: ¿Pá ned tyee co’ hua na’? ¿Pá ned tyee co’ gu na’ yé’ huize’, yoo? No ¿pá ned tyee centav par tyu’ xab na’ yé’ huize’, ne? 32 Ne’lide gu’ tataa tac mèn co’ nziri’ dib athu loo izlyo’ co’ inacte mèn nación Israel, mèna ncua’n no ndyóo mèna cón che’n ryethe con’a. Per xud gu’ Diox co’ nzo loo bé’ nonque’ no naneeque’ le’ gu’ naquinque’ ryete con’a. 33 Con’ co’ ngue niin loo gu’ ndxè’ nac nerleque’ con’ ndxàal li gu’: Fta’ gu’ lugar ñibe’pe’ Diox loo gu’. No fcua’n gu’ mod que tee ban lì gu’ xal ndxòo lezo’ Diox li gu’. Chele’ gu’ tataa li, sya, Diox li par que no gu’ ryethe taamas con’ co’ nquin gu’. 34 Por cona, ngue niin loo gu’, ne: Ne’tyóode gu’ no ne’gath lyuxte gu’ nalle’ cón che’n con’ co’ hua gu’ no con’ co’ gu gu’ no con’ co’ nquin gu’ yé’ huize’. Ne’gabte gu’ loo xtàa gu’: Huen ngua na’ nalze. Mzyal thìb le’ rol lua’ na’ par nduhua na’ no xít na’ co’ gu na’. Per ¿yé’, à’? ¿Cón hua na’ no cón gu na’? Anxle’ mbez gu’ tataa. ¿Chonon anze’f ndyóo gu’ cón che’n con’ co’ gàc loo gu’ yé’ huize’, à’? Nzoque’ huax con’ co’ nac cón che’n con’ co’ ndxàc loo gu’ nalle’ par tyóo gu’ no par gath lyux gu’ nalle’, ey.