2 Pedro 1

1 Nëêëdiê, Simón Pedro, nacaê benê rue mandado quie Jesucristo. Nacaê apóstol quienëê. Biaê guichi ni useêelaên lao leêe, yaca benê rnaorë xneza Jesucristo cabëê nao nëtoê xnezanëê. Yelaê benê justo quie Xuziro Diuzi Jesucristo rlëêënëê tuzi ca rlëêënëê raêo. 2 Rulidzaê Diuzi ta huelaêiyanëê leêe tazÌe cuëchinëê chizi luêu guicho laxtaêole como danê rioñeêele ruele tuzÌe conlë Diuzi lënëê Señor quiero Jesús. 3 Conlë yelaê huaca quienëê, banegun Diuzi fuerza valor quiero ta inaoro xnezëê dza rdaro lao yedyi layu, naê gacaro benê laxtaêo yëri. Canaê bënëê quiero caora cati gucalënëê raêo ta tzioñeêero galero quie Cristo, benê ulio raêo, benê zÌe gula, benê rue puro ta yuêu niêa xnezi. 4 Canaê bë Diuzi quiero begaên lënëê raêo diêidzaê ta gacalënëê raêo ute uselanëê raêo quie tamala de lao yedyi layu, naê gacaro benê yëri cabëê nayëri Diuzi. Canaê biudyiaguiên ta rnazin quiero raêo. 5 Quie lenaê ruen dyabëê galele quie Diuzi du guicho du laêadyiêle tale neza dyaêa. Lëscanê ruen dyabëê tzioñeêele huele cabëê na Diuzi 6 gapale cuidado bihueêle lato inabëê ta rnazin quiele leêe huele tamala. Lëscanê ruen dyabëê 7 yeyëchiêlaêadyiêle benê bichiro, benê nao xneza Jesús, idyëêële yugulu benëê. 8 Chi tziole huele canaê, naê biten canaêzi dza rdale lao yedyi layu, biten canaêzi unaole xneza Jesucristo, benê naca Señor quiero. 9 Pero chi bitziole huele canaê, nacale ca quie tu benê laochula, benê birlëêë dyaêa, porque agulaêadyiêle cabëê bë Diuzi quiele uzÌiêzÌenëê quie dulaê xquia quiele ta bële tiempote. 10 Quie lenaê, bichaê, nun quie bë Diuzi nombrar leêe, huele dyabëê hue quiele ca niaê niga. Chi huele canaê, naê biiquixile inaole xneza Jesús dyëêëdi gula. 11 Chi huele canaê, naê huesalo Diuzi puerta guibá ta tzetzuêule tzesule tuzioli ga rnabëê Señor quiero Jesucristo, benê pte psela raêo. 12 Quie lenaê biusanaê iniaê leêe ta bigalalaêadyiêle cabëê reyaêalaê huele, baêalaêcazi banezile dyëêëdi barue quiele diêidzaê li quie Diuzi. 13 Tu lala rdaê lao yedyi layu, nacan bala quiaê gunaê leêe consejo ca consejo bënaê leêe niga. 14 Baona Señor quiero Jesucristo nëêëdiê de que ruen bago dza gatiaê. 15 Quie lenaê pcaênaê diêidzaê quiaê laole cuenda bigalaêadyiêle cabëê consejo bënaê leêe dza udaê lao yedyi layu. 16 Caora unandoê bzioñeêendoê leêe quie yelaê huaca quie Señor quiero Jesucristo, quele cuento ulio benê rziê yëê bzioñeêendoê leêe, porque nëtoê blëêëndoê yelaê huaca quienëê. 17 Lëzi blëêëndoênëê caora bë Diuzi lëbëê benê zÌe. Bendoê rchiê Diuzi caora unënëê dyëêëdi nanëê nëtoê: “ZÌiêinaê benê niga. Lega nedyëêëdaêbiê raxedaê ca ruebiê." 18 Bendoê rchiê Diuzi zaên guibá caora nitaêlëndoê Jesús lao yaêa ga betzaê zÌabanëê gucan bezëri di raca titiê. 19 Quie lenaê nacan bala cabëê una yaca benê unitaê tiempo, yaca benê udixogueê xtiêidzaê Diuzi. Napale razón ruele cuenda cabëê unajëê, porque naca diêidzaê unajëê ca quie xniê guiê rseniêna ga naca chula cuenda ilëêëro ga zioro hasta yeguidara Jesucristo huenëê gaca yeniê gula luêu guicho laxtaêoro. 20 Reêendaê iniaê leêe tu diêidzaê naca belao. Nunu saqueê tzioñeêe diêidzaê laêiya quie Diuzi según pensari quieziyaquëê, dechanê según cabëê rna Bichi Be quie Diuzi tzioñeêeyaquëên. 21 Pues yaca benê naê, benê unitaê tiempote, quele bzujëê diêidzaê lëêë guichi ta racazi laêadyiêjëê, pero como nacajëê benê laêiya quie Diuzi, bzujëê diêidzaê lëêë guichi cabëê mandado bë Bichi Be quie Diuzi quieyaquëê.