2 Corintios 2
TBL1 Enzeêe uriêá elliebacuê, nu la yelabiêya liêihua nee, para nú la riêá nú nehuana tsu arquiêhua. 2 Xne tunu riêá nú nehuana tsu arquiêhua, che ¿lecaê ti duê ana arquia, tunu riêá nú nehuana tsu arquiêhua liêihua enu rduê ana arquia? 3 Enzeêe lu carta nú uxeêlala luhua unia tucu nú unia luhua, para nú chenu nzelabiêya liêihua la riêihua nú tsu nehuana arquia luhuare nú riêihua nú ñia tsu arquia. Nu liêá nediya nzeêcaa nú tunu ñia nzu arquia che yehua ñia nzu arquiêhua. 4 Chenu uquieêa carta zeêe luhua chiquiê nehuana ulleêca nu nzenu arquia hasta nú unguna uquieêa bee bedichiaê nú fuerte lu carta zeêe, pero lá quieêa carta zeêe luhua para nú nehuana tsu arquiêhua sino que para nú riêihua beyaê nú chiquiê seêca liêihua. 5 Tunu nuê bene enu uriêi nú nehuana utsu arquia pero la necane nú liêitsia uriêilla nú nehuana utsu arquia sino que leêca nuuhua uriêi beella nú nehuana utsu arquiêhua. 6 Liêá nia luhua nú castiya nú udeteêhua zeca benecuaê necalane scuatsia. 7 Uriêihua perdonalla nee nu uduêhua ana arquiêlla para nú la nehuana tsu arquiêlla xne la llelaê arquiêlla xneca riêilla. 8 Enzeêe nacua luhua nú lubeê zecahua lulla nú chiquiê secahua liêilla. 9 Carta nú uquieêa luhua huaêtu, uquieêene para nú riêá beyaê tunu sucuêhua ye nú unia luhua. 10 Nu nee tatse bene enu rriêihua perdona, leêca liêá rriêá perdona nzeêe, nu bene enu uriêá perdona tunu nuê xi rquiêña nú riêa perdona liêilla, rriêá perdona liêilla equie cuendaêhua ante Jesucristo. 11 Para nú la riêi bezeêlu ana luaêahua, xne liaêahua nediyaêlaêahua xneca sequienu bezeêlu bee bene. 12 Chenu uriñaa eyeche Troas para nú ixiuleêa bedichiaê nzeêcaê Jesucristo lubee bene, chiquiê uriêi Diose elietsa lua, nu uyuêu modo nú xneca ixiuleêa Stichiaê Diose lubee bene. 13 Pero lá tsu nzeêcali arquia equie nú né llelaa saêahua Tito eyeche Troas, enzeêe unia lubee bene zeêe nu chu nzaêa enza eyeche Macedonia. 14 Pero cheêtsalá Diose nú equie cuendaê Jesucristo ye yeêe rriêinu elietsa luru nú rriêiru ana lu yeene, xne equie cuendaêru rriêi bee bene beyaê stichiaênu, bee bedichiaê nzeêcaênu nú neca xi neca tucu cuanaê nú ñia rlia nú rriêchia diqui lu iliulabe. 15 Nu equie cuendaê Jesucristo liaêahua necaêahua xi neca llene quiendixi nu ñia rlia ante Diose, llene nú rriña lubee bene enu tsilaêa nu lubee bene enu nenitilu lu Diose. 16 Pero lubee bene enu lachili arquiê Diose liaêahua necaêahua xi neca llene nú riñi bee bene, pero para lubee bene enu nzeli arquiê Jesucristo, liaêahua necaêahua xi neca llene nú rliquiê elunehuañiê bee bene. Nu lecati aca riêi bee nucuaê tunu la riêi Diose elietsa lulla. 17 Liêiru la dixiuleêeru Stichiaê Diose para nú riêiru ana dimi tucu nú rriêi huaxilá bee bene sino que liêiru rriêiru tucu nú rialane, tucu nú ucañila Diose liêiru nú riala riêiru. Nu nediyaê Diose nú lunú necaru beneê Jesucristo enzeêe rixiuleêeru stichiaênu.