Efesios 2

1 Liêihua ungahua xi neca bene enu unguti lu Diose equie cuendaê bee dula cuna beenú necha neca 2 uriêihua, uyanalahua inziu nú necha neca nu uriêihua tucu nú niarquiê bezeêlu nú riêihua, nu espíritu nú necha neca cuaê neca enu nehuañi cuna bee bene enu la zucuê Stichiaê Diose. 3 Yeêahua leêca scua uhuañiaêahua tucu nú niarquiêtsiaêahua, nu tucu nú necatsia elliebacuaêahua. Nu leêca scua tucu nú riala bee bene enu la zucuê Stichiaê Diose castiya, leêca scua ayalaêahua castiyaênu. 4 Pero lunú chiquiê ñia ruaêa arquiê Diose liaêahua, nu lunú chiquiê secanu liaêahua, 5 añinzuca nú ungaêahua xi neca bene enu unguti lu Diose, equie cuendaê stulaêahua, pero nee rluêculaêahua elunehuañi cuna Jesucristo lu Diose. Equie nú chiquiê ñia necanu utsilaêahua. 6 Chenu uriêinu nú uhuañi zeca Jesucristo lu eluti neca xi neca nú leêca nuaêahua uhuañi zecaêahua, nu leêca neca xi neca nú nellunuêlaêahuanu liñibe. 7 Uriêi Diose scua para nú lubeênu luaêahua bee bichia nú nzeêtalá nu chiquiê secanu liaêahua nu ñia nzeêcanu luaêahua equie cuendaê Jesucristo. 8 Lunú nzeêca Diose enzeêe utsilaêanu liaêahua, la necane nu necaêahua bene nzeêca lunu, sino que lunú nzeli arquiaêahua Jesucristo enzeêe utsilaêahua. 9 Leêca la necane equie nu uriaêahua nú neca nzeêca utsilaêanu liaêahua para nú lecati aca nelliña. 10 Xne Diose urecheê liaêahua, nu equie cuendaê Jesucristo ucheêenu arquiaêahua lunú necha uhuañiaêahua huaêtu para nú riaêahua nú neca nzeêca, tucu nú uriêinu elliebacuê nú riaêahua. 11 Enzeêe liêihua enu la neca bee bene Israel ulluêcu arquiêhua xa ulleêcahua hasta huaêtu. Bee bene Israel uhualee liêihua bee bene enu la uyaê seña, xne liêibeella nuyaêbeella seña tucu nú rnibiyaê ley, 12 leêca tiembu zeêe la chuluhua Jesucristo, nu la nebacuêhua leta bee bene Israel, nu leêca la nebacuêhua lunú ucuaqui uêna Diose. Uhuañihua lu iliulabe quieê nu lecaxi nzuquie arquiêhua nu sin nú chuluhua Diose. 13 Pero nee nú nzelila arquiaêahua Jesucristo, liêihua enu istu utsu arquiê lu Diose, nu nee ubeêta bicalahua lunu equie cuendaê reneê Jesucristo nú uriêchia lu cruse. 14 Xne Jesucristo neca enu rriêi nú nzuxe arquiaêahua. Liêinu unitilunu elu rlee lunú rriêi nú la zela nú aca tucunecatse bee bene Israel cuna bee bene enu la neca bee bene Israel. 15 Nu equie nú unguti Jesucristo ulaxu yebee custumbre nú rnibiyaê ley lubee bene Israel nú rriêi beella, liêinu uriêinu nú unga tucunecatse bee bene Israel cuna bee bene enu la neca bee bene Israel xi neca tucu eyeche cuqui, xne neca tucunecatseêahua cuna liêinu. Scua uriêinu nú uyuêu nú nzuxe arquiê bee bene. 16 Xne equie nú unguti Jesucristo lu cruse, ulaxu nú rlee bee bene Israel lubee bene enu la neca bee bene Israel, nu scua iguale uyala arquiê Diose luaêahua lunú neca tucu necatseêahua cuna Jesucristo. 17 Nu liêinu ubeêta tixiuleêenu lubee bene Israel cuna lubee bene enu la neca bee bene Israel nú xa chuêu nú nzuxe arquiaêahua lu Diose. 18 Nu equie cuendaê Jesucristo sia bee bene Israel nu sia bee bene enu la neca bee bene Israel, rluêculaêahua tucu inziu nú riñaêahua lu Diose xne nzula Espíritu Santoênu cuna liaêahua. 19 Enzeêe la necaêhua xi neca bene istu nu la necaêhua bene rene lu Diose sino que nebacuêlahua leta bee beneênu, neca tucunecatselaêahua cuna bee beneênu. 20 Liêihua necahua xi neca tucu niêi nú recacheêe, nu bee apóstol cuna bee profeta neca beella xi neca cimienduê niêi quieê, nu Jesucristo neca xi neca quiee nú neca equie uzibiê nú recacheê niêi quieê. 21 Nu zeêe uquixie riatsa niêi quie nú rniru nú neca liêihua, nu scua nze liqui nzeêcae para nú aca tucu necatseêahua induê Diose cuna Jesucristo. 22 Nu nee nú neca tucu necatselahua cuna Jesucristo, leêca neca tucu necatselahua cuna beela bee saêahua enu nzeli arquiê liêinu para nú acaêahua tucu indu elu nehuañi Diose equie cuendaê Espíritu Santo.