San Mateo 2

1 Ungula Jesuse Belén, tucu eyeche nú nchiucuê lu iliu Judea, tiembu nú unibiyaê arre Herodes. Nu uriña bee bene enu reca elliebacuê Jerusalén, nzeêta beella enza rliñi bichia Jerusalén nu neca beella magos, 2 che unidichiaê beella: â¿Cá nchiucuê arreê bee bene Israel enu ungula? Xne desde lachiru ulañiêlaêru nú uliñi belaênu, enzeêe nzelaru para nú luêcuru ulaêna lunu. 3 Chenu ubeneê arre Herodes nú unibeella scua, chiquiê nzenu arquiêlla, cuna ye bee bene Jerusalén. 4 Che ubixia arre Herodes ye bee uleêya enu rnibiyaê, cuna bee ulaxcuela enu reca ley nú udeteê Diose lu Moisés para nú nedichiaêlla lubeella cá riala nú ala Cristo. 5 Che uni beella lulla: âEyeche Belén nú nchiucuê lu iliu Judea alanu, xne scua uni profeta chenu unilla: 6 Liêilu eyeche Belén nú nchiucuê lu iliu Judea, nu liêilu la necalu tucu bee eyeche nú mase lleêna nú nchiucuê lu ye bee eyeche llene lu iliu Judea. Xne lulu chiuêu tucu bene enu nibiyaê, nu liêilla biêyalla bee bene Israel enu neca bee benea. 7 Che chu ubixia aêchi arre Herodes bee mago cuaê para nú unedichiaêlla lubeella nú xunga itáa ulubeêlu belaa zeêe lubeella. 8 Nu uxeêlalla liêibeella Belén, nú unilla lubeella: âUquiahua zeêe, nu riêi itáahua beyaê nú xa neca lu cuendaê enduê zeêe. Nu chenu ullelaêlaêhuanu, yeêta tixiuleêehua lua para nú leêca nua nzaêa nze detea ulaêna lunu. 9 Chenu ulaxu nú uni arre Herodes scua lubeella, chu nzuebeella. Nu belaa enu ulañiê beella nú uliñi desde nú nucuaêascaê beella lachi beella nzuculu lubeella, nu utsuxe belaa cuaê hasta elu nchiucuê enduê zeêe. 10 Chenu ulañiê bee mago belaa cuaê zeêe, chiquiê ñia utsu arquiêbeella, 11 nu chenu uyuêu beella liñi niêi zeêe, ulañiê beella enduê cuna naênu María, che utsulliqui beella lunu nu uluêcu beella ulaêna lu enduê zeêe. Chu uxaêla beella ruêu bee caja nú nuyaê beella nu lia udeteê beella oro, cuna quiendixi, cuna mirra lu enduê meê zeêe. 12 Che udixiuleêe Diose lu xcalaê beella nula benchilaê beella lu Herodes, nu né benchilaê beella enza enta beella. 13 Chenu nziala bee mago zeêe lachi beella, che ulubeêlu tucu ángeleê Diose lu xcalaê José, nu uni ángele zeêe lulla: âUzetee, uyaê enduê cuaê cuna naênu nu uquiahua Egipto, zeêe cuaêahua hasta nú ixiuleêa luhua. Xne cuaêna Herodes enduêcuaê para nú utilla liêinu. 14 Che chu uzete José, nu unguyaêlla enduê cuna naênu, nu rulaê zeêe uchiuêu beella nziue beella enza Egipto. 15 Zeêe ucuaêa beella hasta nú unguti arre Herodes. Scua unga para nú uyalu Stichiaê Diose tucu nú uninu lu tucu profeta chenu uninu: “Ubixia endua enza Egipto." 16 Chenu uriêi Herodes beyaê nú uzequienu bee mago zeêe liêilla, chiquiê uleella, nu unibiyaêlla nú unguti ye bee enduê enu nza chiucu lana hasta enu meêe enu nucuaêa Belén cuna bee eyeche abenchilaê zeêe, xne nuyaê cuendalla lunú uni bee mago zeêe lulla nu udetela chiucu lana nú ulubeêlu belaa zeêe. 17 Scua uyalu tucu nú uquieêe profeta Jeremías chenu unilla: 18 Uyene tucu chii eyeche Ramá, nú runaê nu rixiali. Nu Raquel neca enu runaê cuaê equie cuendaê bee enduênchu, nu lecati enu riêi ana tsala arquiênchu xne ungutila bee enduênchu. 19 Pero chenu unguti arre Herodes, che ulubeêlu tucu ángeleê Diose lu José elu nucuaêa beella Egipto nu uni ángele zeêe lulla: 20 âUzetee, uyaê enduê cuna naênu, nu ubenchilaê zecahua Israel xne ungutila bee enu niarquiê nú uti enduê quieê. 21 Che chu uzetee José nu unguyaêlla enduê cuaê cuna naênu nu ubenchilaê beella eyeche Israel. 22 Pero chenu ungabiyaê José nú Arquelao llianaê arre Herodes neca enu rnibiyaê lu iliu Judea, ulliquilla nú challa enza zeêe. Pero chenu ungabiyaêlla lu xcalaêlla nú la challa enza Judea, che nzuella enza lu iliu Galilea. 23 Chenu uriña beella lu iliu Galilea, ucuaêa beella tucu eyeche nú lee Nazaret. Scua unga para nú uyalu tucu nú uni bee profeta nú Jesuse chiulee bene Nazaret.