San Mateo 7

1 ‘Nu la zeêtahua saêhua para nú lecati zeêta liêihua. 2 Xne tucu nú seêtahua bee bene, leêca scua zeêta bee bene liêihua, nu tucu nú rriêinuhua bee bene leêca esquie riêinu bee bene liêihua. 3 ¿La zeêtahua beelá bee bene lunú lleênatsia rriêi beella, nzalá nú uyanu arquiêhua lunú llenelá falta nú rluêcuhua? 4 Nu tunu llenelá falta nú rluêcuhua, ¿xa modo nihua lu stucu bene: “La neca nzeêca lunú rriêilu scua”? 5 ¡Bene enu nequichiaê! Rluti uriêi tucu nú necane, che nuê modo nilu lu stucu bene la yala nú riêilu scua. 6 ‘La riêihua juersa bee bene enu la niarquiê riêi caso lunú neca cuendaê Diose, para nú lecaxi riêinu beei liêihua. Xne tunu riêihua juersa beei, neca nucuaê xi neca chenu siêqui bene tucu nú necachi neca lu nicu. Leêca la riêihua juersa bee enu la yuê arquiê lunú neca cuendaê Diose. Xne tunu riêihua juersa beei, neca nucuaê xi neca chenu rduê bene tucu nú huaxi seca lu cuchi nu tse tsiaí equiee. 7 ‘Unaêcuhua lu Diose che liquiênu lunu rnacuêhua lunu, ulaênahua liêinu nu che llelaêhua liêinu, uzequiehua lunu che riêi casonu liêihua. 8 Xne bene enu rnacuê nú rnacuê lunu yucu nzeêene, nu bene enu rlaêna Diose llelaê nzeêe liêinu, nu bene enu rnacuê nu sequie lunu, riêi casonu nzeêe. 9 ‘¿Xieê nuê ta tucuhua enu deteê quiee acu enduê chenu nacuê enduêhua pa acu la? 10 ¿Urre xieê deteêhua tucu beêla acu enduêhua chenu rnacuê enduêhua bela acu enduêhua la? 11 Liêihua enu la neca bene nzeêca, nuêluhua rdeteêhua nú neca nzeêca lubee enduêhua, ¡enzaláquieê Paêahua Diose liñibe nú la liquiênu nú neca nzeêca lubee bene enu rnacuê nucuaê lunu! 12 ‘Uriêihua lubee bene tucu nú niarquiêhua nú riêibeella luhua. Xne scua rnibiyaê leyê Diose cuna ye beenú uquieêe bee profetaênu. 13 ‘Uyuêuhua ruêu puerta nú nuxuê neca. Xne ruêu puerta nú llene neca, nu inziu nú llene neca, nucuaê neca nú ruyaê liêibee bene lu inziu nú necha neca, nu huaxi bee bene nza inziu cuaê. 14 Pero puerta nu inziu nú ruyaê bee bene lu elunehuañi meêe nu nuxuêe, nu la huaxi bee bene enu nza inziu zeêe. 15 ‘Leêca ubiêyahua liêihua lubee bene enu liêá rnibee nú neca beei profetaê Diose, nu rriêi beei nú lleêna arquiêbeei, pero scuatsia rriêibeei para nú sequienu beei bee bene, nu chiquiê necha rriêi beei. 16 Pero liêihua riêihua beyaê nú xa neca bee bene cuaê, lunú rriêi beei rixiuleêe núti neca beei, xne la ayu cuchiuê lubeê lubee aca eche, nu la ayu higo lubee huañi eche. 17 Enzeêe ye bee aca nzeêca rayu ndixi nzeêca lu. Nu bee aca nu la neca aca nzeêca la ayu ndixi nzeêca lu. 18 Leca modo nú ayu ndixi núla neca nzeêca lu aca nú neca nzeêca, leêca esquie la ayu ndixi nú neca nzeêca lu aca núla neca nzeêca. 19 Ye bee aca nú rayu ndixi nu la zibiê lu, rrecuêe nu riuêe lu quii. 20 Scua riêihua beyaê ti neca beella equie nú rriêi beella. 21 ‘Laca ye bee bene enu rni lua: “Detá, Detá”, chuêu liñibe elurnibiyaê Diose, sino que chuêutsia bee bene enu sucuê lunú rni Diose Pa liñibe. 22 Bichia zeêe huaxi bee bene ni lua: “Detá, Detá, liêiru uniru lunú leelu lubee bene, nu equie nú leelu uluaru bee benechiquiê arquiê bee bene nu equie nú leelu uriêiru huaxi bee milagro." 23 Pero chequie cuaquia lubeei: “Leca xunga uyulua liêihua, ullunaêhua lua, liêihua bee bene enu necha uriêi." 24 ‘Enzeêe, bee bene enu rieneê stichiaêa nu sucuêe, necalla xi neca tucu bene enu netsiña rrecheê niêi equie quiee. 25 Añinzuca nú rlaca quiu nu rlaca huaxi inza riuêu tetsuê niêi zeêe nu reca bii, pero lá rila niêi zeêe xne nchiucuê simienduêe equie quiee. 26 Pero bene enu rieneê nú rnia nu la zucuê stichiaêa, liêilla necalla xi neca tucu bene enu netundu enu urecheê niêi lu eyuxi. 27 Chenu rlaca quiubi, nu rlaca huaxi inza riuêu tetsuê niêi zeêe, che uluquie niêi zeêe. ¡Nu urilalii! 28 Chenu ulaxu nú uni Jesuse scua lubee bene zeêe, chiquiê uyanu arquiê ye beei xneca uzeteênu liêibeei, 29 xne seteênu beei xi seteê tucu bene enu chiquiê rluêcu poder, nu la zeteênu xi seteê bee ulaxcuela enu reca ley.